Read Runyoro - rutooro Mar 8 Bible Online

Mar 8 - Runyoro - rutooro bible

Mar 8

¹Omu biro ebi, ekitebe ky'abantu obu kyagarukire kwesorooza, kandi bataina kyokulya, Yesu yayeta abeegesebwa be, yabagambira ati:

²“Ninganyira abantu banu, habwokuba bamazire na nyowe ebiro bisatu, bataina eki barukulya;

³obu ndabaraga kugaruka owaabubo bataliire, nibaija kugwa ensazi omu muhanda; kandi abamu omuli bo barugire hara.”

⁴Abeegesebwa be baamugarukamu bati: “Nikisoboka kita omuntu kutungira abantu banu boona ebyokulya omuirungu munu?”

⁵Nawe nukwo kubakaguza ati: “Mwinaho emigaati ingaha?” Nandiki bbo bati: “Musanju.”

⁶Yaragira ekitebe ky'abantu kwikarra hansi; yakwata emigaati musanju, obu yamazire kusiima, yagicwamu, yagiha abeegesebwa be kugigabira abantu; baagibagabira.

⁷Kandi bakaba bainaho obucu buke; nabwo yabusiimira, yaragira babugabire abantu.

⁸Baalya, baiguta. Baasorooza oburagalika obwasigaireho, bwaijuza ebigega musanju.

⁹Abaaliire baahikaga nk'enkumi ina.

¹⁰Yabaraga; ahonaaho yagwerra omu bwato hamu n'abeegesebwa be, yagenda omu nsi ya Dalmanuta.

¹¹Abafalisaayo bakaija baatandika kumuteeza empaka, nibamusaba ekihuniriza ekirukuruga hali Ruhanga, nibamulenga.

¹²Uwe yasinda n'agamba ati: “Habwaki ab'ebiro binu nibasaba ekihuniriza? Mazimakwo nimbagambira nti: Busaho kihuniriza ekiriheebwa ab'ebiro binu.”

¹³Yabasigaho, yagaruka yagwerra omu bwato, yayambuka nseeri.

¹⁴Abeegesebwa bakaba beeberwe kutwara entanda, kyonka omu bwato bakaba bainamu omugaati gumu gwonka.

¹⁵Uwe yabahabura ati: “Barungi bange, mwerinde ekitumbisa ky'Abafalisaayo n'ekya Herode.”

¹⁶Nukwo bbo kutandika kukaguzangana bati: “Ekirukumugambisa kiti, habwokuba titwina mugaati.”

¹⁷Yesu obu yakyetegeriize, yabakaguza ati: “Eky'okutaba na mugaati nimukibalizaho ki? Timukamanyire rundi timukeetegeriize? Emitima yanyu tekahwitukire?

¹⁸Ka mwina amaiso, timurukurora? Ka mwina amatu, timurukuhurra? Rundi timurukwijuka?

¹⁹Obu naacwire emigaati etaano nagiriisa abantu enkumi itaano, oburagalika obu mwasoroize bukaijuza ebigega bingaha?” Baamugarukamu bati: “Ikumi na bibiri.”

²⁰“Kandi obu nacwire emigaati musanju nagiriisa abantu enkumi ina, oburagalika obu mwasoroize bukaijuza ebigega bingaha?” Baamugarukamu bati: “Musanju.”

²¹Yabakaguza ati: “Nabwo timukeetegeriize?”

²²Baahika Betisaida. Abantu abamu baamuleetera omufu w'amaiso, baamwesengereza amukwateho.

²³Yakwata omufu w'amaiso ha mukono, yamwiha omu kyaro eki; obu yamazire kumucwa amacwanta ha maiso, amutaireho n'emikono, yamukaguza ati: “Oina eki orukurora?”

²⁴Omusaija ogu yainunuka, yagarukamu ati: “Nindora abantu; baitu nibasisana nk'emiti erukugenda.”

²⁵Yesu yayongera yamuta engaro ha maiso. Uwe yahweza, yakira, yarora kurungi ebintu byona.

²⁶Yamwohereza kutaaha owaabu, naamugambira ati: “Otahunguka noobu haakuba omu kyaro kinu.”

²⁷Yesu yayongera kugenda omu byaro bya Kaisaariya Filipi aina abeegesebwa be; obu bakaba nibagenda, yabakaguza ati: “Abantu baanyeta bata?”

²⁸Baamugarukamu bati: “Abamu bagamba ngu: Yohaana Omubatiza; abandi ngu: Eriya; n'abandi ngu: Omu ha barangi.”

²⁹Nandiki uwe ati: “Baitu inywe munyeta muta?” Petero yamugarukamu ati: “Niiwe Kristo.”

³⁰Yabateererra ati: “Eki mummanyireho, mutakigambira muntu.”

³¹Akatandika kubamanyisa Omwana w'omuntu nkooku asemeriire kubonabonesibwa omu bintu bingi n'okwangwa abakuru b'abantu, n'abanyakatagara abakuru n'abeegesa b'ebiragiro, n'okwitwa kandi ahumburwe haahingwireho ebiro bisatu.

³²Ebi byona akabigamba bbwa. Nubwo Petero yatwaire Yesu ha rubaju, yatandika kumuhana.

³³Baitu Yesu obu yahindukire, arozire abeegesebwa be, yacoomera Petero ati: “Ngaruka enyuma iwe Sitaani! Habwokuba ebi orukuteekereza tibiri bya Ruhanga, baitu by'abantu.”

³⁴Yayeta ekitebe ky'abantu hamu n'abeegesebwa be, yabagambira ati: “Weena anyakugonza kumpondera, ayehwemu wenka, ahimbe omusaraba gwe, ampondere.

³⁵Habwokuba weena anyakutaatira obwomeezi bwe, alibufeerwa; kandi weena anyakuhayo obwomeezi bwe habwange na habw'Amakuru Amarungi, alibujuna.

³⁶Baitu omuntu nikimugasa ki okutunga ensi yoona, kandi akafeerwa obwomeezi bwe?

³⁷Kintu ki omuntu eki asobora kuhayo okucungura obwomeezi bwe?

³⁸Baitu weena arukunkwatirwa ensoni rundi akaikwatirwa ebigambo byange omu businge bunu obuhabire kandi obubi, Omwana w'omuntu nawe alimukwatirwa ensoni obu aliija aina ekitiinisa kya Ise, asendekeriziibwe abamalaika be abahikiriire.”