Read Runyoro - rutooro Mar 10 Bible Online

Mar 10 - Runyoro - rutooro bible

Mar 10

¹Yesu obu yarugireyo, yagenda omu kicweka kya Buyudaaya ekiri nseeri y'ekisaaru Yorudaani. Ebitebe by'abantu byagaruka kumwesoroolezaaho, nawe yayongera kubeegesa, nkooku engeso ye ekaba eri.

²Abafalisaayo baija nambere ali, baamukaguza nibamulenga bati: “Ebiragiro bya Musa nibiikiriza omusaija kubinga mukazi we?”

³Nawe yabakaguza ati: “Musa akabaragira ki?”

⁴Baamugarukamu bati: “Musa akaikiriza omuntu kuhandiika ebbaruha y'okwahukana na mukazi we, nukwo amubinge.”

⁵Nandiki Yesu ati: “Habw'okugumangana kw'emitima yanyu, nikyo yabahandiikiriire ekiragiro eki.

⁶Habwokuba okuruga ha kuhangwa kw'ensi: ‘Rubanga akahanga omusaija n'omukazi.’

⁷‘Nikyo omusaija araalekeraga ise na nyina, agumire hali mukazi we,

⁸kandi ababiri abo bafooke mubiri gumu.’ Habweki baba batakyali babiri baitu omu.

⁹Nababweki Ruhanga eki yateeraniize hatalibaho muntu akyahukaniza.”

¹⁰Obu baahikire omunju, abeegesebwa be baayongera kumukaguza ha kigambo eki.

¹¹Uwe yabagambira ati: “Weena anyakubinga mukazi we, akaswera ondi, buli asiihaine;

¹²kandi n'omukazi anyakwahukana na iba, akaswerwa ondi, buli nawe asiihaine.”

¹³Abantu bakamuleetera abaana, abakwateho; baitu abeegesebwa be baacoomera ababaleesire.

¹⁴Yesu obu yarozire eki yabiihirwa, kandi yabagambira ati: “Muleke abaana baije nambere ndi, mutabatanga habwokuba abali nk'abo, obukama bw'omu iguru bwabo.

¹⁵Mazimakwo nimbagambira nti: Omuntu weena ataikiriza bukama bwa Ruhanga nk'omwana, talibutaahamu.”

¹⁶Yabakiikira, yabaha omugisa, abataireho emikono ye.

¹⁷Yesu obu akaba naimukya orugendo, haija omusigazi nairuka, yateeza amaju omu maiso ge, yamukaguza ati: “Mwegesa omurungi, nsemeriire kukora ki okugwetwa omu bwomeezi obutahwaho?”

¹⁸Yesu nawe yamukaguza ati: “Habwaki nonyeta murungi? Busaho murungi kwihaho Ruhanga wenka.

¹⁹Ebiragiro bya Ruhanga obimanyire. Otaliita. Otalisiihana. Otaliiba. Otalihangirra. Otaligobya. Otiinege sso na nyoko.”

²⁰Nandiki oli ati: “Mwegesa, ebi byona nkabikwata okuruga omu buto bwange.”

²¹Yesu nukwo kumurolerra, yamugonza, yamugambira ati: “Nooburwaho ekintu kimu; genda otunde ebi oinabyo, sente eziraarugamu ozigabire abanaku, nubwo olitunga itungo omu iguru; nukwo oije onkuraatire.”

²²Omusigazi obu yahuliire ekigambo eki, yagwerwa, yagenda aina obujune, habwokuba akaba aina itungo lingi.

²³Yesu nukwo kubabungyamu amaiso, yagambira abeegesebwa be ati: “Ka nikiremeera abaguuda kutaaha omu bukama bwa Ruhanga!”

²⁴Abeegesebwa be baahunirra habw'ebigambo bye. Baitu Yesu yayongera kubasoborra ati: “Baana inywe, ka nikiremeera abarukwesiga itungo okutaaha omu bukama bwa Ruhanga!

²⁵Nikirahuka engamiya kuraba omu nyindo y'enkinzo, okukira omuguuda kutaaha omu bukama bwa Ruhanga.”

²⁶Bbo bakahunirra muno, baakaguzangana bati: “Mara nooha alisobora kujunwa?”

²⁷Yesu nukwo kubarolerra yagamba ati: “Kinu abantu tibakisobora, baitu Ruhanga akisobora; habwokuba Ruhanga naasobora byona.”

²⁸Nubwo Petero yamugambiire ati: “Dora itwe, tukaleka byona, twakuhondera.”

²⁹Yesu yamugarukamu ati: “Mazimakwo nimbagambira nti: Busaho muntu n'omu ayasigire enju ye, rundi bagenzi be, rundi banyaanya, rundi nyina, rundi ise, rundi abaana be, rundi ebibanja bye habwange na habw'Amakuru Amarugni,

³⁰atatunga emirundi kikumi omu kasumi kanu: amaju, bagenzi be, banyaanya, nyina, abaana n'ebibanja, nukwo oteho okuhiiganizibwa; kandi omu busumi oburukwija alitunga obwomeezi obutahwaho.

³¹Baitu baingi ab'okubanza baliba b'enyuma, kandi ab'enyuma baliba b'okubanza.”

³²Obu bakaba bali omu muhanda nibagenda Yerusaalemu Yesu abeebembiire, abeegesebwa be baahunirra n'abandi abakaba bamuhondiire baatiina. Yagaruka yagarra ha rubaju ikumi na babiri, yatandika kubagambira ebirukwija kumubaho,

³³naagamba ati: “Dora nitugenda Yerusaalemu; Omwana w'omuntu naija kuheebwayo hali ba nyakatagara abakuru n'abeegesa b'ebiragiro; balimucwera omusango gw'okufa, kandi balimuhayo hali Abanyamahanga;

³⁴balimujuma, bamucwere amacwanta, bamuteere enkoba, bamwite; kandi obu halihinguraho ebiro bisatu alihumbuuka.”

³⁵Yakobbo na Yohaana batabani ba Zebedaayo baamwirra haihi, baamugambira bati: “Mwegesa, nitugonza otukorre eki turaakusaba kyona.”

³⁶Yabakaguza ati: “Nimugonza mbakorre ki?”

³⁷Nandiki bbo bati: “Otwikirize omu akwikarre ha mukono gwawe ogw'obulyo n'ondi ha gw'emoso omu kitiinisa kyawe.”

³⁸Baitu Yesu yabagambira ati: “Timurukumanya eki murukusaba. Nimusobora kubagana ha mabone aga ndukwija kubonabona rundi ha mulingo ogw'okufa ogu ndukwija kufamu?”

³⁹Baamugarukamu bati: “Nitusobora.” Yesu yabagambira ati: “Ego, amabone aga ndukwija kubonabona na inywe muligabona, n'okufa, mulifa nkooku ndukwija kufa;

⁴⁰baitu okwikarra ha mukono gwange ogw'obulyo rundi ha gw'emoso tali nyowe arukukugaba, baitu kw'abo abaakuteekaniriziibwe.”

⁴¹Abasigaireho ikumi, obu baahuliire eki, baabiihirirwa Yakobbo na Yohaana.

⁴²Yesu nukwo kubeeta yabagambira ati: “Mumanyire abo abeetwa abalemi b'Abanyamahanga nkooku babalemesa itwale, n'abakuru baabo babatwaza obusobozi.

⁴³Tikiriba kiti omuli inywe; baitu arukwenda kuba mukuru omuli inywe, abe muheereza wanyu,

⁴⁴kandi arukwenda kuba w'okubanza, abe mwiru wa boona.

⁴⁵Habwokuba Omwana w'omuntu nawe ataije kuheerezibwa, baitu okuheereza n'okuhayo obwomeezi bwe kucungura baingi.”

⁴⁶Bakataaha Yeriko; kandi obu akaba naarugayo aina abeegesebwa be n'ekitebe ky'abantu baingi, baasanga Batimaayo, mutabani wa Timaayo, omusabiirizi omufu w'amaiso, aikaliire ha muhanda rubaju.

⁴⁷Obu yahuliire ngu, ni Yesu owa Nazareeti, yatandika kutokera haiguru naagamba ati: “Yesu, Omwana wa Daudi, ongirre embabazi!”

⁴⁸Baingi baamucoomera ngu, aculeere; baitu yakizaaho kutokera haiguru ati: “Omwana wa Daudi ongirre embabazi.”

⁴⁹Yesu yayemerra, yagamba ati: “Mumwete, aije.” Baayeta omufu w'amaiso nibamugambira bati: “Huumura, imuka, naakweta.”

⁵⁰Yanaga omwenagiro gwe, yamatuka, yahika hali Yesu.

⁵¹Yesu yamukaguza ati: “Nogonza nkukorre ki?” Nandiki omufu w'amaiso ati: “Mwegesa, ningonza ndole.”

⁵²Yesu yamugambira ati: “Wegendere; okwikiriza kwawe kukukirize.” Ahonaaho yarora, yagenda na Yesu.