Read Runyoro - rutooro Luk 1 Bible Online

Luk 1 - Runyoro - rutooro bible

Luk 1

¹Omugonzibwa Teyofilo: Abantu baingi bakakora ebi barukusobora okuhandiika ebintu ebyabaireho omuli itwe.

²Bakahandiika ebi twagambiirwe abo abaabirozire kuruga ha kubanza, nubo abo abaatumirwe kubitugambira.

³Na nyowe obu namazire kubyetegereza kurungi okuruga ha byabandiize, nkasiima okubikuhandiikira mbikurataniize.

⁴Kinu nkikozire nukwo omanye amazima g'ebintu ebi byona ebi wayegesiibwe.

⁵Omu kasumi ka Herode, omukama wa Bayudaaya, hakaba haroho nyakatagara, ibara lye Zakaliya, ow'omu kihanda ky'abanyakatagara ekya Abiya. Akaba aswire omukazi ow'omu baijukuru ba Arooni, ibara lye Elizabbeti.

⁶Bombi bakaba bali bahikiriire omumaiso ga Ruhanga bataina eki barukujunaanwa, nibahikiriza kurungi Ebiragiro bya MUKAMA n'emirwa ei yataireho.

⁷Bakaba bataina mwana, habwokuba Elizabbeti akaba ali ngumba, kandi bombi bakaba bakuzire muno.

⁸Kiro kimu Zakaliya akaba naakora omulimo gwe ogw'obunyakatagara omumaiso ga Ruhanga, ab'ekihanda kye obu bakaba bali b'okukora omulimo ogu.

⁹Engeso y'abanyakatagara nkooku ekaba eri, nuwe akaba akomerwe akaruuru kutaaha omunju ya Ruhanga kwotera omugaju.

¹⁰Omu kasumi ak'okwotera omugaju, ekitebe kyona eky'abantu kikaba kiri aheeru nibasaba Ruhanga.

¹¹Malaika wa Mukama yamubonekera, ayemeriire ha rubaju rw'obulyo rw'ekiswa nambere baayoterraga omugaju.

¹²Zakaliya obu yamurozire yayekanga, yatiina muno.

¹³Baitu malaika yamugambira ati: “Zakaliya, leka kutiina. Okusaba kwawe Ruhanga akuhuliire; mukazi waawe Elizabbeti alikuzarra omwana w'obwojo, olimuruka ibara lye Yohaana.

¹⁴Mulikyanganuka muno kandi mulisemererwa, n'abandi baingi balisemererwa habw'okuzaarwa kwe;

¹⁵habwokuba aliba mukuru omumaiso ga MUKAMA. Talinywa marwa noobu kyakuba ekitamiiza kyona. Alizaarwa aijwire Mwoyo Ahikiriire.

¹⁶Aligarra Abaisirairi baingi hali MUKAMA Ruhanga wabo;

¹⁷alimwebembera aina amaani n'obusobozi nk'obwa Eriya, aligarra emitima y'abazaire ha baana baabo, aligarra abeereme omumuhanda gw'abahikiriire, nukwo ateekanirize MUKAMA abantu abamusemeriire.”

¹⁸Nubwo Zakaliya yakagwize malaika ati: “Kinu nsobora nta kukinanukira? Nyowe ngurusire, na mukazi wange akaikwire.”

¹⁹Malaika yamugarukamu ati: “Ninyowe Gabulyeri anyakwemerra omumaiso ga Ruhanga. Ntumirwe kubaza na iwe n'okukumanyisa amakuru ganu amarungi.

²⁰Hurra nu, habw'okutaikiriza obukwenda bwange obulihikirra omu kasumi kabwo, oraafa omunwa, oikale otarukubaza okuhika ha kiro ebi byona obu birihikirra.”

²¹Omu kasumi ako abantu bakaba bategeriize Zakaliya nibahunirra kandi nibeekaguza ekimukereriize omunju ya Ruhanga.

²²Obu yaturukire aheeru atasobole kubaza nabo, nubwo baamanya nkooku abonekiirwe omunju egi; kandi uwe habw'okulemwa kugamba, akabeesa engaro.

²³Obusumi bwe obw'okuheereza obu bwahoire, yagaruka omuka ye.

²⁴Obu haahingwireho ebiro, mukazi we Elizabbeti yatwara enda, kandi yayesereka omunju kumara ameezi ataano, naagamba ati:

²⁵“MUKAMA nukwo ankozire ati, obu yasiimire kunyihaho ensoni omu bantu.”

²⁶Elizabbeti obu akaba aina enda y'ameezi mukaaga, nubwo Ruhanga yatumire malaika Gabulyeri omu rubuga rwa Galiraaya orwetwa Nazareeti,

²⁷hali omwisiki empikirre, ow'akaba ajumbiirwe omusaija, ibara lye Yosefu, ow'omu ruganda rwa Daudi; ibara ly'omwisiki ogu nuwe Mariya.

²⁸Malaika akaija nambere ali yamuramukya ati: “Mirembe, iwe aijwire emigisa, MUKAMA ali na iwe!”

²⁹Mariya, ebigambo ebi bikamukanga muno, nukwo kwekaguza amakuru g'okuramukya oku.

³⁰Nubwo malaika yamugambiire ati: “Mariya, leka kutiina, habwokuba Ruhanga akusiimire.

³¹Hati noija kutwara enda, olizaara omwana w'obwojo, olimuruka ibara lye Yesu.

³²Aliba mukuru kandi alyetwa Omwana w'Anyakuli haiguru muno; MUKAMA Ruhanga alimwikaliza ha kitebe kya isenkuru Daudi,

³³kandi alirema abaijukuru ba Yakobbo ebiro byona, n'obukama bwe tibulihwaho.”

³⁴Baitu Mariya yakaguza malaika ati: “Eki kisoboka kita? Nyowe kantamanyire musaija.”

³⁵Malaika yamugarukamu ati: “Mwoyo Ahikiriire alikwizira, kandi n'amaani g'Ogu Anyakuli haiguru muno galikuswekerra. Omwana ow'alizaarwa nikyo alyeterwa ahikiriire, kandi Omwana wa Ruhanga.

³⁶Dora, mwenekati wanyu [1] Elizabbeti, ou baayeetaga ngumba, hati aina enda y'ameezi mukaaga, kandi kunu mukaikuru;

³⁷habwokuba busaho ekirema Ruhanga.”

³⁸Nubwo Mariya yagambire ati: “Nyowe ndi hanu, omuzaana wa MUKAMA; kinkolerwe nkooku ogambire.” Aho malaika yamuburaho.

³⁹Omu biro ebi Mariya akaimukya, yagenda bwango omunsi y'ensozi, omu kyaro kya Buyudaaya.

⁴⁰Yataaha omunju ya Zakaliya, yaramukya Elizabbeti.

⁴¹Kandi Elizabbeti obu yahuliire okuramukya kwa Mariya, omwana yazaana omu ndi ye. Elizabbeti yaijura Mwoyo Ahikiriire,

⁴²nukwo kugamba n'iraka likooto ati: “Oli w'omugisa omu bakazi boona! N'omwana omunda yawe aina omugisa!

⁴³Kyandugira nkaha nyowe kubungirwa nyina MUKAMA wange?

⁴⁴Habwokuba obu mpuliire okuramukya kwawe, omwana yazaana omunda yange habw'omuhimbo.

⁴⁵W'omugisa onu ayaikiriize ekigambo kya MUKAMA nkooku kirihikirra hali uwe!”

⁴⁶Mariya yagamba ati: “Omutima gwange nigukugiza MUKAMA,

⁴⁷n'omwoyo gwange nigusemerererwa Ruhanga Omujuni wange,

⁴⁸habwokuba arozire okwebundaaza kw'omuzaana we! Dora, okuruga hati abantu ab'obusinge bwona baraanyetaga w'omugisa;

⁴⁹habwokuba Omusobozi wa byona akankorra ebikuru, n'ibara lye niryera.

⁵⁰Obusinge n'obusinge agirra embabazi boona abamutiina.

⁵¹Omukono gwe akagukozesa eby'amaani, ararangize ab'emyehembo omu biteekerezo by'emitima yabo,

⁵²abingire ab'obusobozi ha bitebe byabo, yanyumiza abaculeezi;

⁵³abajara abaigusize ebirungi, abaguuda ababingire ngaro nsa.

⁵⁴Akonyiire Isirairi omwiru we, obu yaijukire kwoleka embabazi ze

⁵⁵ nkooku yaraganiize Abburahamu na baijukuru be ebiro byona.”

⁵⁶Mariya akamara omwa Elizabbeti ameezi nk'asatu, hanyuma yagarukayo owaabu.

⁵⁷Akasumi k'Elizabbeti ak'okuzaara kaahika, yazaara omwana w'obwojo.

⁵⁸Abataahi na beene baabo obu baahuliire nkooku MUKAMA yamugiriire embabazi, boona baasemererwa hamu nawe.

⁵⁹Omwana obu yahikize ebiro munaana, baija kumusara; bakaba nibagaonza kumuruka Zakaliya, nk'ibara lya ise;

⁶⁰baitu nyina yabagambira ati: “Nangwa, naija kurukwa Yohaana.”

⁶¹Baamugarukamu bati: “Omu beene banyu busamu n'omu arukwetwa ibara eri.”

⁶²Baakozesa oburorwaho kukaguza Zakaliya abamanyise ibara eri arukwenda kuruka omwana.

⁶³Uwe yasaba eky'okuhandiikaho; yahandiika ati: “Ibara lye nuwe Yohaana.” Boona baahunirra.

⁶⁴Ahonaaho akanwa ke kaiguka n'orulimi rwe rwabohorroka, yatandika kubaza naakugiza Ruhanga.

⁶⁵Abataahi boona baatiina. Amakuru ago gaararanga omu nsi yoona ey'ensozi eya Buyudaaya.

⁶⁶Boona abaagahuliire baagata ha mutima nibeekaguza bati: “Mara omwana ogu aliba ata?” Habwokuba omukono gwa MUKAMA gukaba gumuroho.

⁶⁷Zakaliya ise, akaijura Mwoyo Ahikiriire yaranga ati:

⁶⁸“Akugizibwe MUKAMA Ruhanga wa Isirairi; habwokuba aizire kucungura abantu be.

⁶⁹Atwimukiize omujuni ow'obusobozi, omu ruganda rwa Daudi omwiru we,

⁷⁰nkooku yagambiire omu barangi be abarukwera okuruga ira lyona:

⁷¹kutujuna abanyazigwa baitu, n'okutwiha omu mikono y'abo boona abarukutunoba.

⁷²Nukwo ayoleke embabazi ezi yaraganiize baisenkuruitwe, naijuka ekiragaano kye ekirukwera,

⁷³nikyo ekirahiro eki yarahiire isenkuru-itwe Abburahamu ngu,

⁷⁴obu tulikajunwa omu mikono y'abanyanzigwa baitu, tumuheerezeege tutarukutiina,

⁷⁵nitwera kandi tuhikiriire omumaiso ge ebiro byaitu byona.

⁷⁶Na iwe mwana, olyetwa murangi w'Ogu Anyakuli haiguru muno; habwokuba olyebembera MUKAMA okuteekaniza emihanda ye,

⁷⁷n'okumanyisa abantu be okujunwa oku batunga okubaganyiza ebibi byabo.

⁷⁸Kandi habw'embabazi nyingi eza MUKAMA waitu, emamba enyakuruga omwiguru, obu erisara habwaitu,

⁷⁹erimulikira abo abaikara omu mwirima n'omu kiituuru ky'okufa, kandi eriteerekereza ebigere byaitu omu muhanda gw'obusinge.”

⁸⁰Omwana akakura, yaba w'amaani omu mutima, kandi akaikara omu irungu okuhika obu yayeyolekiire Abaisirairi.