Read Runyoro - rutooro Mat 26 Bible Online

Mat 26 - Runyoro - rutooro bible

Mat 26

¹Yesu obu yamazire kwegesa ebi byona, yagambira abeegesebwa be ati:

²“Nimumanya nkooku hasigaire ebiro bibiri okuhika ha kiro kikuru eky'okwijuka Okuhingurwaho, kandi Omwana w'omuntu naija kuheebwayo kubambwa ha musaraba.”

³Nubwo banyakatagara abakuru n'abakuru b'abantu baayesorooliize omu kizigati kya mukuru w'abanyakatagara, ibara lye Kaayafa,

⁴baahanuura nkooku baraakwata Yesu omu magezi, bamwite.

⁵Baitu baagamba bati: “Kitakorwa omu biro bikuru, tihaikara kubaho epumpu omu bantu.”

⁶Yesu obu akaba ali Betaniya omunju ya Simooni omugenge,

⁷hakaija omukazi aina ihembe ly'amagita ag'omuhendo mwingi, yagaseesa ha mutwe gwa Yesu, obu akaba aikaliire naalya.

⁸Baitu abeegesebwa obu baarozire eki, baabiihirwa nibagamba bati: “Amagita ganu gafiire ki?

⁹Gaakutunzirwemu siringi nyingi, zigabirwa abanaku.”

¹⁰Baitu Yesu obu yakyetegeriize, yabagambira ati: “Omukazi onu mumutuzire ki? Habwokuba ankoliire ekintu kirungi.

¹¹Abanaku obutoosa mwikara nabo, baitu timurukwija kwikara na nyowe obutoosa.

¹²Okuseesa amagita ganu ha mubiri gwange, eki akikozire naanteekaniriza okuziikwa.

¹³Mazimakwo nimbagambira nti: Hoona hoona omunsi nambere Amakuru Amarungi ganu garaarangirirwaga, omukazi onu eki akozire kiraagambwahoga okumwijuka.”

¹⁴Nubwo Yuda Isikalyota, omu hali ikumi na babiri, yagenzire hali baanyakatagara abakuru,

¹⁵yabakaguza ati: “Murampa ki obu ndaamubahikyaho?” Baamusasura ebicweka by'efeeza makumi asatu.

¹⁶Okuruga obu, yaserra akasumi ak'araamugoberezamu.

¹⁷Ha kiro ky'okubanza eky'obugenyi bw'Emigaati Etatumbisiibwe, abeegesebwa bakaija hali Yesu baamukaguza bati: “Noogonza tukuteekanirize nkaha nambere oraaliira obugenyi obw'okwijuka Okuhingurwaho?”

¹⁸Yesu nukwo kubagarukamu ati: “Mugende omu rubuga mb'omuntu nanka, mumugambire muti: ‘Omwegesa naagamba ati: Akasumi kange kali haihi kuhika kandi omunju yaawe nuho ndaaliira obugenyi obw'Okuhingurwaho hamu n'abeegesebwa bange.’ ”

¹⁹Abeegesebwa baakora Yesu nkooku yabaragiire, baateekaniza obugenyi obw'okwijuka Okuhingurwaho.

²⁰Omu rwiririzi Yesu yaija yaikarra ha meeza hamu n'abeegesebwa be ikumi na babiri.

²¹Obu bakaba nibalya, yagamba ati: “Mazimakwo nimbagambira nti: Omu omuli inywe naija kungobeza.”

²²Bbo baatandika kusaalirwa n'okumukaguza omu omu bati: “MUKAMA wange, ninyowe?”

²³Yabagarukamu ati: “Ogu arukukoza na nyowe omu bbakuli, nuwe arukwija kungobeza.

²⁴Omwana w'omuntu naagenda kuba nkooku kyamuhandiikirweho; baitu ogu arukumugobeza alikibona! Kyakubaire kirungi omuntu ogu kakuba atarazairwe.”

²⁵Yuda ayamugobiize yamukaguza ati: “Mwegesa, ninyowe?” Nandiki Yesu ati: “Niiwe anyakukigambire.”

²⁶Obu bakaba nibalya, Yesu yakwata omugaati, yasiima, yagucwamu, yaguha abeegesebwa be naagamba ati: “Mukwate mulye; gunu nugwo mubiri gwange.”

²⁷Kandi yakwata ekikopo, obu yamazire kusiima, yakibaha naagamba ati: “Munyweho inywena,

²⁸enu niyo sagama yange ey'ekiragaano ekihyaka, eraaseeswa habwa baingi okubaganyiza ebibi.

²⁹Nimbagambira nti: Tindigaruka kunywa ha nsande y'ebijuma by'emizaabbibbu okuhika ha kiro kiri obu ndiginywa na inywe eri mpyaka omu bukama bwa Isenyowe.”

³⁰Obu baamazire kuzina ekizina, baaturuka, baagenda ha rusozi rw'emiti Oliva.

³¹Nubwo Yesu yabagambiire ati: “Ekiro kinu inywe inywena nimwija kumpemukaho; habwokuba kikahandiikwa kiti: ‘Nditeera omuliisa, entaama z'omu igana irarange.’

³²Baitu obu ndimara kuhumbuurwa, ndibabanza kuhika Galiraaya.”

³³Petero yahaya naagamba ati: “Abandi boona noobu baraakurugaho, baitu nyowe nikikafuuhe!”

³⁴Nandiki Yesu ati: “Mazima ninkugambira nti: Kiro kinu kyonyini, enkoko etakakookere, oraaba onyehoogere emirundi esatu.”

³⁵Petero nukwo kumugarukamu ati: “Noobu ndaaba ndi w'okufa na iwe, baitu tindukwija kukwehooga.” N'abeegesebwa abandi boona nukwo baagambire bati.

³⁶Hanyuma Yesu yagenda nabo omu kiikaro ekirukwetwa Getesemaane, yagambira abeegesebwa be ati: “Mwikarre hanu, nyowe ka ngende kuli nsabe.”

³⁷Yatwara Petero n'abatabani ba Zebedaayo bombi, yabanza kusaalirwa n'okutuntura.

³⁸Nubwo yabagambira ati: “Omutima gwange gwina obujune bwingi, buraaliire kunyita. Mwikale hanu nimurora hamu na nyowe.”

³⁹Obu, yagendaho kake omumaiso, yajuumara, yayesengereza ati: “Taata, obu kiraaba nikisoboka, amabone ganu gandugeho; kitaba nka nyowe oku ndukugonza, baitu kibe Iwe nkooku orukugonza.”

⁴⁰Yagaruka hali abeegesebwa yabasanga bagwijagiire; nukwo kukaguza Petero ati: “Timusoboire kwikara nimurora hamu na nyowe esaha emu?

⁴¹Murole kandi musabe, muleke kwohebwa. Omutima nigugonza mali, baitu omubiri muceke.”

⁴²Yagenda obwa kabiri yayesengereza naagamba ati: “Taata, amabone ganu obu garaaba gatarukusobora kundugaho ntakagaboine, kikorwe Iwe nkooku orukugonza.”

⁴³Yagaruka yaija, nabwo yabasanga bagwijagiire, habwokuba amaiso gaabo gakaba gaina oturo twingi.

⁴⁴Yabarugaho, yagenda kwesengereza obwa kasatu, naagamba ebigambo nka biri.

⁴⁵Hanyuma yagaruka hali abeegesebwa yabagambira ati; “Na hati mukyagwijagiire, muhumwire? Kale nu esaaha ehikire, Omwana w'omuntu aheebweyo omu mikono y'abasiisi.

⁴⁶Mwimuke tugende. Arukungobeza ngugwo, airiire haihi.”

⁴⁷Obu akaba naakyabaza ebi, Yuda, omu hali ikumi na babiri, yaija aina ekitebe ky'abantu baingi bakwasire empirima n'ebiduuma, nibaruga hali banyakatagara abakuru n'abakuru b'abantu.

⁴⁸Ogu ayamugobiize, akaba abahaire ira akarorwaho, naabagambira ati: “Ou ndaagwa omu kifuba buli nuwe ogu; mumukwate.”

⁴⁹Ahonaaho yaija hali Yesu, yamuramukya ati: “Mirembe Mwegesa!” Yamugwa omu kifuba.

⁵⁰Yesu nukwo kumukaguza ati: “Munywani wange, oiziriire ki?” Nubwo bali baizire, baagwera Yesu, baamukwata.

⁵¹Omu hali abo abakaba bali na Yesu, yasomorayo empirima ye, yagorra omukono, yatema okutu kw'omwiru w'omukuru w'abanyakatagara, yakucwaho.

⁵²Baitu Yesu yamugambira ati; “Empirima yaawe gigarre omu kiraaro kyayo; habwokuba boona abakwata empirima, baliitwa empirima.

⁵³Nimuteekereza tindukusobora kusaba Isenyowe, akantwekera ahonaaho ihe ly'abamalaika abarukukira ha bihanda ikumi na bibiri?

⁵⁴Kakuba kitabaire kiti, Ebyahandiikirwe byakuhikiriire bita?”

⁵⁵Nubwo Yesu yakagwize ekitebe kyona ky'abantu ati: “Mwizire kunkwata mwina empirima n'ebiduuma, nk'abaiziriire kukwata omunyagi? Buli kiro naikaraga omu Nju ya Ruhanga ninyegesa, mutankwate.

⁵⁶Baitu binu byona bibaireho, nukwo ebyahandiikirwe abarangi bihikiriziibwe.” Okuruga aho abeegesebwa be boona baamusigaho bairuka.

⁵⁷Omu kasumi ako, abo abaakwasire Yesu bakamutwara mba Kaayafa, omukuru w'abanyakatagara, nambere abeegesa b'ebiragiro n'abakuru b'abantu bakaba beesorooliize.

⁵⁸Baitu Petero yamuhondera haraho okuhikira kimu omu kizigati ky'omukuru w'abanyakatagara. Obu yataahiremu, yaikarra n'abalinzi kurora nambere biraahwera.

⁵⁹Baanyakatagara abakuru n'ab'orukurato boona baasera obwakaiso bw'ebisuba, bahangirre Yesu, nukwo bamwite.

⁶⁰Noobu haraaba haizire abakaiso baingi ab'ebisuba, baitu obwakaiso obuhikire butazooke. Ha kumalirra haija abandi babiri

⁶¹baagamba bait: “Omuntu onu akagamba ati: ‘Ninsobora kuseesa Enju ya Ruhanga, n'okugaruka kugyombekera ebiro bisatu’.”

⁶²Mukuru w'abanyakatagara yayemerra yamukaguza ati: “Toina kyona eki orukugarukamu? Kiki abasaija banu eki barukukurumiriza?”

⁶³Baitu Yesu yaculeera. Mukuru w'abanyakatagara nukwo kumugambira ati: “Ninkurahiza Ruhanga omwomeezi, tugambire obu oraaba oli Kristo, Omwana wa Ruhanga.”

⁶⁴Nandiki Yesu ati: “Niiwe okigambire. Baitu nimbagambira nti: Okuruga hati mulirora Omwana w'omuntu aikaliire ha mukono gw'obulyo ogw'Ow'obusobozi bwona, kandi naizira omu bicu by'omwiguru.”

⁶⁵Nubwo omukuru w'abanyakatagara yataagwire ebijwaro bye, naagamba ati: “Ajumire Ruhanga. Nitukyaserurra ki bakaiso abandi? Hati mwehuliire inywenka nkooku ajumire Ruhanga.

⁶⁶Inywe nimucwamu muta?” Baamugarukamu bati: “Asemeriire kufa.”

⁶⁷Nubwo baamucwera ebicwanta ha maiso, baamuteera entomi, abandi empi,

⁶⁸nibagamba bati: “Iwe Kristo, toma; nooha akutiire?”

⁶⁹Petero akaba aikaliire aheeru omu kizigati, omuzaana w'omukuru w'abanyakatagara yaija nambere ali, yagamba ati: “Na iwe obairege hamu na Yesu Omugaliraaya.”

⁷⁰Baitu uwe yayehooga omumaiso ga boona ati: “Eki orukugamba, tindukukimanya.”

⁷¹Obu yaturukire aheeru yahika ha kiti ky'irembo, omuzaana ondi yamurora, yagambira abakaba beemeriireho ati: “Omusaija onu nawe abaire ali hamu na Yesu owa Nazareeti.”

⁷²Petero yagaruka kwehooga naarahira ati: “Omuntu ogu tindukumumanya.”

⁷³Obu haahingwireho akaanya kake, abakaba beemeriireho baija hali Petero, baamugambira bati: “Mananukwo na iwe oli omu hali bo, habwokuba engambo yaawe neekulega.”

⁷⁴Nubwo yatandika kwekondereza n'okurahira ati: “Omusaija ogu timmumanyiire kimu.” Ahonaaho enkoko yakooka.

⁷⁵Petero yaijuka ekigambo Yesu eki yamugambiire ati: “Enkoko etakakookere, oraaba onyehoogere kasatu.” Yaturuka aheeru, yarra muno.