Read Runyoro - rutooro Mar 6 Bible Online

Mar 6 - Runyoro - rutooro bible

Mar 6

¹Oku yarugayo, yagenda omunsi y'owaabu; abeegesebwa be baagenda nawe.

²Ha Sabbato yatandika kwegesa omu isorrokaniro; kandi abaingi abaamuhuliire baahunirra nibagamba bati: “Omusaija onu, binu byona akabiiha nkaha? Magezi ki aga yahairwe? Ebi arukukora ka nibihuniriza!

³Onu tinuwe mubaizi, mutabani wa Mariya, mugenzi wa Yakobbo na Yose na Yuda na Simooni; kandi banyaanya titwombekere nabo owaitu?” Nukwo kumwanga.

⁴Baitu Yesu yabagambira ati: “Omurangi aheebwa ekitiinisa hoona hoona, okwihaho omunsi y'owaabu, omu ruganda rwe, n'omuka ye.”

⁵Oku atasobole kukorayo kyamahano na kimu, kwihaho kuta emikono ye ha barwaire bake, yabakiza.

⁶Yahunirra habw'okutaikiriza kwabo. Kandi yagendagendaga omu byaro naayegesa.

⁷Yayeta ikumi na babiri, yatandika kubatuma babiri babiri, kandi yabaha obusobozi bw'okubinga emyoyo emibi.

⁸Yabateererra kutatwara kintu kyona omu rugendo rwabo, kwihaho omwigo; kutatwara ntanda, rundi ensaho, noobu zaakuba sente omu nsaho z'enkoba zaabo;

⁹baitu bagende bajwaire enkaito, kandi batatwara kanzu ya kabiri.

¹⁰Yayongera yabagambira ati: “Enju ei murataahamuga, niyo mwikalemu okuhika obu mulirugayo.

¹¹Nambere bataabajwahukirrege kandi bakanga kuhurra ebi murukugamba, obu muraabaga nimurugayo, muteerateere ecuucu y'omu bigere byanyu, bubege bwakaiso obw'okubasingisa omusango.”

¹²Bbo baagenda nibatebeza abantu nkooku basemeriire kwegarukamu.

¹³Bakabinga emyoyo emibi nyingi, kandi baasiiga amagita abarwaire baingi, baabakiza.

¹⁴Omukama Herode ebi yabihurra, habwokuba ibara lya Yesu likaba limazire kurangaanwa. Abamu bakagamba bati: “Yohaana Omubatiza ahumbuukire omu bafu, nikyo arukukorra eby'amaani binu.”

¹⁵Baitu abandi bakagamba bati: “N'Eriya.” N'abandi bagira bati: “Murangi, nk'omu ha barangi aba ira.”

¹⁶Baitu Herode obu yahuliire ebi, yagamba ati: “Yohaana ou naacwireho omutwe, ahumbuukire.”

¹⁷Herode akaba amazire kutuma abantu bakwate Yohaana, bamubohe, bamute omu nkomo habwa Herodiya muka Filipo mugenzi we; habwokuba Herode akaba amuswire.

¹⁸Nukwo Yohaana kuhana Herode ati: “Ebiragiro bya Musa tibirukukwikiriza kuswera muka mugenzi waawe.”

¹⁹Herodiya nikyo yamurwaliize enzigu, kandi yagonza kumwita; baitu atasobole,

²⁰habwokuba Herode akaba naatiina Yohaana, naamanya nkooku ali muntu ahikiriire kandi arukwera; yamulinda kurungi. Obu yahuliire Yohaana ebi yamuhanire, yasoberwa muno; baitu nabwo yamutamuga ekitiinisa.

²¹Akasumi akasemeriire kaahikira ha kiro ky'okwijukiraho okuzaarwa kwa Herode, yacumbira abakurasi be, n'abakuru b'abaserikale, n'abantu abakuru aba Galiraaya obugenyi.

²²Muhara wa Herodiya obu yaizire, yacekeca, yasiimwa Herode n'abagenyi be. Omukama nukwo kugambira omwisiki ati: “Nsaba kyona eki orakagonza, ndaakikuha.”

²³Yamurahira ati: “Kyona kyona eki oransaba, ndaakikuha, noobu kiraaba ekicweka ky'obukama bwange.”

²⁴Omwisiki yaturuka aheeru, yakaguza nyina ati: “Nsabe ki?” Nyina yamugarukamu ati: “Saba omutwe gwa Yohaana Omubatiza.”

²⁵Omwisiki atabandaale yagaruka hali omukama, yamusaba naagamba ati: “Ningonza bwango ompeere ha sahaani hanu omutwe gwa Yohaana Omubatiza.”

²⁶Omukama yasaalirwa muno; baitu habw'okusangwa yarahira, n'okutiina kuswara hali abagenyi be, atagonze kucwa eki yarahiire omwisiki.

²⁷Nukwo omukama kutuma ahonaaho omu ha baserikale be abalinzi, yamuragira aleete omutwe gwa Yohaana. Omuserikale yagenda omu nkomo, yamutemaho omutwe,

²⁸yaguleetera ha sahaani, yaguha omwisiki; kandi omwisiki yagutwarra nyina.

²⁹Abeegesebwa ba Yohaana obu baahuliire eki, baija baatwara omutumbi gwe, baaguziika omu kituuro.

³⁰Abakwenda bakagaruka hali Yesu baamugambira byona ebi baakozire n'ebi baayegeseze.

³¹Uwe yabagambira ati: “Mwije inywenka tugende ha rubaju, muhuumuleho”; habwokuba abantu baingi bakaba nibaija, abandi nibagenda; habweki abeegesebwa batatunge noobu kaakuba akaanya ak'okulya.

³²Baagwerra bonka omu bwato, baagenda ha rubaju.

³³Baitu abantu baingi baabarora nibagenda, baabamanyirra; baaruga omu byaro byona nibairuka baababanzaayo.

³⁴Yesu obu yarugire omu bwato yarora ekitebe ky'abantu baingi, yabakwatirwa embabazi, habwokuba bakaba nibasisana entaama ezitaina muliisa; yatandika kubeegesa ebintu bingi.

³⁵Obwire obu bukaba buli haihi kwira, abeegesebwa be baamwizira nibagamba bati: “Linu irungu, kandi n'obwire bwasa kwira;

³⁶raga abantu, bagende omu maka n'omu byaro ebiri haihi, beegurreyo ebyokulya.”

³⁷Baitu uwe yabagarukamu ati: “Inywe mubahe ebyokulya.” Nabo baamukaguza bati: “Tugende tugule emigaati ya edinaali [2] niyo tubahe balye?”

³⁸Nandiki uwe ati: “Mwinaho emigaati ingaha? Mugende murole.” Obu baamazire kwetegereza, baamugarukamu bati: “Twinaho emigaati etaano n'encu ibiri.”

³⁹Nubwo yaragiire boona kwegaba omu bitebe, baikarre hansi ha bunyansi obubisi.

⁴⁰Baikarra omu bitebe bya kikumi-kikumi n'ebya makumi ataano-ataano.

⁴¹Yakwata emigaati etaano n'encu ibiri, yararamira ha iguru, yasiima; emigaati yagicwamu, yagiha abeegesebwa be bagigabire abantu; kandi n'encu ibiri yaigabira boona.

⁴²Boona baalya, baiguta.

⁴³Hanyuma baasorooza oburagalika bw'emigaati n'obw'encu bwaijuza ebigega ikumi na bibiri.

⁴⁴Abo abaaliire emigaati baahikaga basaija enkumi itaano.

⁴⁵Ahonaaho Yesu yaragira abeegesebwa be okugwerra omu bwato, bumabanze kwambuka nseeri Betisaida, uwe nakyaraga abantu.

⁴⁶Obu yamazire kubaraga, yatemba omu busozi kubaza na Ruhanga.

⁴⁷Obwire obu bwaizire, obwato bwasangwa buli omu nyanja hagati, uwe asigaire wenka ha bwerre.

⁴⁸Yarora nkooku bakaba nibalemesibwa kugoya obwato habwokuba omuyaga gukaba gubaturukire omu maiso. Ha saaha nka ikumi z'ekiro yabaizira naarubatira ha maizi. Yasisana kubahinguraho,

⁴⁹baitu obu baamurozire naarubatira ha maizi, baatekereza ngu muzimu, baayamuza;

⁵⁰habwokuba boona bakamurora, baayekanga. Ahonaaho yabahuumuza ati: “Muhuumule, ninyowe; mutatiina.”

⁵¹Yatemba omu bwato nambere bakaba bali; omuyaga gwaculeera. Kandi baatangaara muno;

⁵²habwokuba batasoborokerwe eby'emigaati habw'okutahwituka.

⁵³Obu baamazire kwambuka, baahika omu nsi ya Genesareeti; obwato bwabu baabusibika ha musa.

⁵⁴Obu baarugire omu bwato, ahonaaho abantu baamanyirra Yesu,

⁵⁵baatandika kurabangana omu byaro ebiherraineho, baaleeta abarwaire, babahimbiire ha butabu bwabu, nibabamusangisa hoona ha baahurraga ali.

⁵⁶Hoona nambere yahikaga, omu byaro rundi omu mbuga rundi omu masamba baabyamyaga abarwaire omu ntangatangano, nibamwesengereza ngu, haakire bakwate ha mukugiro gw'ekijwaro kye; kandi boona abaakwasireho bakakira.