Read Runyoro - rutooro Mar 9 Bible Online

Mar 9 - Runyoro - rutooro bible

Mar 9

¹Yesu yayongera ati: “Mazimakwo nimbagambira nti: Haroho abamu abeemeriire hanu abatalihikwaho rufu batakarozire bukama bwa Ruhanga nibwija n'obusobozi.”

²Obu haahingwireho ebiro mukaaga, Yesu yatwara Petero, Yakobbo na Yohaana, yabatembya ha rusozi oruraihire bali bonka, yahinduka omu maiso gaabu,

³ebyokujwara bye byayangasana, byayera tiitiiti; kandi busaho mwogi w'engoye omu nsi ayaakusoboire kubyezaakwo.

⁴Eriya na Musa baababonekera, nibabaza na Yesu.

⁵Petero nukwo kugambira Yesu ati: “Mwegesa, kirungi itwe kusangwa hanu. Katwombeke obusiisira busatu: akamu kaawe, akamu ka Musa, n'akandi k'Eriya.”

⁶Baitu atamanye eki arukugamba, habwokuba bbo bakaba nibatiina muno.

⁷Ekicu kyaija kyabasiikiriza, iraka lyaruga omu kicu nirigamba liti: “Onu nuwe Mwana wange omugonzibwa, mumuhurre.”

⁸Ahonaaho obu bamagamagire, tibarora muntu n'omu kwihaho Yesu wenka.

⁹Obu bakaba nibasirimuka orusozi, Yesu yabateererra okutagambiraho muntu weena ebi baarozire, okuhika Omwana w'omuntu obu alikamara kuhumbuuka omu bafu.

¹⁰Ekigambo eki baakiculerra, nibakaguzangana ngu: Okuhumbuuka omu bafu nikimanyisa ki?

¹¹Nubwo baamukagwize bati: “Habwaki abeegesa b'ebiragiro bagamba ngu, Eriya nuwe alibanza kwija?”

¹²Yabagarukamu ati: “Mazimakwo Eriya nuwe alibanza kwija, nukwo atereekereze byona; baitu kitahandiikwe kiti hali Omwana w'omuntu ngu: asemeriire kubonabonesibwa omu bintu bingi n'okugaywa?

¹³Kyonka nyowe nimbagambira nti: Eriya akaija ira, kandi bakamukora kyona eki baagondeze, nkooku kyamuhandiikirweho.”

¹⁴Obu baahikire hali abeegesebwa abandi, baarora ekitebe kingi ky'abantu kibeehinguliriize kandi abeegesa b'ebiragiro nibabateeza empaka.

¹⁵Ahonaaho ekitebe ky'abantu obu baamurozire, baahunirra muno, bairuka baagenda nambere ali kumutangirra.

¹⁶Nawe nukwo kubakaguza ati: “Nimubateereza ki empaka?”

¹⁷Omu hali bo yamugarukamu ati: “Mwegesa, nkuleetiire mutabani wange, aina omwoyo omubi ogurukumutanga kubaza.

¹⁸Nambere gukamukwatira hoona, gumuteera hansi; aleeta ifuro, kandi anena amaino, ayomangana. Nkasaba abeegesebwa baawe kugubinga, baalemwa.”

¹⁹Nandiki Yesu ati: “Inywe ab'obusinge obutarukwikiriza, ndiikara na inywe kuhikya di? Ndibagumiisiriza kuhikya di? Mumundeetere.”

²⁰Baamuleetera omwojo. Omwoyo omubi obu gwamurozire, ahonaaho gwakankaniza omwojo, yagwa hansi, yayekulingura yaleeta ifuro omu kanwa.

²¹Yesu yakaguza ise omwana ati: “Amazire kasumi ki arwaire endwara enu?” Yamugarukamu ati: “Kuruga omu buto bwe.

²²Emirundi nyingi gumunaga omu murro n'omu maizi kumwita; baitu obu oraaba oina eki orukusobora kukora, otugirre embabazi kandi otukonyere.”

²³Yesu yamugarukamu ati: “Ogambire oti: obu oraaba oina eki orukusobora? Omuntu anyakwikiriza asobora ebintu byona.”

²⁴Ahonaaho ise omwana yatokera haigura naagamba ati: “Ego ninyikiriza; baitu nganyira habw'okwikiriza kwange okuke!”

²⁵Yesu obu yarozire ikitebe ky'abantu nibeeseesa nambere ali, yacoomera omwoyo omubi ati: “Iwe omwoyo ogutarukugamba kandi ogufiire amatu, ninkuragira omurugeho, kandi otalimugarukaho obundi.”

²⁶Omwoyo omubi obu gwamazire kutoka, gwamukankaniza muno, gwamurugaho, kandi omwojo yasisana nk'omutumbi. Nikyo abantu abarukukira obwingi omuli bo baagambiire bati: “Omwojo afiire.”

²⁷Baitu Yesu yamukwata ha mukono, yamwimukya, omwojo yayemerra.

²⁸Kandi Yesu obu yamazire kutaaha omu nju, abeegesebwa be baamukaguza omu nsita bati: “Habwaki itwe twalemerwe kugubinga?”

²⁹Yabagarukamu ati: “Omwoyo omubi ogw'omulingo gunu, tigusobora kubingwa ekintu kindi kyona kwihaho okusaba n'okusiiba.”

³⁰Obu baarugire aho, baaraba omu Galiraaya. Kandi atagonze muntu n'omu akimanye;

³¹habwokuba akaba naayegesa abeegesebwa be naabagambira ati: “Omwana w'omuntu naija kuheebwayo omu mikono y'abantu, bamwite; obu alimara kwitwa, hakahinguraho ebiro bisatu alihumbuuka.”

³²Baitu bateetegereze eki agambire kandi baatiina kumukaguza.

³³Baahika Kafaranaumu; kandi Yesu obu yamazire kutaaha omu nju yabakaguza ati: “Mubaire nimubazaaho ki omu muhanda?”

³⁴Baitu bbo baaculeera kwonka, habwokuba obu babaire omu muhanda bakakaguzangana ngu, Omukuru omulibo nooha?

³⁵Nawe nukwo kwikarra, yayeta ikumi na babiri, yabagambira ati: “Weena arukugonza kuba w'okubanza naasemerra kuba w'okumalirrayo omu boona, kandi muheereza wa boona.”

³⁶Yakwata omwana yamuleeta hagati yabo, yamukiikira omu mikono ye, naabagambira ati:

³⁷“Weena araajwahukirraga omwana nk'onu omu ibara lyange, buli ajwahukiriire nyowe; kandi weena araanjwahukirraga, buli tajwahukiriire nyowe baitu ajwahukiriire Ogu ayantumiire.”

³⁸Yohaana yamugambira ati: “Mwegesa, tukarora omuntu naabinga emyoyo emibi omu ibara lyawe; twamutanga, habwokuba akaba atarukukwataniza na itwe.”

³⁹Baitu Yesu yagamba ati: “Muleke kumutanga. Busaho muntu akora eky'amaani omu ibara lyange nukwo hanyuma akanguha kumbazaaho kubi.

⁴⁰Weena atarukutuhakaniza, buli ali habwaitu.

⁴¹Mazimakwo nimbagambira nti: Weena abaha ekikopo ky'amaizi kunywa, habwokuba muli bange, taliburwa mpeera ye.”

⁴²“Weena alyesiitaza omu ha bato banu abarukunyikiriza akagwa omu kibi, haakire abohwe orubengo rukooto omu bikya, anagwe omu nyanja.

⁴³Kandi omukono gwawe obu guraaba nigukuleetereza okusiisa, gutemeho; haakire otaahe omu bwomeezi ogookere, kukira kugenda omu kiinongoro ky'omurro oina emikono ebiri. [

⁴⁴Oku nambere hali enzito ezitafwa n'omurro ogutaraara.]

⁴⁵Okuguru kwawe obu kuraaba nikukuleetereza kusiisa, kutemeho; haakire otaahe omu bwomeezi oli mulema, kukira kunagwa omu murro ogutahwaho oina amaguru abiri. [

⁴⁶Oku nambere hali enzito ezitafwa n'omurro ogutaraara.]

⁴⁷Kandi eriiso lyawe obu liraaba nirikuleetereza kusiisa, liihemu; haakire otaahe omu bukama bwa Ruhanga oina eriiso limu, kukira kunagwa omu murro ogutahwaho oina amaiso abiri.

⁴⁸Oku nambere hali enzito ezitafwa n'omurro ogutaraara.

⁴⁹Habwokuba buli muntu alisemezibwa omurro nk'ekisura oku kisemeza ebyokulya.

⁵⁰Ekisura kirungi; baitu kakuba kihoibwamu orusa, mulirugarramu muta? Enyikara yanyu ikalege neenulirra nk'ekisura, kandi mwikarane n'obusinge.”