Read Runyoro - rutooro Mar 12 Bible Online

Mar 12 - Runyoro - rutooro bible

Mar 12

¹Yesu akatandika kubabaliza omu nfumo ati: “Omusaija akabyara orugonjo rwe rw'emizabbibbu, yaruzitirra orukoroba, yalimamu endeeba, yayombekamu endindiro, yarusigira abapangisa okururolerra; uwe yagenda omu ihanga erindi.

²Obusumi bw'okunoga obu bwahikire, yatuma omuheereza hali abapangisa abo, bamutwekereho ebijuma by'emizaabbibbu.

³Baitu abapangisa abo baakwata omuheereza, baamuteera, baamubinga yarugayo ngaro-nsa.

⁴Yagaruka yabatumira omuheereza ondi; ogu baamuteera orubaale, baamuswaza.

⁵Yatumayo ondi, ogu baamwita; n'abandi baingi nukwo baabagizire bati. Abamu baabateera, abandi baabaita.

⁶Akaba akyasigaizeeho omuntu omu, nuwe mutabani we omugonzibwa ou yabatumiire ha kumalirra, naateekereza ati: ‘Mutabani wange baraamugayuka.’

⁷Baitu abapangisa abo obu baamurozire, baagambirangana bati: ‘Onu nuwe mugwetwa. Muleke tumwite, obugwetwa bube bwaitu.’

⁸Baamukwata, baamwita, baamunaga aheeru y'orugonjo.

⁹Hati nu Mukama w'orugonjo oru alikora ki? Aliija, ahwerekereze abapangisa abo, kandi orugonjo arukwase abandi.

¹⁰Timukasomaga ekyahandiikirwe kinu ekirukugamba kiti: ‘Ibaale lyonyini abombeki eri baayangire, niryo lyafookere bugumizo bw'enju;

¹¹kinu nikyo Atahwaho yakozire, kandi nikituhuniriza?’ ”

¹²Baaserra okumukwata, baitu baatiina akanyanya k'abantu, kandi nibamanya orufumo oru nkooku arugambiire bbo; baamuleka baayegendera.

¹³Bakamutumira abamu ha Bafalisaayo n'ab'ekitebe kya Herode bamutege omu bigambo bye.

¹⁴Baija baamugambira bati: “Mwegesa nitumanya nkooku oli w'amazima, kandi tosoroora mu bantu; habwokuba tororra ha kitiinisa ky'abantu, baitu oyegesaakwo omuhanda gwa Ruhanga. Kihikire kuha Kaisaali omusoro rundi nangwa?

¹⁵Tuhe omusoro rundi tuguleke?” Baitu uwe obu yamanyire obugobya bwabo, yabakaguza ati: “Nimuntegera ki? Mundeetere siringi, ngirole.”

¹⁶Baagimuleetera. Uwe yabakaguza ati: “Ekisisani kinu n'ebihandiikirweho by'oha?” Nandiki bbo bati: “Bya Kaisaali.”

¹⁷Yesu yabagambira ati: “Ebya Kaisaali mubihe Kaisaali, n'ebya Ruhanga mubihe Ruhanga.” Eki kikabahuniriza muno.

¹⁸Abasadukaayo abahakana ngu, busaho kuhumbuuka, bakaija hali Yesu, baamukaguza bati:

¹⁹“Mwegesa, Musa akatuhandiikira ati: Mukuru w'omuntu obu araafaaga akasiga omukazi atazaire baana, mugenzi wa kifa aswere omufaakati ogu, nukwo bazarre kifa abaana.

²⁰Aho nu hakaba haroho nyineemu musanju. Mukuru wabu yaswera omukazi, baitu yafa atasigire baana;

²¹n'owa kabiri yamuswera, nawe yafa atasigire baana n'owa kasatu nukwo ati.

²²Okuhika boona musanju, obu baafiire batasigire baana. Abo boona obu bahoireho omukazi nawe yafa.

²³Ha kiro ky'okuhumbuuka aliba muk'oha? Habwokuba boona musanju bakamuswera.”

²⁴Yesu yabagarukamu ati: “Aho tinuho muhabira okutamanya Ebyahandiikirwe, noobu bwakuba obusobozi bwa Ruhanga?

²⁵Habwokuba abafiire obu balihumbuuka, tibaliswera kandi tibaliswerwa; baitu baliba nk'abamalaika ab'omwiguru.

²⁶Kandi ebirukukwata ha kuhumbuuka kw'abafu, timukasomaga omu kitabu kya Musa, omu kicweka ekirukugamba ha by'orusaka orurukwaka, Ruhanga nkooku yamugambiire ati: ‘Ninyowe Ruhanga owa Abburahamu, Ruhanga owa Isaaka, kandi Ruhanga owa Yakobbo?’

²⁷Tali Ruhanga ow'abafiire, baitu ow'aboomeezi; inywe muhabiire kimu.”

²⁸Kandi omu ha beegesa b'ebiragiro yaija, yahurra nibateezangana empaka, obu yamazire kwetegereza nkooku Yesu abagarukiremu kurungi, yamukaguza ati: “Ekiragiro ky'okubanza omu byona nikiha?”

²⁹Uwe yamugarukamu ati: “Eky'okubanza nikyo kinu: ‘Iwe Isirairi hurra, MUKAMA Ruhanga waitu nuwe MUKAMA wenka;

³⁰ogonzeege MUKAMA Ruhanga waawe n'omutima gwawe gwona, n'omwoyo gwawe gwona, n'amagezi gaawe goona, n'amaani gaawe goona.’

³¹Ekya kabiri nkinu: ‘Ogonzeege mutaahi waawe nkooku oyegonza wenka.’ Busaho kiragiro ekindi ekirukukira ebi.”

³²Omwegesa w'ebiragiro yamugambira ati: “Mwegesa ohikize. Ogambire ngu, Ruhanga ali omu, kandi busaho ondi, kwihaho Uwe wenka.

³³Kandi okumugonza n'omutima gwona, n'amagezi goona, n'amaani goona, kandi n'okugonza mutaahi waawe nkooku oyegonza wenka, ebi nibikirra kimu ebyonzira ebyokiibwe n'ebitambirwe.”

³⁴Yesu obu yarozire nkooku agarukiremu n'amagezi, nubwo yamugambiire ati: “Obukama bwa Ruhanga tobuli hara.” Okuruga obu busaho n'omu ayagumire okumukaguza.

³⁵Yesu obu akaba naayegesa omunju ya Ruhanga akakaguza ati: “Abeegesa b'ebiragiro basobora bata kugamba ngu, Kristo aba mwijukuru wa Daudi?

³⁶Kandi kunu Daudi wenka akagambisibwa Mwoyo Ahikiriire ati: ‘Atahwaho akagambira MUKAMA wange ati: Ikarra ha mukono gwange ogw'obulyo, okuhika abanya nzigwa baawe obu ndibafoora akatebe k'ebigere byawe.’

³⁷“Daudi wenka ayeta Kristo MUKAMA we; kandi obu, aba ata mwijukuru we?” Ekitebe kyona eky'abantu kyamuhurra n'okusemererwa.

³⁸Yesu obu akaba naayegesa, akagamba ati: “Mwerinde abeegesa b'ebiragiro abagonza kugendagenda bajwaire ekanzu ezirukwekweya, n'okuramukibwa n'ekitiinisa omu butale.

³⁹Bagonza kwikarra ha ntebe z'ekitiinisa omu masorrokaniro, n'ebiikaro ebirukukira oburungi omu magenyi.

⁴⁰Nubo abo abanyaga amaju g'abafaakati, hanyuma beezokesa nibarandagatana omu kusaba. Abo balicwerwa omusango ogurukukira ogw'abandi.”

⁴¹Yesu akaba aikaliire aroleriire eryahurro lya sente. Yarora abantu baingi nibalitamu sente. Abaguuda baingi bakanagamu omuhendo mukooto.

⁴²Omufaakati omunaku yaija, yanagamu obusente bubiri bw'ebyoma.

⁴³Nukwo Yesu kweta abeegesebwa be, yabagambira ati: “Mazima nimbagambira nti: Omufaakati omunaku onu anagiremu nyingi okukira abandi boona abanagire omu lyahurro.

⁴⁴Habwokuba bbo banagiremu ebi basaagiriire; baitu uwe omu bunaku bwe ahaireyo byona ebi ainabyo.”