Read Runyoro - rutooro Mar 5 Bible Online

Mar 5 - Runyoro - rutooro bible

Mar 5

¹Baahika nseeri y'enyanja, omunsi y'Abageraseene.

²Yesu obu yarugire omu bwato, yatangaana omusaija akwasirwe omwoyo mubi, ow'akaba naaruga omu bituuro

³nambere yaikaraga. Busaho n'omu ow'akaba naasobora kumuboha noobwakubaire kumubohesa orujegere;

⁴habwokuba emirundi nyingi baamubohesaaga empingo n'enjegere, baitu enjegere yaicwaaga, kandi n'empingo azicwacwana; hataroho ow'akaba aina amaani ag'okumuculeeza.

⁵Ekiro na nyamusana yaikaraga naayamuliza omu bituuro na ha nsozi, naayehutaaza n'amabaale.

⁶Obu yalengiire Yesu, yairuka, yamuteereza amaju;

⁷yayamuza n'iraka likooto ati: “Yesu, Omwana wa Ruhanga anyakuli haiguru muno, noontura ki? Ninkurahira omu ibara lya Ruhanga, otancanza.”

⁸Habwokuba Yesu akaba agugambiire ati: “Murugeho, iwe omwoyo omubi!”

⁹Yesu nukwo kugukaguza ati: “Ibara Iyawe niryo liha?” Gwagarukamu guti: “Ibara lyange ninyowe Ihe; habwokuba tuli baingi.”

¹⁰Gwamwesengereza muno aleke kugubinga omunsi omu.

¹¹Haihi aho ha mbanda y'orusozi hakaba haroho igana lingi ly'empunu nizirya;

¹²emyoyo emibi yamwesengereza eti: “Tusindike omu mpunu ezi, nizo tutaahemu.”

¹³Yagiikiriza. Emyoyo emibi yaruga omu muntu ogu, yataaha omu mpunu; kandi igana ly'empunu ezirukuhika nk'enkumi ibiri, zaajumbutuka, zaakonkomoka enengo, zaagwa omu nyanja, zaafeeramu.

¹⁴Abaliisa bairuka baakisubirra ab'omu rubuga n'ab'omu byaro. Abantu baija kurora ekibaireho.

¹⁵Baahika hali Yesu, baasanga omuntu ogu ow'akaba akwasirwe omwoyo omubi aikaliire, ajwaire, kandi ateekaine nuwe ogu ow'akaba akwasirwe ihe ery'emyoyo emibi; baayekanga.

¹⁶Abaakirozire baabasoborra ekibaireho omuntu ogu ow'akaba aroho emyoyo emibi, n'ebibaireho empunu.

¹⁷Kandi bbo baatandika kwesengereza Yesu aruge omu mitaano yabo.

¹⁸Uwe obu akaba naataaha omu bwato, omusaija ow'akaba akwasirwe emyoyo emibi yaija, yamwesengereza amwikirize kwikara nawe.

¹⁹Baitu Yesu yayanga, yamugambira ati: “Taaha owaanyu omu bagenzi baawe, obagambire ebikuru MUKAMA ebi akukoliire, kandi n'embabazi ezi akugiriire.”

²⁰Yagenda yatandika kurangirra ab'omu kicweka ky'Embuga Ikumi byona Yesu ebi yamukoliire; abantu boona baatangaara.

²¹Yesu obu yayambukiire omu bwato, yagaruka nseeri y'enyanja, kandi ekitebe ky'abantu baingi kyamwesoroolezaaho; yaikara ha musa gw'enyanja.

²²Aho haija omu ha bakuru b'isorrokaniro, ibara lye Yairo. Obu yarozire Yesu, yagwa ha bigere bye,

²³yamwesengereza naagamba ati: “Muhara wange ali haihi kufa. Ija omuteho emikono yaawe, nukwo akire, kandi ayomeere.”

²⁴Yesu yagenda nawe. Ekitebe ky'abantu baingi kyamuhondera kimugoteriire.

²⁵Hakaba haroho omukazi ayamazire emyaka ikumi n'ebiri arwaire akejwiso.

²⁶Abafumu baingi bakaba balengereho kumutambira, kandi akaba amaliizeyo ebye byona, ataraarwe naakake baitu akeeyongera kuba kubi.

²⁷Akaba ahuliire ebi baagambahoga Yesu, yamuruga enyuma naaraba omu kitebe ky'abantu, yamwirra haihi, yakwata ha kijwaro kye.

²⁸Akagumya ati: “Noobu ndakwataho kwonka ekijwaro kye ndaakira.”

²⁹Ahonaaho akejwiso ke kaayoma; kandi yayehurra omu mubiri gwe nkooku akiziibwe endwara ye.

³⁰Yesu obu yamanyire amaani agamurugiremu, ahonaaho yahindukira ekitebe ky'abantu yakaguza ati: “Nooha akwasire ha bijwaro byange?”

³¹Abeegesebwa be baamugarukamu bati: “Noorora ekitebe ky'abantu nkooku kirukukufunza, kandi nookaguza ngu: ‘Nooha ankwasireho?’ ”

³²Baitu uwe yamagamaga kurora ow'amukwasireho.

³³Omukazi habw'okumanya ekimukozirweho, yaija naatiina kandi naatukumira, yajuumara hansi omu maiso ge, yamugambirra kimu amazima goona.

³⁴Nukwo Yesu kumugambira ati: “Mwisiki wange, okwikiriza kwawe nukwo kukukirize; genda n'obusinge, okirre kimu endwara yaawe.”

³⁵Yesu obu akaba naakyabaza, haija abarukuruga mb'omukuru w'isorrokaniro, baamubikira bati: “Muhara waawe afiire. Omwegesa nokyamujwahiza ki?”

³⁶Baitu Yesu eki tiyakitaho mutima, yagambira omukuru w'isorrokaniro ati: “Otatiina, ikiriza kwonka.”

³⁷Kandi ataikirize muntu weena kugenda nawe, kwihaho Petero, Yakobbo, na Yohaana owanyina Yakobbo.

³⁸Obu baahikire ha nju y'omukuru w'isorrokaniro, Yesu yarora abantu abarukurabanganamu, abamu nibarra kandi nibateera empamo.

³⁹Obu yataahiremu yabakaguza ati: “Nimurabanganiramu ki kandi nimulizibwa ki? Omwana tafiire, baitu agwijagiire.”

⁴⁰Bbo baamusekeereza. Baitu boona yabaturukya aheeru, yatwara ise omwana na nyina, n'abo aba yaizire nabo, yahingura omu kisiika omwana nambere akaba ali.

⁴¹Yamukwata ha mukono, yamugambira ati: “Talita kuumi;” amakuru gaakyo ngu: “Kaisiki iwe, ninkugambira nti: Imuka.”

⁴²Ahonaaho omwisiki yaimuka, yatandika kurubata; akaba ali w'emyaka ikumi n'ebiri y'obukuru. Abantu obu baarozire eki, baahuniira.

⁴³Yabateererra kutamanyisa muntu weena, kandi yaragira bahe omwisiki ekyokulya.