Read Runyoro - rutooro Mat 28 Bible Online

Mat 28 - Runyoro - rutooro bible

Mat 28

¹Sabbato ekahwaho, kandi nyenkya omu rukyakya, ha Sande, Mariya Magadaleena na Mariya ondi bakagenda ha kituuro.

²Hakabaho omusisa gw'amaani, habwokuba malaika wa Ruhanga akasirimuka yaruga omu iguru, yaija yakumbya ibaale lya ha munwa gw'ekituuro, yaliikarraho.

³Amaiso ge gakaba nigangasana nk'omurabyo kandi ebijwaro bye bikaba nibyeera nk'ebirika.

⁴Abalinzi habw'okumutiina, bakatukumira, baagwa, baasisana nk'abafiire.

⁵Baitu malaika yagambira abakazi ati: “Mutatiina; habwokuba mmanyire nkooku murukuserra Yesu ayabambirwe ha musaraba.

⁶Hanu taroho; ahumbuukire nkooku yagambire. Mwije murole nambere bakaba bamutaire.

⁷Hati mugende bwango, mugambire abeegesebwa be nkooku ahumbuukire kandi naija kubabanza kuhika Galiraaya; oku nuho mulimurorra. Hati mmazire kubagambira.”

⁸Bbo baaruga bwango ha kituuro baina obutiini hamu n'omuhimbo mwingi, bairuka kugambira abeegesebwa be.

⁹Nubwo Yesu yabatangaine yabaramukya ati: “Mirembe!” Baamwirra haihi, baamukwata ebigere, baamuramya.

¹⁰Aho Yesu yabagambira ati: “Mutatiina, irooko mugambire bagenzi bange bagende Galiraaya; oku nuho balindorra.”

¹¹Abakazi abo obu bakaba nibakyarugaho, abamu ha balinzi bakagenda omu rubuga kugambira abanyakatagara byona ebyabaireho.

¹²Baanyakatagara obu baayesoroize kuhanuura hamu n'abakuru b'abantu, nubwo baahaire abalinzi sente,

¹³baabateererra bati; “Mugambire abantu ngu: ‘Abeegesebwa be baizirege ekiro obu tubaire tugwijagiire, baamwiba, baamutwara.’

¹⁴Kandi kinu omulemi omukuru obu araakihurra, nitwija kumunanura, nukwo na inywe tubaihe omu kabi.”

¹⁵Abalinzi baatwara sente, baakora nkooku baahanuliirwe; amakuru ago gakararanga omu Bayudaaya n'okuhika hati hoona!

¹⁶Omu kasumi ako, abakwenda ikumi n'omu bakagenda Galiraaya, ha rusozi Yesu oru akaba abagambireho.

¹⁷Obu baamurozire, baamuramya; baitu abandi baafuberra.

¹⁸Yesu yairra haihi, yabagambire ati: “Nkaheebwa obusobozi bwona omwiguru n'omunsi.

¹⁹Nahabweki mugende, muhindule abantu ab'omu mahanga goona beegesebwe, nimubabatiza omu ibara lya Isiitwe, n'erya Mwana, n'erya Mwoyo Ahikiriire,

²⁰mubeegese okukwata byona ebi naabaragiire. Mumanye nkooku ndi na inywe ebiro byona okuhika ha mpero.”