Read Runyoro - rutooro Mar 7 Bible Online

Mar 7 - Runyoro - rutooro bible

Mar 7

¹Abafalisaayo obu baamwesoroliizeho n'abandi ha beegesa b'ebiragiro abakaba barugire Yerusaalemu,

²bakarora abamu ha beegesebwa ba Yesu nibalya batanaabire engaro.

³(Habwokuba Abafalisaayo n'Abayudaaya boona tibalya batanaabire omu ngaro, nibalinda emigenzo y'abaisenkurubo;

⁴obu baarugaga omu katale, tibalyaaga batakoogere; kandi baina emigenzo endi nyingi ei baalindaga: Nk'okwogya ebikopo, ebinaga, n'ebibindi eby'omulinga.)

⁵Abafalisaayo n'abeegesa b'ebiragiro nukwo kumukaguza bati: “Habwaki abeegesebwa baawe batahondera emigenzo y'abaisenkuruitwe, baitu balya batanaabire engaro?”

⁶Yabagarukamu ati: “Bagobya inywe, Isaaya ebi yarangire hali inywe bikahika nkooku kyahandiikirwe kiti: ‘Ab'ihanga linu bampaisaniza n'ebigambo byabo, baitu emitima yabo tendoho;

⁷bandamiza busa, nibeegesa ebyatairweho abantu ngu niyo nyegesa ya Ruhanga.’

⁸“Muleka Ebiragiro bya Ruhanga, mugumira ha migenzo y'abantu.”

⁹Yayongera yabagambira ati: “Ka mwina amagezi maingi ag'okwanga Ebiragiro bya Ruhanga, nukwo mugumire ha migenzo yanyu!

¹⁰Ningira Musa akagamba ati: ‘Otiinege sso na nyoko;’ kandi ati: ‘Anyakujuma ise rundi nyina, mazimakwo aitwege’;

¹¹baitu inywe mugamba muti: ‘Omuntu kakuba agambira ise rundi nyina ati: Eki naakuhaire niyo Korbaani’ (amakuru gaakyo ngu: kihongiirwe Ruhanga)

¹²muba mutakyamwikiriza kukorra ise na nyina ekirungi kyona.

¹³Nukwo mudibya ekigambo kya Ruhanga habw'emigenzo yanyu ei mugweterangana. Kandi mukora n'ebindi bingi nk'ebi.”

¹⁴Akagaruka yayeta abantu, yabagambira ati: “Inywena mumpurre kandi mwetegereze;

¹⁵busaho kintu ekiruga aheeru y'omuntu ekisobora kumusiisa; baitu ekimuruga omu nda nikyo kimusiisa.

¹⁶Anyakwina amatu, ahurre.”

¹⁷Obu yarugire omu bantu, amazire n'okutaaha omu nju, abeegesebwa be baamukaguza amakuru g'orufumo oru.

¹⁸Yabagarukamu ati: “Na inywe timukeetegeriize? Timurukumanya ngu, ekintu kyona ekiruga aheeru kikataaha omu muntu tikisobora kumusiisa?

¹⁹Habwokuba tikitaaha omu mutima gwe, baitu kitaaha omu nda ye, kirabamu, kituruka aheeru.” (Nukwo yagumize ati ebyokulya byona nkooku biri birungi.)

²⁰Yayongera ati: “Ekiruga omu muntu nikyo kimusiisa;

²¹habwokuba omu mutima gw'omuntu omunda nuho haaruga ebiteekerezo ebibi, obusiihani bw'abahuuru, obusuma, obwisi, n'obusiihani bw'abaswire n'abaswirwe,

²²okwegomba kubi, itima, obucwangya, orwanju, ihali, okuhangirra, okwehaisa, n'obudoma.

²³Ebibi ebi byona biruga omu muntu omu nda, kandi nibyo bimusiisa.”

²⁴Yesu yaimuka yarugayo, yagenda omunsi ya Taya na Sidooni. Obu yahikireyo, yataaha omu nju, atagonze muntu weena amanye nambere ali; baitu nabwo atasobole kwesereka.

²⁵Ahonaaho omukazi ow'akaba aina muhara we aroho omwoyo omubi, obu yamuhuliireho, yaija, yagwa ha bigere bye.

²⁶Kandi omukazi ogu akaba ali Mugiriiki, nzaarwa ya Fonisiya. Yamwesengereza abinge omwoyo omubi guruge ha muhara we.

²⁷Yesu yamugarukamu ati: “Leka abaana bonyini babanze balye, baigute, habwokuba tikirukuhika kwaka abaana ebyokulya, okabinagira embwa.”

²⁸Baitu omukazi yamugambira ati: “Ego, Waitu, baitu embwa ezibunda hansi y'emeeza nazo zirya oburagalika bw'ebyokulya by'abaana.”

²⁹Nandiki Yesu ati: “Habw'okugarukamu oti, ogende n'obusinge; muhara waawe, omwoyo omubi gumurugireho.”

³⁰Omukazi yataaha omuka, yasanga omwana abyamire omu kitabu, omwoyo omubi gumurugireho.

³¹Yesu yagaruka naaruga omu kicweka kya Taya, yaraba Sidooni, yahika ha nyanja ya Galiraaya naaraba omu isaza ly'Embuga Ikumi.

³²Nuho baamuleetiire omusaija kiigaramatu kandi arukuhebebera; baamwesengereza amuteho emikono.

³³Obu yamwihire omu kitebe ky'abantu, amutwaire ha rubaju, yata enkumu ze omu matu ga kiigara, kandi yacwa amacwanta, yamukora ha rulimi;

³⁴obu yarozire haiguru, yasinda, yamugambira ati: “Efata,” amakuru gaakyo ngu: “Iguka.”

³⁵Amatu ge gaiguka, orulimi rwe rwabohorroka, yabaza kurungi.

³⁶Kandi Yesu yabateererra kutagambiraho muntu n'omu; baitu nambere yahikize kubateererra, bbo bakakizaaho kukirangaaniza.

³⁷Kandi bakahunirra muno nibagamba bati: “Ebintu byona abikozire kurungi, naahuliza abafu b'amatu kandi naagambisa abafu b'eminwa.”