Read Runyoro - rutooro Mar 11 Bible Online

Mar 11 - Runyoro - rutooro bible

Mar 11

¹Obu bairiire haihi na Yerusaalemu, bahikire Betifage na Betaniya haihi n'orusozi rw'emiti Oliva, nubwo Yesu yatumire babiri ha beegesebwa be,

²yabagambira ati: “Mugende omu kyaro kiri eki muroleriire; obu muraaba nimutaahamu muti, murarora omwana gw'endogoyi ogutakatembwaga muntu; mugusibule, muguleete.

³Obu haraabaho arukubakaguza ati: ‘Nimusibura gwaki?’ Mumugarukemu muti: ‘Mukama waitu nagwetaaga, kandi naija kugugarra bwango.’”

⁴Baagenda, baasanga omwana gw'endogoyi gusibikirwe haihi n'irembo ha ruguudo rubaju; baagusibura.

⁵Abantu abakaba beemeriireho nukwo kubakaguza bati: “Omwana gw'endogoyi nimusibura gwaki?”

⁶Baabagarukamu Yesu eki yabagambiire, nabo baabaleka baagenda.

⁷Baaleetera Yesu omwana gw'endogoyi, baagutaho ebijwaro byabu, yagwikarraho.

⁸Abantu baingi baayarra ebijwaro byabu omu muhanda, abandi baayarra amataagi g'emiti aga bacwire omu ngonjo.

⁹Boona abakaba babeebembiire n'abakaba babahondiire bakatoka bati: “Hangiriza! Ahaisanizibwe ogu arukwija omu ibara ly'Atahwaho!

¹⁰Bw'omugisa obukama bwa isenkuru-itwe Daudi oburukwija! Hangiriza anyakusinga haiguru muno!”

¹¹Yesu yataaha Yerusaalemu, yagenda omu Nju ya Ruhanga obu yamazire kurora ebintu byona, kandi obwire buli haihi kwira, yaturuka mu rubuga yagenda Betaniya hamu na ikumi na babiri.

¹²Obu bwakiire nyenkya, bakaba nibaruga Betaniya, yarumwa enjara.

¹³Obu yalengera omuti omutini ogujumbire, yagenda kurora obu araaba nasobora kugusangaho ekijuma. Baitu obu yaguhikireho, atasangeho kantu kwihaho ebikoora byonka, habwokuba kakaba katali kasumi k'emitini kwaniramu.

¹⁴Yagugambira ati: “Okuruga hati hatalibaho n'omu agaruka kukulyaho ekijuma.” Abeegesebwa be eki bakakihurra.

¹⁵Baahika Yerusaalemu. Yataaha omu Nju ya Ruhanga, yatandika kubingamu abakaba nibatundiramu n'abakaba nibagurramu; kandi yajuumika emeeza ez'abakaba nibahingisa sente, n'entebe ez'abakaba nibatunda amaiba;

¹⁶kandi ataikirize muntu weena kurabya ekintu omu Nju ya Ruhanga.

¹⁷Yayegesa naabakaguza ati: “Kitahandiikwe kiti: ‘Enju yange eraayetwaaga Nju y'okusabiramu, ey'amahanga goona’? Baitu inywe mugifoire bwingira bw'abanyagi.”

¹⁸Baanyakatagara abakuru n'abeegesa b'ebiragiro obu bahuliire eki baaserra omuhanda ogw'okumwita. Baitu bakamutiina, habwokuba enyegesa ye ekahuniriza abantu boona.

¹⁹Obwire obu bukaba nibusweka, Yesu yaruga omu rubuga.

²⁰Nyenkya kara Yesu n'abeegesebwa be obu bakaba nibahingura, baarora omuti omutini gwomiire kimu okuhika ha mihama.

²¹Petero yaijuka ekyabaireho, yagambira Yesu ati: “Mwegesa, dora! Omutini ogu wakyenere, hati gwomere.”

²²Yesu yagarukamu ati: “Inywe mwesigege Ruhanga.

²³Mazima nimbagambira nti: Omuntu weena aligambira orusozi runu ati: ‘Sinduka, ogwe omu nyanja’ kandi atarukugurukyagurukya, baitu naikiriza ngu, eki arukugamba nikiija kubakwo, kirimukolerwa.

²⁴Nikyo ndukubagambirra nti: kyona eki muraasabaga nimwesengereza, nimwikiriza nkooku muraakitunga, mazimakwo muraakiheebwaga.

²⁵Obu muraabaga mwemeriire nimusaba, mwina ekigambo kyona ha muntu, mubanzege mumuganyire; na Isiinywe anyakuli omu iguru nukwo abaganyire ebibi byanyu.

²⁶[Baitu kakuba mutaganyira, na Isiinywe anyakuli omu iguru talibaganyira bibi byanyu.]”

²⁷Baayongera baahika Yerusaalemu. Yesu obu akaba naagendagenda omu Nju ya Ruhanga, abanyakatagara abakuru abeegesa b'ebiragiro, n'abakuru b'abantu baija nambere ali,

²⁸baamukaguza bati: “Busobozi ki oburukukukoza ebintu binu, kandi nooha yabukuhaire kubikora?”

²⁹Yesu yabagarukamu ati: “Na nyowe kambakaguze ekekaguzo kinu; obu murangarukamu, numwo ndabagambira obusobozi oburukunkoza ebi byona.

³⁰Okubatiza kwa Yohaana kukaruga hali Ruhanga rundi omu bantu? Mungarukemu.”

³¹Baitu bbo baahakanizangana bonka bati: “Obu turagarukamu ngu: ‘Kukaruga hali Ruhanga,’ naija kutukaguza ati: ‘Habwaki mutaramwikiriize?’

³²Boojo tugarukemu tuti: ‘Kukaruga omu bantu?’ ” Baitu bakatiina abantu, habwokuba boona bananukire Yohaana nkooku akaba ali murangi mali.

³³Nahabweki baagarukamu Yesu bati: “Titumanyire.” Yesu nubwo yabagambiire ati: “Na nyowe tindukwija kubagambira obusobozi oburukunkoza binu.”