Read Runyoro - rutooro Mar 14 Bible Online

Mar 14 - Runyoro - rutooro bible

Mar 14

¹Hakaba hasigaire ebiro bibiri okuhika ha bugenyi bw'okwijuka Okuhingurwaho n'obw'Emigaati Etatumbisiibwe. Baanyakatagara abakuru n'abeegesa b'ebiragiro bakaba nibaserra amagezi nkooku baraakwata Yesu abantu batamanyire, nukwo bamwite;

²baitu bakagamba bati: “Tutamukwata ha kiro kikuru, tihaikara kubaho epumpu omu bantu.”

³Yesu obu akaba ali Betaniya, omunju ya Simooni omugenge, aikaliire naalya, hakaija omukazi aina ihembe ly'amagita agarukuboya kurungi ag'omuhendo mwingi, yafundukura ihembe, amagita yagamuseesa ha mutwe.

⁴Baitu hakabaho abamu abagambirangaine babiihirwe bati: “Amagita ganu gafiire ki?

⁵Amagita ganu gaakusoboire kuguzibwa habwa edinaali bikumi bisatu, [3] zigabirwa abaseege.” Omukazi ogu baamuhyemera.

⁶Baitu Yesu yabagambira ati: “Omukazi mumuleke; mumutuntuliize ki? Ankoliire ekintu kirungi.

⁷Habwokuba abanaku obutoosa mwikara nabo. Obu muraagonzaaga bwona, musobora kubakorra ebirungi; baitu timurukwija kwikara na nyowe butoosa.

⁸Onu akozire eki asoboire; omubiri gwange agusiigire kara gutakaziikirwe.

⁹Mazimakwo nimbagambira nti: Hoona hoona omunsi nambere Amakuru Amarungi ganu garaarangirirwaga, omukazi onu eki akozire kiraagambwahoga okumwijuka.”

¹⁰Nubwo Yuda Isikalyota, omu ha ikumi na babiri yagenzire hali banyakatagara abakuru agobeze Yesu abamukwase.

¹¹Obu baakihuliire baasemererwa, baamunihiza kumuha sente. Nawe yaserra akasumi ak'okumubakwasa.

¹²Ha kiro eky'okubanza eky'obugenyi bw'Emigaati Etatumbisiibwe, eki baatambirahoga omwana gw'entaama ogw'okwijuka Okuhingurwaho, abeegesebwa be bakamukaguza bati: “Noogonza tugende tukuteekanirize nkaha, nambere oraliira obugenyi obw'Okuhingurwaho?”

¹³Nubwo yatuma babiri ha beegesebwa be, nabagambira ati: “Mugende omu rubuga, muraatangaana omusaija ayetwekere ensoha y'amaizi; mumuhondere.

¹⁴Nambere araataaha hoona, mugambire nyineeka muti: ‘Omwegesa naakukaguza ati: Ekisiika kyange eky'abagenyi kiraha nambere ndaaliira obugenyi obw'Okuhingurwaho hamu n'abeegesebwa bange?’

¹⁵Uwe araabooleka ekisiika kikooto omu kainaabiri ekiteekaniziibwe, kirumu byona ebirukwetaagwa; oku nuho mututeekanirize.”

¹⁶Abeegesebwa baimukya, baataaha omu rubuga, baasanga byona biri nkooku yabagambiire; baateekaniza obugenyi obw'okwijuka Okuhingurwaho.

¹⁷Omu rwiririzi Yesu akaija hamu na ikumi na babiri.

¹⁸Obu bakaba bali ha meeza nibalya, yagamba ati: “Mazimakwo nimbagambira nti: Omu omuli inywe naija kungobeza, kandi nuwe ogu arukulya na nyowe.”

¹⁹Bbo baabanza kusaalirwa n'okumukaguza omu omu bati: “Ninyowe?”

²⁰Yabagarukamu ati: “Nuwe omu omuli inywe ikumi na babiri arukukoza na nyowe omu bbakuli.

²¹Habwokuba Omwana w'omuntu naagenda nkooku kyamuhandiikirweho, baitu alikibona omuntu ogu arukugobeza Omwana w'omuntu! Kyakubaire kirungi omuntu ogu kakuba atarazairwe.”

²²Obu bakaba nibalya, Yesu yakwata omugaati yasiima, yagucwamu, kandi yaguha abeegesebwa be naagamba ati: “Mukwate, mulye, gunu nugwo mubiri gwange.”

²³Kandi yakwata ekikopo, obu yamazire kusiima, yakibaha; boona baanywaho.

²⁴Yabagambira ati: “Enu niyo sagama yange ey'ekiragaano ekihyaka, eraaseeswa habwa baingi.

²⁵Mazimakwo nimbagambira nti: Tindigaruka kunywa ha nsande ey'ebijuma by'emizaabbibbu okuhika ha kiro eki, obu ndiginywa na inywe eri mpyaka omu bukama bwa Ruhanga.”

²⁶Obu baamazire kuzina ekizina baaturuka, baagenda ha rusozi rw'emiti Oliva.

²⁷Nubwo Yesu yabagambiire ati: “Inywena nimwija kumpemukaho; habwokuba kikahandiikwa kiti: ‘Nditeera omuliisa, entaama zirarange.’

²⁸Kyonka obu ndimara kuhumburwa, ndibabanza okuhika Galiraaya.”

²⁹Baitu Petero yahaya naagamba ati: “Abandi boona noobu baraakuhemukaho, baitu nyowe ninkifuuhya!”

³⁰Nandiki Yesu ati: “Mazima ninkugambira nti: Kiro kinu kyonyini, enkoko etakakookere kabiri, oraaba onyehoogere emirundi esatu.”

³¹Baitu Petero yayongera kukigumiza kimu ati: “Noobu ndaaba ndi w'okufa na iwe, baitu tindukwija kukwehooga.” Kandi abandi boona nukwo baagambire bati.

³²Bakahika omu kiikaro ekirukwetwa Getesemaane. Yesu yagambira abeegesebwa be ati: “Mwikarre hanu, nyowe kangende nsabe.”

³³Yatwara Petero, Yakobbo, na Yohaana; yabanza kusaalirwa muno n'okutuntura.

³⁴Nubwo yabagambiire ati: “Omutima gwange gwina obujune bwingi, buraaliire kunyita. Mwikale hanu nimurora.”

³⁵Yagendaho kake omu maiso, yajuumara hansi, yayesengereza ngu, obu kiraaba nikisoboka, esaaha egi emuhinguleho.

³⁶Yagamba ati: “Abba”, amakuru ngu, Taata. “Ebintu byona noobisobora; onyiheho amabone ganu; nabwo kitaba nyowe nkooku ndukugonza, baitu kibe Iwe nkooku orukugonza.”

³⁷Yagaruka yabasanga bagwijagiire, yakaguza Petero ati: “Simooni ogwijagiire? Tosoboire kurora esaaha emu?

³⁸Murole kandi musabe, nukwo muleke kwohebwa; omutima nigugonza mali, baitu omubiri muceke.”

³⁹Yagarukayo yayesengereza naagamba ebigambo bimu na biri.

⁴⁰Baitu obu yagarukire, nabwo yabasanga bagwijagiire, habwokuba amaiso gaabo gakaba nigakamba. Kandi bbo baaburwa eki baramugarukamu.

⁴¹Yagaruka omurundi gwa kasatu, yabagambira ati: “Na hati mukyagwijagiire, muhumwire? Kihoire; esaaha ehikire; Omwana w'omuntu aheebweyo omu mikono y'abasiisi.

⁴²Mwimuke tugende; arukungobeza ngugwo, airiire haihi.”

⁴³Ahonaaho obu akaba naakyabaza, Yuda, omu hali ikumi na babiri, yaija n'ekitebe ky'abantu baina empirima n'ebiduuma, batumirwe baanyakatagara abakuru, abeegesa b'ebiragiro n'abakuru b'abantu.

⁴⁴Ogu ayagobiize Yesu akaba abahaire akarorwaho naagamba ati: “Ou ndaagwa omu kifuba, buli nuwe ogu; mumukwate, mumutwale nimumulindira kimu ataikara kucwa.”

⁴⁵Yuda obu yaizire, ahonaaho yamwirra haihi, yamuramukya ati: “Mwegesa!” Yamugwa omu kifuba.

⁴⁶Bali baamugwera, baamukwata.

⁴⁷Kandi omu hali abo abakaba beemeriire aho, yasomorayo empirima ye, yatema omwiru w'omukuru w'abanyakatagara, yamucwaho okutu.

⁴⁸Yesu yabakaguza ati: “Mwizire kunkwata n'empirima n'ebiduuma nk'abaiziriire kukwata omunyagi?

⁴⁹Buli kiro naikaraga na inywe ninyegesa omu Nju ya Ruhanga, ka mutarankwasire. Baitu leka Ebyahandiikirwe bihikirizibwe.”

⁵⁰Abeegesebwa boona baamusigaho, bairuka.

⁵¹Omusigazi omu yamuhondera ajwaire esuuka erukwera yonka; nawe bamukwata;

⁵²baitu uwe yabasigira esuuka egi, yairuka ali busa.

⁵³Baatwara Yesu hali mukuru w'abanyakatagara. Abanyakatagara abakuru, abakuru b'abantu, n'abeegesa b'ebiragiro bakeesoroolezaayo.

⁵⁴Kandi Petero akaba amuhondiire haraho, okuhika obu baataahire omu kizigati kya mukuru w'abanyakatagara; yaikarra n'abalinzi nayota omurro.

⁵⁵Baanyakatagara abakuru n'orukurato rwona baaserra obwakaiso hali Yesu nukwo bamwite; baitu batabuzoole.

⁵⁶Baingi bakaleeta obwakaiso bw'ebisuba hali uwe, baitu obwakaiso bwabo butaikirranize.

⁵⁷Abamu bakeemerra nibamuhangirra bati:

⁵⁸“Tukamuhurra naagamba ati: ‘Ndiseesa Enju ya Ruhanga enu eyayombekerwe emikono y'abantu.’ ”

⁵⁹Noobu baraaba baagambire bati, baitu obwakaiso bwabo butaikirranize.

⁶⁰Mukuru w'abanyakatagara yayemerra hagati, yakaguza Yesu ati: “Toina kyona eki orukugarukamu? Banu kiki eki barukukurumiriza?”

⁶¹Baitu uwe yaculeera, tiyagarukamu kantu. Mukuru w'abanyakatagara yagaruka yamukaguza ati: “Niiwe Kristo, Omwana w'Ogu Anyakuhaisanizibwa?”

⁶²Nandiki Yesu ati: “Ninyowe; kandi muligaruka kurora Omwana w'omuntu aikaliire ha mukono gw'obulyo ogw'Ow'Obusobozi bwona, naizira omu bicu by'omu iguru.”

⁶³Nubwo Mukuru w'abanyakatagara yataagwire omwenagiro gwe naagamba ati: “Nitukyayetaagira ki abakaiso?

⁶⁴Mumwehuliriire nkooku ajumire Ruhanga. Inywe nimucwamu muta?” Boona baamucwera omusango ngu, asemeriire okufa.

⁶⁵Abamu baatandika kumucwera ebicwanta, n'okumuswekerra ha maiso, n'okumuteera empi nibagamba bati: “Toma, nooha akutiire!” Abaserikale abalinzi nabo baamutangiriza empi.

⁶⁶Petero obu akaba ali ifo omu kizigati, omu ha bazaana b'omukuru w'abanyakatagara yaija.

⁶⁷Obu yarozire Petero naayota, yamugumyaho amaiso yagamba ati: “Na iwe obairege hamu na Yesu Omunazareeti.”

⁶⁸Baitu uwe yayehooga naagamba ati: “Eki orukugamba tindukukimanya kandi tindukukyetegereza.” Yagenda yayemerra ha kiti ky'irembo, kandi enkoko yakooka.

⁶⁹Omuzaana ogu yayongera kumutaho eriiso, yagaruka kugambira abakaba beemeriireho ati: “Omusaija onu nuwe omu hali bo.”

⁷⁰Baitu Petero yagaruka yayehooga. Obu haahingwireho akaanya kake, abakaba beemeriire aho baagaruka baagambira Petero bati: “Mazimakwo na iwe oli omu hali bo, habwokuba oli Mugaliraaya.”

⁷¹Baitu uwe yatandika kwekyena n'okurahira ati: “Omuntu ogu ou murukubazaaho, timmumanyire.”

⁷²Ahonaaho enkoko yakooka omurundi gwa kabiri. Nubwo Petero yaijukire Yesu eki yamugambiire ati: “Enkoko etakakookere kabiri, oraaba onyehoogere kasatu.” Obu yaijukire eki, yasaalirwa muno, yarra.