Read Runyoro - rutooro Mat 9 Bible Online

Mat 9 - Runyoro - rutooro bible

Mat 9

¹Yesu akataaha omu bwato, yayambuka enyanja, yahika omu rubuga rw'owaabu.

²Baamuleetera omusaija anyakuzingamire, abyamire ha katabu. Yesu obu yarozire okwikiriza kwabu, yagambira anyakuzingamire ati: “Mwana wange, guma! Ebibi byawe bikuganyirwe.”

³Nubwo abamu ha beegesa b'ebiragiro baagambirangana bati: “Omuntu onu ka naajuma Ruhanga!”

⁴Baitu Yesu habw'okumanya ebiteekerezo byabu, yabagambira ati: “Nimuteekerereza ki kubi omu mitima yanyu?

⁵Ekirukukira kurahuka kiraha, kugamba nti: ‘Ebibi byawe bikuganyirwe’, rundi kugamba nti: ‘Imuka ogende’?

⁶Kinu nikyo muraamanyiraho Omwana w'omuntu nkooku aina obusobozi omunsi obw'okuganyira ebibi” nubwo yagambira omusaija anyakuzingamire ati: “Imuka, ohimbe akatabu kaawe, otaahe.”

⁷Yaimuka, yataaha omuka.

⁸Ekitebe ky'abantu obu baarozire eki, baatiina, baakugiza Ruhanga ayahaire abantu obusobozi oburukwingana aho.

⁹Yesu obu akaba naarugayo, yarora omuntu, ibara lye Matayo, aikaliire omu isoroolerezo ly'omusoro, yamugambira ati: “Mpondera.” Matayo yaimuka, yamuhondera.

¹⁰Yesu obu akaba aikaliire mba Matayo naalya, abasorooza b'omusoro n'abasiisi baija, baikaara nawe ha meeza hamu n'abeegesebwa be.

¹¹Abafalisaayo obu baakirozire, baakaguza abeegesebwa be bati: “Habwaki omwegesa wanyu alya n'abasorooza b'omusoro n'abasiisi?”

¹²Yesu obu yahuliire eki, yagarukamu ati: “Aboomeezi tibeetaaga mufumu, baitu ayetaagwa abarwaire.

¹³Mugende mwetegereza amakuru g'ekigambo kinu: ‘Ningonza mukole ebikorwa by'embabazi kukira kuntambira ebyonzira.’ Habwokuba ntaizirre kweta abahikiriire, baitu abasiisi.”

¹⁴Nubwo abeegesebwa ba Yohaana baija hali Yesu baamukaguza bati: “Habwaki itwe n'Abafalisaayo tusiiba emirundi nyingi, kunu abeegesebwa baawe batarukusiiba?”

¹⁵Yesu yabagarukamu ati: “Abagenyi basobora bata kuganya, omuswezi obu aba ainabo? Akasumi kalihika kigabura obu alibaihwaho, nubwo balitandika kusiiba.

¹⁶Tiharoho muntu abazirra ekikoba kihyaka ha kijwaro kikuru; habwokuba ekikoba eki kitaagukira kimu ha kijwaro kikuru n'ekihuru kigaliha.

¹⁷Kandi tiharoho muntu anyakuta eviini ey'ehiira omu ndyanga enkuru. Kakuba akorakwo, endyanga ebbaruka, eviini eseeseka, kandi endyanga esiisikarra kimu; baitu eviini ey'ehiira bagita omu ndyanga empyaka, kandi byombi biikaraho.”

¹⁸Yesu obu akaba naakyabaza nabo, haija omunyoro, yateeza amaju omumaiso ge, naagamba ati: “Muhara wange afiire. Ija omukwateho, ayomeere.”

¹⁹Yesu yaimuka yamuhondera aina n'abeegesebwa be.

²⁰Nubwo omukazi ow'akaba arwaire akeejwiso kumara emyaka ikumi n'ebiri yaleesirwe enyuma ya Yesu, yakwata ha mukugiro gw'ekijwaro kye;

²¹habwokuba akaba naagumya omu mutima gwe ati: “Noobu ndakwataho kwonka ekijwaro kye, ndaakira.”

²²Yesu yahinduka, obu yamurozire yagamba ati: “Mwisiki wange, guma; okwikiriza kwawe nukwo kukukirize.” Ahonaaho omukazi yakira.

²³Yesu obu yataahire omunju y'omunyoro, yarora abateezi b'endere n'abantu baingi abakaba nibateera empamo,

²⁴yagamba ati; “Murugeho; omwisiki tafiire, baitu agwijagiire.” Baamusekeereza.

²⁵Obu baamazire kutu rukya abantu, Yesu yahingura omu kisiika, yakwata omwisiki ha mukono, yaimuka.

²⁶Amakuru ago gaararanga hoona omu nsi egi.

²⁷Yesu obu akaba naarugayo, abafu b'amaiso babiri baamuhondera nibatoka bati: “Mwijukuru wa Daudi, otuganyire.”

²⁸Obu yataahire omunju, abafu b'amaiso baija nambere ali, yabakaguza ati: “Nimwikiriza nkooku nsobora kukora kinu?” Baamugarukamu bati: “Ego, Waitu!”

²⁹Yabakora ha maiso naagamba ati: “Kibakolerwe nkooku mwikirize.”

³⁰Amaiso gaabo gaiguka. Yesu yabateererra muno ati: “Mwerinde, mutakigambiraho muntu weena!”

³¹Baitu bbo obu baagenzire, baaranganiza amakuru ago omu bicweka byona eby'ensi egi.

³²Abasaija abo obu bakaba nibakyarugaho, abandi baaleetera Yesu omufu w'omunwa anyakuroho omwoyo mubi.

³³Yesu obu yamazire kubinga omwoyo mubi, omufu w'omunwa yabaza. Abantu boona baahunirra nibagamba bati: “Ekintu nka kinu tikikarorwahoga omu Isirairi.”

³⁴Baitu Abafalisaayo baagamba bati: “Abinga emyoyo emibi habw'obusobozi bwa mukuru wayo.”

³⁵Yesu yagendagenda naabungira embuga zoona n'ebyaro, naayegesa omu masorrokaniro gaabo, naarangirra abantu Amakuru Amarungi ag'obukama bwa Ruhanga, kandi naakiza abantu endwara eza buli mulingo n'obusaasi bwona.

³⁶Obu yarozire ebitebe by'abantu, yabagirra embabazi, habwokuba bakaba baharaize emitima, bataina kikoonyera, nk'entaama ezitaina muliisa.

³⁷Nubwo Yesu yagambiire abeegesebwa be ati: “Eby'okugesa bingi, baitu abakozi nubo bake.

³⁸Habweki musabe MUKAMA w'eby'okugesa atume abakozi baingi omu musiri gwe.”