Read Runyoro - rutooro Mat 4 Bible Online

Mat 4 - Runyoro - rutooro bible

Mat 4

¹Nubwo Yesu yatwarwa Mwoyo omu irungu okwohebwa Sitaani.

²Obu yamazire ebiro makumi ana nyamusana n'ekiro atarukulya kantu, enjara yamuruma.

³Aho omwohi yamwizira yamwohya ati: “Obu oraaba oli Mwana wa Ruhanga, ragira amabaale ganu gafooke byokulya.”

⁴Yesu yamugarukamu ati: “Kikahandiikwa kiti: ‘Omuntu taba mwomeezi habw'ebyokulya byonka, baitu aba mwomeezi habw'ekigambo kyona ekiruga omu kanwa ka Ruhanga.’ ”

⁵Aho Sitaani yamutwara omu rubuga orurukwera, yamuta ha kasu k'Enju ya Ruhanga,

⁶yamugambira ati: “Obu oraaba oli Mwana wa Ruhanga, wesimbe hansi; habwokuba kikahandiikwa kiti: ‘Alikukwasa bamalaika be’, kandi kiti: ‘Bakukwatirre omu mikono yabo, oleke kuteera ekigere kyawe ha ibaale’.”

⁷Yesu yamugarukamu ati: “Kandi kikahandiikwa kiti: ‘Otalyohya MUKAMA Ruhanga waawe’.”

⁸Sitaani yayongera yamutwara ha rusozi oruraihire muno, yamwoleka obukama bwona obw'omu nsi n'ekitiinisa kyabwo.

⁹Yamugambira ati: “Binu byona ndaabikuha kakuba oteeza amaju okandamya.”

¹⁰Yesu yamugarukamu ati: “Rugaho Sitaani! Habwokuba kikahandiikwa kiti: ‘Oramyege MUKAMA Ruhanga waawe, kandi nuwe oheerezeege wenka’.”

¹¹Nubwo Sitaani yamurugaho, bamalaika baija baamuheereza.

¹²Yesu obu yahuliire Yohaana nkooku akwasirwe, yarugayo yagaruka Galiraaya.

¹³Obu yarugire Nazareeti, akagenda yaikara Kafaranaumu, orubuga oruli ha musa gw'enyanja, omu nsi ya Zebbuluuni na Nafutaali.

¹⁴Nukwo ekyagambirwe omurangi Isaaya kihikirre kiti:

¹⁵“Ensi ya Zebbuluuni n'eya Nafutaali, ha bukiizi bw'enyanja, nseeri ya Yorudaani, omu Galiraaya y'Abanyamahanga,

¹⁶abantu abakaba bali omu mwirima, bakajwerwa omusana mwingi, nabo abaikaraga omunsi y'ekiituuru ky'okufa emamba ekabasarra.”

¹⁷Kuruga omu kasumi ako, Yesu yatandika kwegesa naagamba ati: “Mwegarukemu, habwokuba obukama bw'omu iguru bwiriire haihi.”

¹⁸Yesu obu akaba naaraba ha musa gw'enyanja ya Galiraaya, yarora nyineemu babiri, Simooni arukwetwa Petero n'owanyina Andereya, nibanaga akatimba omu nyanja; habwokuba bakaba bali basohi.

¹⁹Yabagambira ati: “Mumpondere, ndibafoora basohi b'abantu.”

²⁰Ahonaaho baasiga obutimba bwabo baamuhondera.

²¹Obu yagenzireho omumaiso kake, yarora banyineemu abandi babiri, Yakobbo na Yohaana, batabani ba Zebedaayo, bali omu bwato hamu na isebo Zebedaayo nibasumiikaniza obutimba bwabo. Nabo Yesu yabeeta.

²²Ahonaaho baasiga obwato bwabo na isebo, baamuhondera.

²³Yesu akagendagenda omu Galiraaya yoona, naayegesa omu masorrokaniro gaabo, naarangirra Amakuru Amarungi ag'obukama bwa Ruhanga, kandi naakiza buli ndwara n'obusaasi bwona obw'abantu.

²⁴Yaranganwa omu Siriya yoona, baamuleetera abarwaire boona abakaba bakwasirwe endwara n'obusaasi obutali bumu, abakwasirwe emyoyo emibi, abagu b'ensimbo, n'abazingamire; yabakiza.

²⁵Ebitebe by'abantu baingi bakamuhondera nibaruga Galiraaya, n'omu Mbuga Ikumi ezeeteraine, Yerusaalemu, Buyudaaya, na nseeri ya Yorudaani.