Read Runyoro - rutooro Mat 3 Bible Online

Mat 3 - Runyoro - rutooro bible

Mat 3

¹Omu biro ebi, Yohaana Omubatiza akaija naarangirra omwirungu lya Buyudaaya,

²naagamba ati: “Mwegarukemu, habwokuba obukama bw'omwiguru buli haihi.”

³Nuwe ogu omurangi Isaaya ou yagambireho ati: “Iraka ly'ogu arukwamiira omwirungu ati: Muteekanirize MUKAMA omuhanda, mutereekereze obuhanda bwe.”

⁴Yohaana ogu yajwaraga ekijwaro ky'ebyoya by'engamiya, yayeteegesaaga orukoba rw'oruhu; kandi yalyaga enzige n'obwoki bw'enjoki ez'omwirungu.

⁵Abantu baarugaga Yerusaalemu n'omu isaza lyona erya Buyudaaya n'omunsi eziheriire ekisaaru Yorudaani, nibaija nambere ali.

⁶Yababatirizaaga omu kisaaru Yorudaani nibaatura ebibi byabu.

⁷Yohaana obu yarozire Abafalisaayo baingi n'Abasadukaayo nibaija kubatizibwa, yabagambira ati: “Inywe abaana b'enjoka! Nooha ayabahabwire kwiruka obukaya bwa Ruhanga obutagarukirra?

⁸Mukole ebikorwa ebirukwoleka nkooku mwegarukiremu.

⁹Muleke kwesigura muti: ‘Twina isenkuru itwe Abburahamu’; baitu nimbagambira nti: Amabaale ganu, Ruhanga asobora kugaihiramu Abburahamu abaijukuru.

¹⁰Nangwa na hati endemu etairwe ha bikoro by'emiti. Omuti gwona ogutarukwana bijuma ebirungi nigwija kutemwa, gunagwe omu murro.

¹¹“Nyowe nimbabatiza n'amaizi habw'okwegarukamu, baitu ogu arukwija enyuma, nankiza obusobozi, kandi tinsemeriire n'okumukwatiraho enkaito ze; uwe alibabatiza na Mwoyo Ahikiriire n'omurro;

¹²kandi akwasire orugali rwe kuhehemukya, naija kusingorra orubuga rwe, nukwo ahunike oburo omu nguli ye, kandi ebisunga abyokye omu murro ogutaraara.”

¹³Nubwo Yesu yarugire Galiraaya, yagenda Yorudaani kubatizibwa Yohaana.

¹⁴Baitu Yohaana yagonza kumwangirra naagamba ati: “Nyowe ninyetaaga ombatize, kandi iwe noija hali nyowe?”

¹⁵Baitu Yesu yamugarukamu ati: “Hati iwe ikiriza tukole tuti, nukwo tuhikirize byona Ruhanga ebi arukutugondeza.” Aho Yohaana yaikiriza.

¹⁶Yesu obu yamazire kubatizibwa, ahonaaho yaruga omu maizi, iguru lyakinguka, yarora Mwoyo wa Ruhanga naamusirimukaho omu kisisani ky'eriiba, naamwijaho;

¹⁷n'iraka lyaruga omwiguru nirigamba liti: “Ogu nuwe Mwana wange omugonzibwa ou nsiima muno.”