Read Runyoro - rutooro Mar 13 Bible Online

Mar 13 - Runyoro - rutooro bible

Mar 13

¹Yesu obu akaba naakyaruga omu Nju ya Ruhanga, omu ha beegesebwa be yamugambira ati: “Mwegesa, dora amabaale ganu n'ebyombeko binu, ka bikasemera!”

²Yesu yamugarukamu ati: “Ebyombeko ebi ebikooto obiboine? Tihalisigara ibaale na limu eriri ha lindi, eritalinagwa hansi.”

³Yesu obu akaba aikaliire ha rusozi rw'emiti Oliva, aroleriire Enju ya Ruhanga, nubwo Petero, Yakobbo, Yohaana na Andereya baamukagwize omu nsita bati:

⁴“Tugambire, binu biribaho di? Kandi karorwaho ki akalyoleka nkooku biri by'okuhikirra?”

⁵Nandiki Yesu ati: “Mwerinde hatalibaho muntu weena arukubahabisa.

⁶Baingi abaliija omu ibara lyange nibagamba bati: ‘Ninyowe ogu!’ Kandi balihabisa baingi.

⁷Obu mulihurra obulemu n'orugambo rw'obulemu, mutalitiina; ebi by'okubaho, baitu empero eriba etakahikire.

⁸Ihanga liriimukirra erindi, n'obukama bulirwanisa obundi; halibaho emisisa omu biikaro bingi kandi haligwa ekiihe; baitu egi niyo ntandiko y'emihito.

⁹“Inywe mwerinde, habwokuba balibahayo omu nkurato, balibaterra omu masorrokaniro; mulyemerra omumaiso g'abalemi n'ag'abakama habwange, mube bakaiso bange hali bo.

¹⁰Amakuru Amarungi gabanze garangirirwe omu mahanga goona.

¹¹Obu balibatwara, bakabahayo kutongana emisango, mutalitunturra ebi muligamba, baitu mugambe kyona eki muliheebwa omu kasumi ako; habwokuba tibali inywe abalyetonganirra, baitu mulitonganirirwa Mwoyo Ahikiriire.

¹²Omuntu alihayo owanyina aitwe, na ise mwana alihayo omwana we, n'abaana baliimukirra abazaire baabo babaise;

¹³na inywe mulinobwa boona habwange. Baitu ogu aligumisiriza okuhika ha mpero, nuwe alijunwa.”

¹⁴“Baitu obu mulirora ekintu ekibi, ekirukunugwa kandi ekirukuhwerekereza, kitairwe nambere kitasemeriire kuba (arukusoma binu ayetegereza); obu, abo abaliba bali omu Buyudaaya bairukire ha nsozi.

¹⁵Alisangwa ali ha nju eruguru atalisirimuka, kandi atalitaaha omunju ye kwihamu ekintu kyona;

¹⁶n'ow'alisangwa ali omu musiri ataligaruka omuka kutabarra omwenagiro gwe.

¹⁷Kandi bambi abaliba baina enda n'abarukwonkya omu biro ebi balikibona!

¹⁸Musabe, ebi bireke kubaho omu biro by'obutiti.

¹⁹Habwokuba omu biro ebi halibaho omuhito ogutakabahoga okuruga Ruhanga yakaba kuhanga ensi n'okuhika hati, kandi ogutaligaruka kubaho.

²⁰Kakuba MUKAMA atarakeeheze ha biro ebi, tihaakujunirwe muntu n'omu; baitu habw'abakomerwemu be, ebiro ebi Ruhanga akabikeehya.

²¹Omuntu weena obu alibagambira ati: ‘Dora, Kristo ngunu!’ Rundi ‘Ngugwo!’ Mutalikiikiriza.

²²Halizooka abarangi b'ebisuba n'abarukweyeta Kristo. Balikora ebyamahano n'ebirukuhuniriza, nukwo bahabise noobu baakubaire abakomerwemu.

²³Baitu inywe mwerinde; ebi byona mbibagambiire bitakabaireho.”

²⁴“Baitu emihito y'ebiro ebi obu erihwa, izooba lirisiikirizibwa omwirima, n'okwezi tikulijwa,

²⁵n'enyunyuuzi ez'omu iguru ziryeseesa hansi, n'amaani ag'omwiguru galitengesebwa.

²⁶Obu nubwo balirora Omwana w'omuntu naizira omu bicu by'omwiguru aina obusobozi bwingi n'ekitiinisa.

²⁷Nubwo alituma bamalaika basorooze abakomerwemu be, nibabaiha omu mbaju ina ez'ensi, okuruga iguru n'ensi nambere bitandikira okuhika nambere bigarukira.”

²⁸“Mwegere ha muti omutini, itaagi lyagwo obu lirokera, likanjurra amababi, mumanya nkooku ekyanda kiri haihi.

²⁹Na inywe obu mulirora binu nibibaho, mumanye Omwana w'omuntu nkooku ali haihi, ahikiire kimu ha irembo.

³⁰Mazima nimbagambira nti: Ab'obusinge bunu tibalihwaho ebi byona bitakabaireho.

³¹Iguru n'ensi birihwaho, baitu ebigambo byange tibirihwaho.”

³²“Baitu ekiro eki n'esaaha egi busaho n'omu abimanyire, noobu baakuba bamalaika ab'omwiguru, noobu yakuba Mwana wonyini, kwihaho Isenyowe wenka.

³³Mwerinde, mwikale nimurora kandi musabe, habwokuba titumanyire akasumi ako nambere kalihikira.

³⁴Nikisisana nk'omuntu arukugenda orugendo; obu aba naaruga omu ka asiga akwasize abaheereza be, buli omu omulimo ogu araakora; kandi aragira omukumirizi kwikara naalinda.

³⁵Nahabweki, mwikale nimurora, habwokuba timumanyire kasumi nyineeka akaliiziramu: asobora kwija omu kairirizi rundi omu itumbi rundi enkoko niikooka, rundi omu rukyakya.

³⁶Kakuba aija aleke kubagwamu akasanga mugwijagiire.

³⁷Ekindukubagambira, nikyo ngambira n'abandi boona nti: Mwikale nimurora.”