Read Runyoro - rutooro Mar 2 Bible Online

Mar 2 - Runyoro - rutooro bible

Mar 2

¹Obu haahingwireho ebiro, Yesu yagaruka Kafaranaumu, boona baamanya nkooku ali omuka.

²Abantu baingi bakeesorooza, baijura omu nju; na ha mulyango omwanya gwabura; akaba naabatebeza ekigambo kya Ruhanga.

³Haija abantu, baamuleetera omurwaire azingamire, ahimbirwe abasaija bbana.

⁴Obu baabuzirwe h'okumumuhikizaaho habw'obwingi bw'abantu, baasakurra orusu rw'enju haiguru ya Yesu mbere akaba ali; obu baamazire kutunga omwanya gw'okumurabyamu, baamusirimurra ha katabu aka akaba abyamireho.

⁵Yesu obu yarozire nkooku baina okwikiriza, yagambira ekizingo ati: “Mwana wange, ebibi byawe bikuganyirwe.”

⁶Nukwo abamu ha beegesa b'ebiragiro abakaba baikaliire aho, kwekaguza bati:

⁷“Omusaija onu kiki ekirukumugambisa kiti? Naajuma Ruhanga! Nooha asobora kuganyira ebibi atali Ruhanga wenka?”

⁸Yesu obu yakengere nkooku barukwekaguza bati, yagaruka yabakaguza ati: “Kiki eki murukwekaguliza muti omu mitima yanyu?

⁹Ekirukukira kurahuka kiraha, kugambira ekizingo nti: ‘Ebibi byawe bikuganyirwe,’ rundi kugamba nti: ‘Imuka, ohimbe akatabu kaawe, orubate’?

¹⁰Hati ka mumanye Omwana w'omuntu nkooku aina obusobozi omunsi obw'okuganyira ebibi.” Nubwo yagambiire ekizingo ati:

¹¹“Ninkuragira nti: Imuka, ohimbe akatabu kaawe, otaahe.”

¹²Uwe yaimuka, ahonaaho yahimba akatabu ke, yaturuka aheeru boona bamuroleriire; nukwo bbo kutangaara, baakugiza Ruhanga nibagamba bati: “Ekintu nka kinu titukakiroraga!”

¹³Yesu akagaruka kugenda ha musa gw'enyanja; ekitebe kyona kyamwesoroolezaaho, uwe yabeegesa.

¹⁴Obu akaba naahingura, yarora Leevi, mutabani wa Alifaayo, aikaliire omu isoroolerezo ly'omusoro, yamugambira ati: “Mpondera.” Nawe yaimuka, yamuhondera.

¹⁵Kandi obu akaba aikaliire omunju ya Leevi naalya, abasorooza b'omusoro baingi n'abasiisi bakaba bailkaliire nawe n'abeegesebwa be; habwokuba hakaba haroho baingi abaamuhondiire.

¹⁶Abeegesa b'ebiragiro ab'omu Bafalisaayo obu baamurozire naalya n'abasiisi n'abasorooza b'omusoro, nukwo kukaguza abeegesebwa be bati: “Habwaki naalya kandi naanywa n'abasooroza b'omusoro n'abasiisi?”

¹⁷Yesu obu yakihuliire, yabagarukamu ati: “Aboomeezi tibeetaaga mufumu, baitu ayetaagwa abarwaire; ntaizirre kweta abahikiriire baitu abasiisi.”

¹⁸Omu kasumi ako abeegesebwa ba Yohaana Omubatiza n'Abafalisaayo bakaba nibasiiba; abantu baija baakaguza Yesu bati: “Habwaki abeegesebwa ba Yohaana n'ab'Abafalisaayo nibasiiba, kunu abaawe batarukusiiba?”

¹⁹Yesu yabagarukamu ati: “Abagenyi basobora kusiiba kunu omuswezi ainabo? Obu baba bakyali na omuswezi, tibasobora kusiiba.

²⁰Akasumi kalihika kigabura obu alibaihwaho, ha kiro eki nubwo balisiiba.

²¹Tiharoho n'omu abazirirra ekikoba kihyaka ha kijwaro kikuru. Kakuba akorakwo, ekikoba kitaagura ekijwaro kandi ekihuru kigalihira kimu.

²²Kandi tiharoho muntu anyakuta eviini ey'ehiira omu ndyanga enkuru. Kakuba akorakwo, endyanga ebbaruka, eviini eseeseka, n'endyanga esiisikara; baitu eviini ey'ehiira bagita omu ndyanga empyaka.”

²³Ha Sabbato emu, Yesu akaba naaraba omu misiri y'engano, kandi abeegesebwa be, obu bakaba nibahingura, baatandika kucwa entwe z'engano.

²⁴Nukwo Abafalisaayo kukaguza Yesu bati: “Abeegesebwa baawe, habwaki bakora ekitarukwikirizibwa Biragiro bya Musa ha Sabbato?”

²⁵Yesu yabagarukamu ati: “Timukasomaga Daudi eki yakozire obu yarumirwe enjara naayetaaga ebyokulya, uwe hamu n'abo aba akaba ainabo?

²⁶Akataaha omu Nju ya Ruhanga, Abiyasaali obu akaba ali mukuru w'Abanyakatagara, yalya emigaati ey'ekaba ehongiirwe Ruhanga, niyo etarukwikirizibwa kuliibwa muntu weena kwihaho baanyakatagara, kandi yagiha n'abo aba akaba ainabo.”

²⁷Akongera yabagambira ati: “Sabbato ekateebwaho habw'omuntu, baitu omuntu atateebweho habwa Sabbato;

²⁸nahabweki Sabbato nayo Omwana w'omuntu nuwe MUKAMA wayo.”