Read Runyoro - rutooro Mat 27 Bible Online

Mat 27 - Runyoro - rutooro bible

Mat 27

¹Obwire obu bwakiire, banyakatagara abakuru boona n'abakuru b'abantu baahanuura kwita Yesu;

²baamuboha, baamutwara, baamukwasa Pilaato omulemi omukuru.

³Yuda ayamugobiize, obu yarozire Yesu amazire kusingwa omusango, yayegarukamu eki yakozire, yagarurra banyakatagara abakuru n'abakuru b'abantu ebicweka by'efeeza amakumi asatu,

⁴naagamba ati: “Nsiisire okugobeza omuntu ataina musango.” Baamugarukamu bati: “Itwe eki nitukifaaho ki? Oyemalirre wenka.”

⁵Nubwo yahungwire ebicweka by'efeeza omunju ya Ruhanga, yabarugaho, yagenda, yayehanika.

⁶Baitu banyakatagara abakuru baasorooza ebicweka ebi by'efeeza, nibagamba bati: “Tikirukuhika kubita omu lyahurro ly'Enju ya Ruhanga, habwokuba sente zinu ziguzire esagama y'omuntu.”

⁷Baahanura kuziguramu ekibanja ky'omubumbi, baziikemuga abanyamahanga.

⁸Nikyo ekibanja eki kyeterwa Ekibanja ky'Esagama n'okuhika hati.

⁹Nubwo ekyagambirwe omurangi Yeremiya kyahikiriire kiti: “Bakatwara ebicweka by'efeeza makumi asatu, nugwo muhendo gw'ogu abantu ba Isirairi baaramwire,

¹⁰kandi babiguramu ekibanja ky'omubumbi, MUKAMA nkooku yammanyisize.”

¹¹Yesu yayemerra omumaiso g'omulemi mukuru. Ogu yamukaguza ati: “Niiwe Mukama w'Abayudaaya?” Yesu yamugarukamu ati: “Nukwo ogambire.”

¹²Baitu banyakatagara abakuru n'abakuru b'abantu obu baamulegere, atagarukemu.

¹³Nubwo Pilaato yamukagwize ati: “Torukuhurra ebi byona ebi barukukunyegerra nkooku biri bingi?”

¹⁴Baitu Yesu atamugarukemu na kimu hali ebi byona ebi baamunyegeriire; omulemi nawe yahunirra muno.

¹⁵Ha kiro kikuru, ekaba eri engeso y'omulemi omukuru okulekerra abantu omunyankomo omu ou baasiimaga.

¹⁶Omu kasumi ako bakaba baina omunyankomo omu arukurangaanwa muno, ibara lye Baraaba.

¹⁷Obu baayesoroize, Pilaato yabakaguza ati: “Nimwenda mbalekerre oha: Baraaba rundi Yesu arukwetwa Kristo?”

¹⁸Akamanya nkooku bamuhaireyo habw'ihali.

¹⁹Pilaato obu yaikaliire ha kitebe ky'okucweraho emisango, nubwo mukazi we yamutumiireho ati: “Omusaija ogu ahikiriire otamukoraho kantu koona; habwokuba ebi mmuroosireho ekiro, binsaalize muno.”

²⁰Baitu banyakatagara abakuru n'abahanuuzi bakasoonasoona abantu kusaba Baraaba, baite Yesu.

²¹Omulemi omukuru yabakaguza ati: “Hali banu bombi, nimwenda mbalekerre oha?” Baamugarukamu bati; “Baraaba.”

²²Nandiki Pilaato ati: “Kandi Yesu arukwetwa Kristo, mmukole ki?” Nukwo boona kugarukamu bati; “Abambwe ha musaraba!”

²³Omulemi yabakaguza ati: “Habwaki? Akozire kibi ki?” Baitu bbo baatokera haiguru kukiraho bati: “Abambwe ha musaraba!”

²⁴Pilaato obu yarozire nayejwahiza busa, kandi nkooku harukwija kubaho akajagarro, yakwata amaizi, yanaaba omu ngaro boona nibarora, naagamba ati: “Nyowe tindukujunaanwa sagama y'omuntu onu ahikiriire, ebi bigambo byanyu.”

²⁵Abantu boona nukwo kugarukamu bati: “Esagama ye ebe hali itwe na ha baana baitu!”

²⁶Nubwo yabalekerra Baraaba, kandi yaragira babanze bateere Yesu enkoba, hanyuma yamuhayo kubambwa ha musaraba.

²⁷Nubwo abaserikale b'omulemi omukuru baatwaire Yesu omunju erukwetwa kibbira, ekihanda kyabu kyona kyamwesoroolezaaho.

²⁸Baamujuura ebijwaro bye, baamujweka orugoye orurukugaajuka.

²⁹Baaruka ekondo y'amahwa, baagimuta ha mutwe, baamukwasa orubingo omu mukono gw'obulyo. Baateeza amaju omumaiso ge nibamuteerra enaku bati? “Hangiriza, Omukama w'Abayudaaya!”

³⁰Baamucwera ebicwanta, baamwihaho orubingo, baarumuteeza ha mutwe.

³¹Obu baamazire kumuterra enaku, baamujuura orugoye orurukugaajuka, baamujweka ebijwaro bye, baamutwara kumubamba ha musaraba.

³²Obu bakaba nibagenda, baatangana omusaija owa Kireene, ibara lye Simooni, baamuhambiriza okwetwekeraho Yesu omusaraba.

³³Obu baahikire omu kiikaro ekirukwetwa Gologota (ekirukumanyisa ngu: kiikaro ky'oruhanga),

³⁴baaha Yesu eviini etabwirwemu omubazi, aginywe; baitu obu yarolezeeho, yayanga kuginywa.

³⁵Abaserikale obu baamazire kumubamba, baabagana ebijwaro bye nibabitera itomo;

³⁶baikarra hansi bamuroleriire.

³⁷Kandi haruguru y'omutwe gwe, bakataho ekihandiiko ky'omusango gwe ekirukugamba kiti: “Onu nuwe Yesu, Omukama w'Abayudaaya.”

³⁸Akabambwa hamu n'abahuura babiri, omu ha mukono gwe ogw'obulyo, n'ondi ha gw'emoso.

³⁹Kandi abo abakaba nibahingura baamujuma, nibacwa emitwe yabo,

⁴⁰nibagamba bati; “Iwe ayagondeze kuseesa Enju ya Ruhanga, okagaruka kugyombekera ebiro bisatu wejune wenka! Obu oraaba oli Mwana wa Ruhanga, wehanuule ha musaraba.”

⁴¹Baanyakatagara abakuru, n'abeegesa b'ebiragiro, hamu n'abakuru b'abantu, nabo nukwo baamujumire bati:

⁴²“Akajuna abandi, baitu tasobora kwejuna wenka, kunu nuwe Omukama wa Isirairi. Hati ayehanuule ha musaraba, nukwo na itwe tumwikirize.

⁴³Ayesiga Ruhanga, leka Ruhanga amujune hati, obu araaba naamugonza; habwokuba akagamba ati: ‘Ndi Mwana wa Ruhanga.’”

⁴⁴Kandi abahuura abaabambirwe nawe, nabo nukwo baamujumire bati.

⁴⁵Okuruga esaaha mukaaga okuhika esaaha mwenda ensi yoona ekaswekwa omwirima.

⁴⁶Kandi ha saaha nka mwenda, Yesu yayamuza n'iraka likooto ati: “Eli, Eli lama sabakatani?” Amakuru gaakyo ngu: “Ruhanga wange, Ruhanga wange, ondugiireho ki?”

⁴⁷Abamu ha basungi, obu baahuliire eki, nukwo kugamba bati: “Omusaija onu naayeta Eriya.”

⁴⁸Ahonaaho omu halibo yairuka yaleeta ekijumankuba yakiibika omu marwa agasaaliire, yakita ha rubingo, yamuha anyunyuguze.

⁴⁹Baitu abandi baagamba bati; “Ka turole Eriya nkooku araija kumujuna.”

⁵⁰Baitu Yesu yagaruka yayamuliza haiguru, yacwekana.

⁵¹Ahonaaho enyigamo y'omunju ya Ruhanga yatemukamu habiri, okuruga eruguru okuhika hansi; ensi yatengeeta, n'emyandara yayatika;

⁵²ebituuro byayesama, emitumbi nyingi ey'abahikiriire abakaba bagwijagire yahumbuurwa.

⁵³Abaarugire omu bituuro Yesu amazire kuhumbuuka, bakagenda omu rubuga orurukwera baabonekera baingi.

⁵⁴Mukuru w'abaserikale n'aba akaba ainabo nibalinda Yesu, obu baahuliire omusisa, nibarora n'ebyabaireho byona, baatiina muno nibagamba bati: “Mazimakwo, onu abaire Mwana wa Ruhanga!”

⁵⁵Hakaba haroho n'abakazi baingi abaarugire Galiraaya bahondiire Yesu nibamuheereza, beemeriire haraho nibarora;

⁵⁶omuli bo hakaba harumu Mariya Magadaleena, Mariya nyina Yakobbo na Yosefu, kandi na nyina batabani ba Zebedaayo.

⁵⁷Obwire obu bwahikire rwebagyo, hakaija omusaija omuguuda owa Alimateya, ibara lye Yosefu, nawe akaba ali mwegesebwa wa Yesu.

⁵⁸Akagenda hali Pilaato, yamusaba omutumbi gwa Yesu. Pilaato yaragira bagumuhe.

⁵⁹Yosefu yatwara omutumbi, yaguzinga omu rugoye rwa bafuta,

⁶⁰yaguta omu kituuro ekihyaka eki akaba ayebaiziire omu mwandara; yakumbya ibaale likooto, yaigara omunwa gw'ekituuro, yagenda.

⁶¹Mariya Magadaleena na Mariya ondi bakaba baroho, baikaliire baroleriire ekituuro.

⁶²Obwire obu bwakiire, nikyo kiro ekyakuraatiire ekiro ky'Okweteekaniza, banyakatagara abakuru n'Abafalisaayo baayesorooleza hali Pilaato

⁶³baagamba bati; “Waitu, nitwijuka omubiihi w'ebisuba ogu, obwakaba akyali mwomeezi, akagamba ati: ‘Obu halihinguraho ebiro bisatu, ndihumbuuka.’

⁶⁴Nahabweki, ragira balindire kimu ekituuro okuhika ha kiro kya kasatu, obw'olyaho abeegesebwa be tibaikara kwija bakaiba omutumbi gwe, hanyuma bakagambira abantu bati: ‘Ahumbuukire omu bafu’, kandi okuhaba okwa hanyuma nikwija kukira okw'okubanza obubi.”

⁶⁵Pilaato yabagarukamu ati; “Mwina abalinzi, mugende mukirinde nkooku murukusobora.”

⁶⁶Baagenda, baagumya ekituuro; ibaale balitaho emanyikirizo, baataho n'abalinzi.