Read Runyoro - rutooro Mat 8 Bible Online

Mat 8 - Runyoro - rutooro bible

Mat 8

¹Yesu obu yasirimukire orusozi, ebitebe bingi bikamuhondera.

²Omugenge akaija nambere ali, yateeza amaju omu maiso ge naagamba ati: “MUKAMA wange, obu oraaba noogonza, noosobora kunkiza.”

³Yesu yagorra omukono, yamukwataho naagamba ati: “Ego, ningonza, kira.” Ahonaaho ebigenge bye byakira.

⁴Yesu yamugambira ati: “Otakisura okagambiraho muntu n'omu; baitu genda oyeyoleke nyakatagara, ohonge ekihongwa Musa eki yaragiire, bube bwakaiso hali abantu nkooku okiziibwe.”

⁵Yesu obu yataahire omu Kafaranaumu, omukuru w'ekihanda ky'ab'amahe, Omuroma, yaija nambere ali, yamwesengereza

⁶naagamba ati: “Waitu, omuheereza wange abyamire omu ka azingamire, naasaasa muno.”

⁷Yesu yamugambira ati: “Ka nyije, mmukize.”

⁸Baitu mukuru w'ekihanda ky'abamahe yamugarukamu ati: “MUKAMA wange, tinsemeriire kukutaahya omwange; baitu gamba ekigambo kyonka, omuheereza wange araakira.

⁹Habwokuba na nyowe ndi muntu arukulemwa; nyina n'abaserikale aba ndukulema. Obu ndagira omu nti: ‘Genda’, agenda; n'ondi nti: ‘Ija’, aija; n'obu ndagira omuheereza wange nti: ‘kora kinu’, akikora.”

¹⁰Yesu obu yamuhuliire, yahunirra, yagambira abakaba bamuhondiire ati: “Mazimakwo nimbagambira nti: Tinkaroraga muntu n'omu omu Isirairi anyakwina okwikiriza nk'oku.

¹¹Nimbagambira nti: Baingi baliruga Burugaizooba na Bugwaizooba, baikarre kulya hamu na Abbrahamu, Isaaka, na Yakobbo omu bukama bw'omu iguru

¹²baitu abaana b'obukama balibingirwa aheeru omu mwirima, nambere abantu baliririrra kandi bakanena ensaya.”

¹³Yesu nubwo yagambiire mukuru w'ekihanda ky'ab'amahe ati: “Genda; kikukolerwe nkooku oikiriize.” Kandi omu kasumi ako konyini omuheereza we yakira.

¹⁴Yesu obu yataahire omunju ya Petero, yasanga nyinazaara abyamire, arwaire omuswija;

¹⁵yamukwata ha mukono, omuswija gwakira, yaimuka, yatandika kumuheereza.

¹⁶Rwebagyo, izooba obu lyagwire, bakaleetera Yesu abantu baingi abakaba bakwasirwe emyoyo emibi; yagibinga n'ekigambo kye, kandi yakiza boona abakaba barwaire.

¹⁷Kinu kikahikiriza omurangi Isaaya eki yagambire ati: “Akeetaho obuceke bwaitu kandi yayetweka endwara zaitu.”

¹⁸Yesu obu yarozire ekitebe kingi kimwehinguliriize, yaragira abeegesebwa kwambuka kugenda nseeri y'enyanja.

¹⁹Omwegesa w'ebiragiro yaija, yamugambira ati: “Mwegesa, ndaakuhonderaga hoona h'oraakagendaga.”

²⁰Yesu yamugarukamu ati: “Eboha ziina ebiina n'enyonyi ez'omu mwanya ziina ebiju; baitu Omwana w'omuntu taina h'okuta omutwe.”

²¹Ondi ha beegesebwa yagamba ati: “Waitu, kambanze ngende nziike taata.”

²²Yesu yamugarukamu ati: “Iwe mpondera, leka abakafiiri baziike abafu baabu.”

²³Yesu obu yataahire omu bwato, abeegesebwa be baagenda nawe.

²⁴Nubwo haimukire ihunga ly'amaani lyateera ha nyanja, ebigonzi byaseeseka omu bwato; baitu Yesu akaba agwijagiire.

²⁵Abeegesebwa baagenda baamusisiimura bati: “Waitu, tujune, twafa!”

²⁶Yabagarukamu ati: “Nimutiina ki inywe abaina okwikiriza okuke?” Nubwo yaimuka, yacoomera omuyaga n'enyanja, byateeka.

²⁷Abantu baahunirra, nibagamba bati: “Mara onu muntu ki arukuragira ihunga n'enyanja bikamuhurra?”

²⁸Yesu obu yahikire nseeri y'enyanja, omu nsi y'Abagadarene, akatangaana abasaija babiri nibaruga omu bituuro, abakaba baroho emyoyo emibi. Bakaba bali b'akabi, hataroho n'omu ayasoboraga kuraba omuhanda ogu.

²⁹Baatokera haiguru nibagamba bati: “Nootwenza ki, iwe Mwana wa Ruhanga? Oizire hanu kutucanza akasumi katakahikire?”

³⁰Haihi aho hakaba haroho igana ly'empunu nizirya.

³¹Emyoyo emibi yamwesengereza neegamba ati: “Obu oraaba nootubinga, otusindike omu igana ly'empunu.”

³²Yagigambira ati: “Mugende”. Nubwo emyoyo emibi yabarugamu, yagenda yataaha omu mpunu. Igana lyona ery'empunu lyajumbuutuka, lyakonkomoka enengo y'orusozi, zaagwa omu nyanja, zaafeeramu.

³³Abasaija abakaba nibaziriisa bairuka, baagenda omu rubuga baasubirra buli kintu, n'ebyabaireho abasaija abakaba baina emyoyo emibi.

³⁴Nubwo abantu boona ab'omu rubuga baaturukire okutangaana Yesu. Obu baamurozire, baamwesengereza aruge omu mitaano yabu.