Read Runyoro - rutooro Mar 3 Bible Online

Mar 3 - Runyoro - rutooro bible

Mar 3

¹Yesu akagaruka yataaha omu isorrokaniro; yasangamu omusaija ow'akaba akabire omukono.

²Baamuhanga amaiso, barole obu araaba naija kumukiza ha Sabbato, nukwo bamunyegerre.

³Yagambira omusaija ow'akaba akabire omukono ati: “Ija hanu.”

⁴Nubwo yabakagwize ati: “Nikiikirizibwa Ebiragiro bya Musa kukora ekirungi ha Sabbato rundi ekibi? Okujuna obwomeezi rundi kubwita?” Baitu bbo baaculeera.

⁵Yababungyamu amaiso aina ekiniga, asaalirwe habw'okutahwituka kw'emitima yabu, nukwo kugambira omusaija ati: “Gorra omukono gwawe.” Yagugorra, omukono gwe gwakira.

⁶Abafalisaayo baaturuka aheeru, baatandika ahonaaho kuhanuura n'ab'ekitebe kya Herode nkooku baraamwita.

⁷Yesu yarugayo n'abeegesebwa be, yagenda ha musa gw'enyanja; kandi ekitebe ky'abantu baingi abaarugire Galiraaya baamukuraatira. Abandi baingi abaarugire Buyudaaya,

⁸Yerusaalemu, na Idumaaya, n'abaarugire nseeri ya Yorudaani, n'ab'omu bicweka ebiherraine Tiiro na Sidooni obu baahulire byona ebi yakozire, baija nambere ali.

⁹Yaragira abeegesebwa be kumutungira obwato habw'abantu kuba baingi, nukwo baleke kumufunza.

¹⁰Uwe akaba akirize baingi nukwo boona abakaba barwaire kusindikangana, bamukwateho.

¹¹Abantu abakaba baina emyoyo emibi obu baamurozire, baagwa omu maiso ge, nibaamuza bati: “Iwe oli Mwana wa Ruhanga.”

¹²Baitu uwe akabateererra muno okutamurangaaniza omu bantu.

¹³Yatemba omu nsozi, yayeta abo aba yagondeze kumuhondera. Bbo baija nambere ali.

¹⁴Yakomamu ikumi na babiri kwikara nawe, kandi abatumege okurangirra Amakuru Amarungi.

¹⁵Yabaha obusobozi obw'okubinga emyoyo emibi.

¹⁶Nubo banu: Simooni ou yarukire Petero;

¹⁷Yakobbo mutabani wa Zebedaayo na Yohaana owanyina aba yarukire ibara Boanerege, amakuru gaalyo ngu: bantu ababiihirwa bwango;

¹⁸Andereya na Filipo, Batolomayo na Matayo, Tomasi na Yakobbo mutabani wa Alifaayo, Tadeo na Simooni omurwanirizi w'ihanga lye,

¹⁹na Yuda Isikalyota ayamugobiize. Hanyuma yataaha omu ka.

²⁰Ekitebe ky'abantu kyagaruka kyayesorooza, nahabweki Yesu n'abeegesebwa be batasobole kulya.

²¹Abe'ka y'owaabu obu baakihuliire, baaturuka kumwiha omu kitebe habw'okuhurra abamu nibagamba bati: “Ahunguutukire.”

²²Abeegesa b'ebiragiro abaarugire Yerusaalemu bakagamba bati: “Ataahirwemu Beelizebuli, mukuru w'emyoyo emibi, kandi habw'obusobozi bwe nikyo arukugibingira.”

²³Baitu Yesu yabeeta, yabeegesa omu nfumo ati: “Sitaani asobora ata kubinga Sitaani?

²⁴Kakuba obukama bwebaganizaamu bwonka, tibusobora kwikaraho.

²⁵Kakuba n'eka eyebaganiizaamu yonka, nayo tesobora kwikaraho.

²⁶Sitaani obu araaba ayebaganizemu kwerwanisa wenka, tasobora kwikaraho, ahwerekerra.

²⁷Ningira tiharoho muntu asobora kutaaha enju y'omusaija ow'amaani akanyaga ebintu bye, rundi buli abandize kumuboha, nukwo anyage eby'omu njuye.

²⁸“Mazimakwo nimbagambira nti: Abantu baliganyirwa ebibi byabo byona, n'ebijumo byona ebi bajuma Ruhanga;

²⁹baitu weena anyakujuma Mwoyo Ahikiriire taliganyirwa, ekibi kye kirimusingisa omusango ebiro byona”

³⁰ekyamugambisize eki nukwo bbo kugira ngu: “Aina omwoyo omubi.”

³¹Nyina Yesu na bagenzi be bakaija, baayemerra aheeru baamutumaho nibamweta.

³²Ekitebe ky'abantu kikaba kiikaliire kimwehinguliriize; abatumirwe nukwo kumugambira bati: “Nyoko na bagenzi baawe bali aheeru nibakweta.”

³³Uwe yabagarukamu ati: “Mau nuwe oha, na bagenzi bange nubo baha?”

³⁴Yabungyamu amaiso abo abakaba bamwehinguliriize, yagamba ati: “Mau na bagenzi bange nubo banu!

³⁵Weena anyakukora Ruhanga eki agonza, nuwe mugenzi wange, nuwe munyaanya nyowe, kandi nuwe mau.”