Read Runyoro - rutooro Mar 16 Bible Online

Mar 16 - Runyoro - rutooro bible

Mar 16

¹Sabbato obu yahoireho, Mariya Magadaleena, na Mariya nyina Yakobbo, na Salome bakagura amagita agarukuboya nukwo bagende basiige omutumbi gwa Yesu.

²Nyenkya kara, ha Sande, ekiro ekibanza omu wiiki, bakagenda ha kituuro izooba liturukire.

³Bakaba nibakaguzangana bati: “Nooha aratukumbiza ibaale kuliiha ha munwa gw'ekituuro?”

⁴Obu baimukize amaiso, baarora ibaale liri erikooto muno likumbiibwe.

⁵Obu bataahire omu kituuro, baarora omusigazi aikaliire ha rubaju rw'obulyo, ajwaire orugoye orurukwera; baahunirra.

⁶Uwe yabagambira ati: “Muleke kuhunirra; mmanyire nimuserra Yesu owa Nazareeti ayabambirwe ha musaraba. Hanu taroho, ahumbuukire; mwije murole nambere bakaba bamutaire.

⁷Hati nu, mugende mugambire abeegesebwa be na Petero ngu, naija kubabanza kuhika Galiraaya, oku nuho mulimurorra nkooku yabagambiire.”

⁸Bbo baaturuka omu kituuro, bairuka bakwasirwe akatukumo kandi nibahunirra; baitu habw'obutiini batagambireho muntu n'omu.

⁹[Yesu obu yahumbuukire, omu rukyakya ha kiro kya Sande, akabanza kubonekera Mariya Magadaleena ou yabingireho emyoyo emibi musanju.

¹⁰Uwe yagenda yagambira abaikaraga hamu na Yesu, abakaba nibaganya kandi nibarra.

¹¹Baitu obu baahuliire nkooku ayomiire, kandi Mariya nkooku amurozire, batabiikirize.

¹²Eki obu kyahoire, akabonekera abandi babiri ali omu nsisana endi, obu bakaba nibagenda omu kyaro.

¹³Nabo baagarukayo baabigambira abandi, baitu batabaikirize.

¹⁴Hanyuma akabonekera ikumi n'omu obu bakaba nibalya; yabahana habw'okutaikiriza kwabu n'okugumangana kw'emitima yabo, habwokuba bataikirize ebi baagambiirwe abo abaamurozire amazire kuhumbuuka.

¹⁵Yabagambira ati: “Mugende omunsi yoona, murangirre abantu boona Amakuru Amarungi.

¹⁶Ogu aliikiriza akabatizibwa nuwe alijunwa; baitu ataliikiriza, omusango gulimusinga.

¹⁷Bunu nubwo oburorwaho obulyoleka abaliikiriza: habw'obusobozi bwange balibinga emyoyo emibi, balibaza endimi empyaka;

¹⁸noobu balikwata enjoka, rundi bakanywa ekirukwita kyona, tibiribakoraho kabi; balita emikono yabo ha barwaire, bakire.”

¹⁹MUKAMA Yesu obu yamazire kubaza nabo, yatwarwa omwiguru, yaikarra ha mukono ogw'obulyo ogwa Ruhanga.

²⁰Abeegesebwa baagenda baabirangirra hoona hoona; MUKAMA naakora hamu nabo kandi naagumya ebigambo byabo n'ebihuniriza ebyabikuraataga. Amiina.]