Read Runyoro - rutooro Mar 15 Bible Online

Mar 15 - Runyoro - rutooro bible

Mar 15

¹Obwire obu bukaba nibukya buti, baanyakatagara abakuru, hamu n'abakuru b'abantu, n'abeegesa b'ebiragiro, n'orukurato rwona baikarra kuhanuura; hanyuma baaboha Yesu baamutwara, baamukwasa Pilaato.

²Pilaato yamukaguza ati: “Niiwe Mukama w'Abayudaaya?” Uwe yamugarukamu ati: “Nukwo ogambire.”

³Baanyakatagara abakuru bakamunyegerra ebintu bingi.

⁴Pilaato yagaruka yamukaguza ati: “Toina kyona eki orukugarukamu? Dora, ebi barukukunyegerra nkooku biri bingi.”

⁵Baitu Yesu tiyamugarukamu kindi; habweki Pilaato yahunirra.

⁶Ha bugenyi obukuru nk'obu Pilaato yabalekerraga omunyankomo omu ou baasiimaga.

⁷Omu beemi abakaba bali omu nkomo abaakwasirwe habw'okwita abantu omu kajagarro, hakaba harumu omusaija ibara lye Baraaba.

⁸Ekitebe ky'abantu kyaija kyasaba Pilaato akole nkooku abakorra bwona.

⁹Uwe yabakaguza ati: “Nimwenda mbalekerre Omukama w'Abayudaaya?”

¹⁰Habwokuba akamanya ngu, banyakatagara abakuru bamuhaireyo habw'ihali.

¹¹Baitu banyakatagara abakuru nukwo kwimukiriza ekitebe ky'abantu ngu, haakire abalekerre Baraaba.

¹²Pilaato yagaruka yabakaguza ati: “Kandi omusaija ou murukweta Mukama w'Abayudaaya, mmukole ki?”

¹³Baitu bbo baatokera haiguru bati: “Mubambe ha musaraba.”

¹⁴Nandiki Pilaato ati: “Habwaki? Kibi ki eki akozire?” Nukwo bbo kutokera haiguru okukiraho bati: “Mubambe ha musaraba.”

¹⁵Aho Pilaato habw'okugonza kusiimwa ekitebe ky'abantu, yabalekerra Baraaba. Obu baamazire kuteera Yesu enkoba, yamuhayo kubambwa ha musaraba.

¹⁶Abaserikale baihaho Yesu baamutwara omu kikaali omunju enyakwetwa kibbira; baasorooza ekihanda kyona ky'abaserikale.

¹⁷Baamujweka orugoye orurukugaajuka, baazinga ekondo y'amahwa baagimuta ha mutwe.

¹⁸Baatandika kumuramya bati: “Hangiriza, Omukama w'Abayudaaya!”

¹⁹Baamuteeza orubingo omu mutwe, baamucwera ebicwanta, baateeza amaju nibamuramya.

²⁰Obu baamazire kumuterra enaku, baamujuura orugoye orurukugaajuka, baamujweka engoye ze, baamwebembeza kugenda kumubamba ha musaraba.

²¹Kandi bakahambiriza omuhinguzi, Simooni owa Kireene, ise Alekisanda na Rufo, ow'akaba naaruga omu kyaro, ayetweke omusaraba gwa Yesu.

²²Baahikya Yesu omu kiikaro ekirukwetwa Gologota (ekirukumanyisa ngu, kiikaro ky'oruhanga).

²³Baamuha eviini etabwirwemu omubazi; baitu ataginywe.

²⁴Baamubamba ha musaraba; baabagana ebyokujwara bye nibabiterra itomo, okucwamu buli omu eki araatwara.

²⁵Obu baamubambire ha musaraba zikaba ziri saaha isatu.

²⁶Ekihandiiko ekirukumanyisa omusango gwe kikaba nikigamba kiti: “Omukama w'Abayudaaya.”

²⁷Bakamubamba n'abanyagi babiri, omu ha mukono ogw'obulyo, ondi ha gwemoso.

²⁸(Ekyahandiikirwe kyahikirra ekirukugamba kiti: “Akabalirwa hamu n'enkozi z'ebibi.”)

²⁹Abo abakaba nibahingura baamujuma, nibacwa emitwe yabo, nibagamba bati: “Ahaa! Iwe ayagondeze kuseesa Enju ya Ruhanga okagaruka kugyombekera ebiro bisatu,

³⁰wejune wenka, oyehanuule ha musaraba!”

³¹N'abanyakatagara abakuru nabo bakamujuma bali hamu n'abeegesa b'ebiragiro nibagambirangana bati; “Akajuna abandi, baitu tasobora kwejuna wenka.

³²Leka Kristo, Omukama wa Isirairi, hati ayehanuule ha musaraba, nukwo na itwe turole, twikirize.” Kandi abo abakaba babambirwe nawe, nabo baamujuma.

³³Esaaha ya mukaaga obu yahikire, omwirima gwasweka ensi yoona okuhika ha saaha ya mwenda.

³⁴Kandi ha saaha ya mwenda Yesu yayamuza n'iraka likooto ati: “Eli, Eli, lama sabakatani?” Amakuru gaakyo ngu: “Ruhanga wange, Ruhanga wange, ondugiireho ki?”

³⁵Abamu ha basungi obu baahuuliire eki baagamba bati: “Muhurre, naayeta Eriya.”

³⁶Omu hali bo yairuka yaibika ekijumankuba omu marwa agasaliire, yakita ha rubingo, yakimuha anyunyuguze, yagamba ati: “Ka turole Eriya obu araija kumuhanuura ha musaraba.”

³⁷Yesu yayamuza n'iraka likooto, yacwekana.

³⁸Enyigamo y'omu Nju ya Ruhanga yatemukamu habiri, okuruga eruguru okuhika hansi.

³⁹Omukuru w'abaserikale ow'akaba ayemeriire aho amuroleriire, obu yaboine nkooku acwekaine, yagamba ati: “Mazimakwo, omusaija onu abaire ali Mwana wa Ruhanga!”

⁴⁰Kandi hakaba haroho abakazi beemeriire hara baroleriire. Omuli bo hakaba harumu Mariya Magadaleena, na Mariya nyina Yakobbo omuto, na Yose, hamu na Salome.

⁴¹Abo nubo abaamuhonderaga nibamuheereza obu akaba ali omu Galiraaya; kandi hakaba haroho abakazi abandi baingi abaizire nawe Yerusaalemu.

⁴²Eki kikaba kiri kiro eky'Okweteekanirizaamu, nikyo kiro ekyebembera Sabbato. Nahabweki omu rusweko rw'obwire,

⁴³Yosefu owa Arimateya, omukurasi ow'ekitiinisa omu rukurato, nawe akaba naategereza obukama bwa Ruhanga, yagenda hali Pilaato atarukutiina, yasaba omutumbi gwa Yesu.

⁴⁴Pilaato, kyamuhuniriza okuhurra nkooku afire ira, nukwo kweta mukuru w'abaserikale, yamukaguza obu araaba afiirekwo.

⁴⁵Omukuru w'abaserikale obu yamazire kumumanyisa nkooku afiire, yaikiriza Yosefu atwale omutumbi.

⁴⁶Yagura orugoye rwa bafuta, yahanuura omutumbi, yaguzinga omu rugoye oru, yaguta omu kituuro ekikaba kibaizirwe omu mwandara. Hanyuma yakumbya ibaale, yaigarra omunwa gw'ekituuro.

⁴⁷Mariya Magadaleena na Mariya nyina Yose bakarora nambere bataire Yesu.