Read Runyoro - rutooro Mar 4 Bible Online

Mar 4 - Runyoro - rutooro bible

Mar 4

¹Yesu yayongera yatandika kwegesa ha musa gw'enyanja. Ekitebe ky'abantu baingi muno kyamwesorolezaaho, nukwo kutemba omu bwato yabwikarramu buli ha nyanja, kandi n'ekitebe kyona ky'abantu kikaba kiri ha musa gw'enyanja.

²Yabeegesa ebintu bingi omu nganikyo; omu kwegesa kwe akabagambira ati:

³“Mutege amatu! Omusigi akatura okusiga.

⁴Obu akaba naasiga, embibo ezimu zaaragara ha muhanda rubaju, enyonyi zaija, zaazisoma.

⁵Embibo ezindi zaagwa ha itaka erya ha mwandara nambere hakaba hatali itaka lingi, ahonaaho zaamera; baitu habw'itaka kutahama,

⁶omusana obu gwajwire gwazookya, kandi habw'okutagira mihama zaahotoka.

⁷N'ezindi zikagwa omu mahwa, amahwa obu gaakuzire, gaazinyoroza, tizaayana.

⁸Embibo ezindi zaagwa omu itaka erirungi, zaakura, zaakanya, ezimu zaayana makumi asatu, ezindi nkaaga, n'ezindi kikumi.”

⁹Yayongera yabagambira ati: “Anyakwina amatu, ahurre.”

¹⁰Baitu obu akaba ali wenka, ikumi na babiri hamu n'abo abakaba bamwehinguliriize baamukaguza amakuru ag'enganikyo ezi.

¹¹Yabagambira ati: “Inywe mukasuukulirwa ensita ez'obukama bwa Ruhanga, baitu ab'aheeru, bbo byona bibaganikizibwa omu nganikyo;

¹²nukwo kurora barora, baitu batahweza; kandi kuhurra bahurra, baitu batahwituka; tibaikara kuhinduka bakaganyirwa.”

¹³Kandi yabakaguza ati: “Orufumo oru timurwetegeriize? Kandi enganikyo ezindi zoona mulizeetegereza muta?

¹⁴Omusigi eki asiga nikyo kigambo kya Ruhanga.

¹⁵Embibo eza ha muhanda rubaju nambere ekigambo kisigirwe, nubo abarukuruga kuhurra bati, ahonaaho Sitaani aija abaihamu ekigambo ekibabairwenu.

¹⁶Kandi omu mulingo nugwo gumu, ezi ezabyairwe ha itaka erya ha mwandara, nubo abo abahurra ekigambo, bakakiikiriza n'okusemerewa;

¹⁷baitu habw'okutahama, bagumiisiriza akasumi kake, kandi obu habaho emihito rundi okuhiiganizibwa habw'ekigambo eki, ahonaaho bagwa.

¹⁸N'ezindi nizo ezaagwire omu mahwa; nubo abo abahurra ekigambo,

¹⁹baitu habw'okumaliza omutima ha by'ensi, n'okutwalirizibwa obuguuda, n'okururuukira ebintu ebindi, bibataahamu, binyoroza ekigambo eki, tikyaana bijuma.

²⁰Baitu ezi ezaasigirwe omu itaka erirungi, nubo abo abahurra ekigambo, bakakiikiriza, bakakora ebikorwa ebirungi, abamu kukira ha makumi asatu, abandi nkaaga, n'abandi kikumi.”

²¹Yesu yayongera yabagambira ati: “Etaara ereeterwa kujuumikirwa ekigega rundi kugita omu madaara g'ekitabu? Tereeterwa kuhanikwa ha kikondo kyayo?

²²Habwokuba busaho na kimu ekiserekerwe ekitalizonzoorwa; rundi eky'ensita ekitalimanywa burole.

²³Weena anyakwina amatu, ahurre.”

²⁴Kandi yabagambira ati: “Mwegendereze eki muhurra, endengo ei mulengesa, na inywe niyo mulirengerwa, kandi n'okwongerwaho mulyongerwaho.

²⁵Habwokuba anyakwina ebingi, alyongerwaho; baitu anyakwina ebike, nabyo birimwihwaho.”

²⁶Yayongera yagamba ati: “Obukama bwa Ruhanga nibusisana nk'omuntu ayasigire embibo omu itaka,

²⁷akagwijagira kandi akasisiimuka, ekiro na nyamusana embibo ikamera, ikakura, atamanyire mimerre n'emikurre yazo

²⁸Itaka niryo lizimeza lyonka; habanza obukoora, hataho entwe, hakurataho enjuma ha ntwe.

²⁹Baitu enjuma obu zimara kwera, ahonaaho aleeta omuhyo, agesa, habwokuba igesa lihikire.”

³⁰Yayongera yagamba ati: “Obukama bwa Ruhanga turabulengesaniza na ki? Rundi turabusoboroza rufumo ki?

³¹Nibusisana nk'akasigo ka karadaali; nambere kasigirwa omu itaka, kaba kali kajuma katoito okukira embibo zoona eziri omu nsi; [1]

³²baitu obu kasigwa, kakura, kafooka kisaka kikooto ekirukukira ebisaka ebindi byona, kinaga amataagi makooto, nukwo n'enyonyi zoombeka ebiju omu kiituuru ky'amataagi gaakyo.”

³³Akabagambira ekigambo kya Ruhanga naakirabya omu nganikyo nyingi nk'ezi, nkooku bakaba nibasobora kukihurra;

³⁴atasobole kubagambira kintu kyona atakirabize omu ruganikyo; baitu abeegesebwa be bonka, nubo yasoborraga byona ha rubaju.

³⁵Ha kiro eki orwebagyo, omu kasweko k'obwire, akabagamba ati: “Twambuke nseeri.”

³⁶Baasiga aho ekitebe ky'abantu, baamutwarra omu bwato buli, obu akaba arumu; kandi amaato agandi gaagenda nawe.

³⁷Haimuka ihunga lingi n'ebigonzi byaseeseka omu bwato, bukaba buli haihi kwijura.

³⁸Baitu uwe akaba ali ha kiso ky'enyuma, ayesagwire ekisago, agwijagire. Baamusisiimura, nibamugambira bati: “Mwegesa, torukutufaaho? Ka twafa!”

³⁹Yasisiimuka, yacoomera omuyaga, kandi yagambira enyanja ati: “Teeka! Culeera!” Omuyaga gwagwa n'enyanja yaculeera, haabaho okuteekana kwingi.

⁴⁰Yabakaguza ati: “Mutiiniire ki? Timwina kwikiriza?”

⁴¹Baitu bbo baatiina muno, nukwo kukaguzangana bati: “Mara onu muntu ki arukuragira ihunga n'enyanja, bikamuhurra?”