Read Runyoro - rutooro Mat 5 Bible Online

Mat 5 - Runyoro - rutooro bible

Mat 5

¹Yesu obu yarozire ebitebe by'abantu, yatemba orusozi, yaikarra hansi, nukwo abeegesebwa be kwija nambere ali,

²yatandika kubeegesa ati:

³“Baina omugisa abeemanya nkooku bali banaku omu mwoyo, habwokuba obukama bw'omwiguru bwabo.

⁴Baina omugisa abarukuganya, habwokuba Ruhanga alibahuumuza.

⁵Baina omugisa abaculeezi, habwokuba baligweterwa ensi.

⁶Baina omugisa abarukurumwa enjara bakakwatwa n'iroho habw'obuhikiriire, habwokuba baliiguta.

⁷Baina omugisa ab'embabazi, habwokuba baligirirwa embabazi.

⁸Baina omugisa ab'emitima esemiire, habwokuba balirora Ruhanga.

⁹Baina omugisa abanyakuteeraniza abantu omu businge, habwokuba balyetwa baana ba Ruhanga.

¹⁰Baina omugisa abahiiganizibwa habw'obuhikiriire, habwokuba obukama bw'omwiguru bwabo.

¹¹Inywe mwina omugisa abantu obu baraabajumaga, obu baraabahiiganizaaga kandi bakabahangirra ebintu ebibi byona habwange.

¹²Musemererwe, mukyanganuke, habwokuba empeera yanyu nyingi omu iguru; nukwo baahiiganiize bati abarangi abaabandize inywe.”

¹³“Inywe muli kisura ky'ensi; kakuba ekisura kihoibwamu orusa, orusa oru ruligarurwamu ruta? Kiba kitakyagasa, kisigaliire kunagwa n'okurubaatirirwa abantu.

¹⁴“Inywe muli kyererezi ky'ensi. Orubuga orwombekerwe ha rusozi tirusobora kuserekwa.

¹⁵Busaho muntu ahemba etaara akagijuumikira ekigega, baitu bagita ha kikondo, nukwo emulikire abantu boona abali omu nju.

¹⁶Ekyererezi kyanyu nukwo kimulikire kiti abantu, barole ebikorwa byanyu ebirungi, bakugize Isiinywe ow'omu iguru.”

¹⁷“Mutateekereza ngu, nkaija kwihaho Ebiragiro n'abarangi. Ebi ntaije kubiihaho, baitu nkaija kubihikiriza.

¹⁸Mazimakwo nimbagambira nti: Iguru n'ensi bitakahoireho, busaho enyuguta n'emu ey'omu Biragiro noobu kaakuba kacweka kaayo akaliihwamu, okuhika byona obu birikahikirra.

¹⁹Nahabweki weena anyakucwa ekimu ha biragiro binu ebike, kandi akeegesa abandi kubicwa, alyetwa muto omu bukama bw'omwiguru; kandi weena anyakubikwata akabyegesa abandi, alyetwa mukuru omu bukama bw'omwiguru.

²⁰Baitu nimbagambira nti: Obuhikiriire bwanyu obu butalikira obw'abeegesa b'ebiragiro n'obw'Abafalisaayo timulitaaha omu bukama bw'omwiguru.”

²¹“Mukahurra aba ira nkooku baagambiirwe bati: ‘Otaliita; weena anyakwita w'okusingwa omusango’.

²²Baitu nyowe nimbagambira nti: Weena anyakubiihirirwa mugenzi we ali w'okusingwa omusango; weena anyakujuma mugenzi we alitwarwa omu rukurato; kandi weena anyakweta mugenzi we ati: ‘Kidoma we!’ Ogu alinagwa omu kiinongoro ky'omurro.

²³Habweki, kakuba oba noohayo ekisembo kyawe ha itambiro, okaijuka nkooku mugenzi waawe aina eki arukukujunaana,

²⁴siga aho ekisembo kyawe omu maiso g'itambiro, genda obanze ogarukanganemu nawe, nubwo ogaruke ohonge ekisembo kyawe.

²⁵“Garukanganamu bwango n'ogu arukujunaana, atakakuhikize omu bulemi; nukwo aleke kukunyegerra hali omucwi w'emisango, n'omucwi w'emisango akakukwasa omuserikale, kandi omuserikale akakuta omu nkomo.

²⁶Mazimakwo nyowe ninkugambira nti: Tolirugamu okuhika obu olikasasurra kimu akasente koona.”

²⁷“Mukahurra nkooku kyagambirwe kiti: ‘Otalisiihana’.

²⁸Baitu nyowe nimbagambira nit: Weena ogu arora omukazi akamwegomba, buli omu mutima gwe aba asiihaine nawe.

²⁹Eriiso lyawe ery'obulyo kakuba nirikuleetereza kusiisa, liihemu olinage; haakire ofeerwe orugingo rumu orw'omubiri gwawe, kukira omubiri gwona kunagwa omu kiinongoro ky'omurro.

³⁰Kandi omukono gwawe ogw'obulyo kakuba gukuleetereza kusiisa, gutemeho ogunage; haakire ofeerwe orugingo rumu orw'omubiri gwawe, kukira iwe weena kugenda omu kiinongoro ky'omurro.”

³¹“Kandi kikagambwa kiti: ‘Omuntu weena obu abingira kimu mukazi we, amuhe ebbaruha erukwoleka nkooku amubingire.’

³²Baitu nyowe nimbagambira nti: Omusaija kakuba abingira kimu mukazi we, atarukusigikira ha busiihani, nuwe aba amuleeteriize kusiihana obu aswerwa handi; n'omusaija anyakuswera omukazi ayabingirwe, nawe aba asiihaine.”

³³“Mukagaruka mwahurra nkooku abantu ba ira bagambiirwe bati: ‘Otalirahirra busa, baitu eki orahiriire MUKAMA okihikirizeege!’

³⁴Baitu nyowe nimbagambira nti: Mutalirahira naakake konka, noobu lyakuba iguru, habwokuba nikyo kitebe kya Ruhanga;

³⁵rundi ensi, habwokuba nuko akatebe k'ebigere bye; rundi Yerusaalemu, habwokuba nurwo orubuga rw'Omukama omukuru.

³⁶Noobu kwakuba okurahira omutwe gwawe, habwokuba tosobora kuhindura akasoke kamu kuba akarukwera rundi akarukwiragura.

³⁷Leka ekigambo kyawe ‘Ego’ kiikale kiri ‘Ego’, rundi ‘Nangwa’ kiikale kiri ‘Nangwa?’; Ebirukukira hali ebi biruga hali Omubi.”

³⁸“Mukahurra nkooku kyagambirwe kiti: ‘Eriiso lirehwe eriiso, n'eriino lirehwe eriino.’

³⁹Baitu nyowe nimbagambira nti: mutalyeholerra enzigu. Omuntu obu araakuteeraga oruhi ha rusaya rw'obulyo, omuhindurre n'orundi.

⁴⁰Omuntu kakuba nakunyegerra habw'esaati, leka atwale n'ekooti.

⁴¹Kakuba omuntu naakuhambiriza kugenda nawe kilomita emu, genda nawe n'eya kabiri.

⁴²Omuntu kakuba akusaba, omuhe; kakuba akwohoza, otalimwangirra.”

⁴³“Mukahurra nkooku kyagambirwe kiti: ‘Ogonzeege mutaahi waawe kandi onobege omunyanzigwa waawe’.

⁴⁴Baitu nyowe nimbagambira nti: Mugonzeege abanyanzigwa banyu, kandi musabirege abarukubahiiganiza,

⁴⁵nukwo mube baana ba Isiinywe ali omu iguru, habwokuba ajwisiza omusana ababi n'abarungi, kandi anagira enjura abahikiriire n'abatali bahikiriire.

⁴⁶Obu muraaba nimugonza abarukubagonza, mulitunga mpeera ki? N'abasorooza b'omusoro tinukwo bakora bati?

⁴⁷Obu muraaba nimuramukya bagenzi banyu bonka, abandi nimubakizaaho ki? N'Abanyamahanga tinukwo bakora bati?

⁴⁸Habweki mube bahikiriire nka Isiinywe ow'omu iguru oku ahikiriire.”