Read Runyoro - rutooro Mat 7 Bible Online

Mat 7 - Runyoro - rutooro bible

Mat 7

¹“Mutalicwa emisango, na inywe timuligicwerwa;

²habwokuba nkooku mucwera abandi emisango, na inywe nukwo muligicwerwa; n'endengo ei mulengesa, na inywe niyo mulirengerwamu.

³Habwaki noorora akahoiga akali omu liiso lya mugenzi waawe, otarukurora empinju enyakuli omu liiso lyawe?

⁴Kandi noosobora ota kugambira mugenzi waawe oti: ‘Kankutokoole akahoiga akakuli omu liiso,’ kandi kunu empinju eri omu lyawe?

⁵Ngobya iwe, banza oihe empinju enyakuli omu liiso lyawe, nukwo osobole kuhweza n'okutokoora mugenzi waawe akahoiga akamuli omu liiso.

⁶“Mutaliha embwa ekintu ekirukwera; kandi mutalinagira empunu eruuru zanyu z'omuhendo, zikazirubatirra; hanyuma zikabahindukira kubarwanisa.”

⁷“Musabe muraaheebwa; muserre muraazoora; mwerange muraakingulirwa.

⁸Habwokuba weena anyakusaba aheebwa, anyakuserra azoora, anyakweranga akingulirwa.

⁹Muzaire ki omuli inywe, kakuba omwana we amusaba omugaati amuha ibaale?

¹⁰Kakuba amusaba encu amuha enjoka?

¹¹Inywe ababi, obu muraaba nimumanya kuha abaana banyu ebisembo ebirungi, Isiinywe ow'omwiguru talikiraho kuha ebirungi abo abarukumusaba:

¹²Ebi mwenda abantu babakorre, na inywe nibyo mubakorrege. Egi niyo nyegesa yoona ey'Ebiragiro n'abarangi.”

¹³“Murabe omu irembo erifunzire, habwokuba irembo erigalihire n'omuhanda ogurukwanguha nibyo bitwara omu kuhwerekerra, kandi abalimu baingi.

¹⁴Ningira irembo erifunzire n'omuhanda ogw'obulemeezi nibyo bitwara omu bwomeezi, kandi ababizoora bake.”

¹⁵“Mwerinde abarangi b'ebisuba abaija nambere muli nibeesisaniza nk'entaama, kandi kunu omu nda myaga emikatuzi.

¹⁶Mulibamanyira ha bikorwa byabo. Emizaabbibbu baginoga ha makerre rundi emitini ha ngando?

¹⁷Omuti omurungi gwana ebijuma ebirungi, kandi omuti omubi gwana ebijuma ebibi.

¹⁸Omuti omurungi tigusobora kwana ebijuma ebibi, kandi omuti omubi tigusobora kwana ebijuma ebirungi,

¹⁹baitu gutemwa, gunagwa omu murro.

²⁰Nahabweki mulibamanyira ha bikorwa byabo.”

²¹“Omuntu weena anyakungambira ati: ‘MUKAMA wange, MUKAMA wange,’ tinuwe alitaaha omu bukama bw'omu iguru; baitu ogu anyakukora Isenyowe ow'omwiguru ebi agonza.

²²Ha kiro eki, baingi balingambira bati: ‘MUKAMA waitu, MUKAMA waitu, titwarangaga omu ibara lyawe? Titwabingaga emyoyo emibi omu ibara lyawe? Titwakoraga ebyamahano bingi omu ibara lyawe?’

²³Obu nubwo ndibaaturra bbwa nti: ‘Tinkabamanyaga. Mundugeho, inywe enkozi z'ebibi!’ ”

²⁴“Omuntu weena anyakuhurra ebigambo byange binu, akabihikiriza, naasisana nk'omuntu omwetegereza ayayombekere enju ye ha mwandara.

²⁵Enjura ekagwa, emigezi yatenta, n'ekiyaga kyateera enju egi, baitu etagwe, habwokuba ekaba eyombekerwe ha mwandara.

²⁶Kandi omuntu weena anyakuhurra ebi ndukugamba atarukubihikiriza, alisisana nk'omuntu omudoma ayayombekere enju ye ha musenyi.

²⁷Enjura ekagwa, emigezi yatenta, n'ekiyaga kyateera enju egi; yagwa, yasingookera kimu!”

²⁸Yesu obu yamazire kugamba ebigambo ebi, ebitebe by'abantu bikahunirizibwa omulingo yabeegesezeemu,

²⁹habwokuba akabeegesa nk'anyakwina obusobozi, atarukusisana nk'abeegesa baabu ab'ebiragiro.