Read Runyoro - rutooro Mat 6 Bible Online

Mat 6 - Runyoro - rutooro bible

Mat 6

¹“Mwerinde, muleke kukora ebikorwa byanyu ebirungi omu maiso g'abantu ngu, babarole. Obu muraakora muti, Isiinywe ow'omwiguru talibaha mpeera.

²“Habweki obu oraagabiraga omuseege, leka kukirangaaniza nk'abagobya oku bakora omu masorrokaniro n'omu mihanda, nukwo abantu babanyumize. Mazimakwo nimbagambira nti: Abo bamazire ira kutunga empeera yabu.

³Baitu obu oraagabiraga omuseege, omukono gwawe ogw'emoso guleke kumanya omukono gw'obulyo eki gurukukora.

⁴Okugaba kwawe kubege kw'ensita; kandi So anyakurora ensita alikuha empeera.”

⁵“Obu muraabaga nimusaba Ruhanga, mulekege kuba nk'abagobya; habwokuba bbo bagonza kusaba beemeriire omu masorrokaniro n'omu ntangatangano z'emihanda, nukwo abantu babarole. Mazimakwo nimbagambira nti: Abo baamazire ira kutunga empeera yabo.

⁶Baitu obu oraabaga noosaba, otaahege omu kisiika kyawe, oyekingiremu, nukwo osabe Sso atarukurorwa; kandi Uwe anyakurora ensita alikuha eky'osabire.

⁷“Obu muraabaga nimusaba muleke kukanyisa ebigambo nkooku Abanyamahanga bakora, nibateekereza ngu, Ruhanga araabahurra habw'ebigambo byabo ebingi.

⁸Muleke kusisana nk'abo, habwokuba Isiinywe amanyire ebi mwetaaga noobu muba mutakamusabire.

⁹Nahabweki musabege muti: Isiitwe ali omwiguru, ibara lyawe litiinwe,

¹⁰obukama bwawe bwije, ebi ogonza bikorwe omunsi nkooku bikorwa omwiguru.

¹¹Otuhe hati ebyokulya byaitu ebya buli kiro;

¹²otuganyire ebibi byaitu nka itwe oku tuganyira abatukora kubi;

¹³otatuleka tukoohebwa baitu otujune omu bubi.[1]

¹⁴ Obu muraaganyiraga abantu ensobi zaabo, na inywe Isiinywe ow'omwiguru alibaganyira;

¹⁵baitu obu mutaganyira abantu ensobi zaabo, na inywe Isiinywe talibaganyira ezanyu.”

¹⁶“Obu muraabaga nimusiiba, muleke kwoleka obujune ha maiso nk'abagobya oku bakora, nukwo abantu babamanyirre nkooku barukusiiba. Mazimakwo nimbagambira nti: Abo bamazire kutunga empeera yabo.

¹⁷Baitu inywe obu muraabaga nimusiiba, munaabege ha maiso, mwesiige amagita,

¹⁸nukwo abantu baleke kubamanyirra nkooku murukusiiba; baitu mumanywe Isiinywe wenka atarukurorwa. Kandi Isiinywe anyakurora eby'ensita alibaha empeera.”

¹⁹“Mutalyeyahurra itungo omunsi, erirukusiiswa enkugutu n'obumomi, kandi abasuma nambere barukucwa bakaiba.

²⁰Baitu mweyahurrege itungo omwiguru, nambere litasobora kusiiswa enkugutu n'obumomi, kandi abasuma nambere batarukucwa bakaiba.

²¹Habwokuba itungo lyanyu nambere liri, oku nuho emitima yanyu eraikaraga.”

²²“Eriiso niyo taara y'omubiri. Habweki eriiso lyawe obu liraaba nirihweza kurungi, omubiri gwawe gwona guhwereza kimu;

²³baitu eriiso lyawe obu liba litarukuhweza, omubiri gwawe gwona guswekwa omwirima. Okuhweza okuli omuli iwe kakuba kufooka mwirima, omwirima ogu guraingana ha!”

²⁴“Tiharoho anyakusobora kuheereza abakama babiri. Alinobaho omu agonze ondi, rundi aligumira hali omu agaye ondi. Timusobora kuheereza Ruhanga n'okwemarra ha itungo ly'ensi.

²⁵“Nikyo ndukubagambirra nti: Mutalitunturra obwomeezi bwanyu eki muraalyaga rundi eki muraanywaga rundi omubiri gwanyu eki muraajwaraga. Obwomeezi tibuli bw'omuhendo kukira ebyokulya? N'omubiri tiguli gw'omuhendo kukira ebyokujwara?

²⁶Murole enyonyi ez'omu mwanya; tizisiga, tizigesa, kandi tizihunika, baitu Isiinywe ow'omu iguru aziriisa. Inywe timuli b'omuhendo okukira enyonyi ezi?

²⁷Nooha omuli inywe, noobu atuntura ata, arukusobora kwongera akasumi kake ha bwomeezi bwe?

²⁸“Habwaki nimutunturra ebyokujwara? Murorre ha byakyo by'omu kisaka nkooku bikura, tibikora mulimo kandi tibyongosa.

²⁹Baitu nimbagambira nti: Noobwakubaire Solomoni omu kitiinisa kye kyona, atajwale kurungi okwingana ekimu ha byakyo binu.

³⁰Ruhanga obu araaba ajweka ati obunyansi bw'omu kisaka oburoho hati, nyenkya bukanagwa omu kikoomi, talikiraho muno kujweka inywe abaina okwikiriza kuke?

³¹Habweki muleke kutuntura ngu: ‘Turaalya ki?’ Rundi ‘Turaanywa ki?’ Rundi ‘Turaajwara ki?’

³²Habwokuba ebintu nk'ebi Abanyamahanga nibyo baitanira. Isiinywe ow'omwiguru amanyire binu byona nkooku murukubyetaaga.

³³Baitu mubanze muserre obukama bwe n'obuhikiriire bwe, n'ebi byona biribongerwaho.

³⁴“Nahabweki, mulekege kutunturra ebya ijo; ekiro kya ijo kiryetunturra kyonka. Leka buli kiro kihwe n'omutalibano gwakyo.”