Read Runyoro - rutooro Luk 10 Bible Online

Luk 10 - Runyoro - rutooro bible

Luk 10

¹Ebi obu byahoire, MUKAMA Yesu akakoma abandi nsanju na babiri yabatuma babiri babiri, bamwebebembere omu mbuga n'omu mbuga n'omu biikaro nambere akaba naija kubunga.

²Yabagambira ati: “Eby'okugesa bingi, baitu abagesi nubo bake; habweki musabe MUKAMA w'eby'okugesa ayongere abakozi omu musiri gwe.

³Irooko mugende, hati nimbatuma nk'ebyaana by'entaama ebirukugenda omu myaaga hagati.

⁴Mutatwara ensahu ya sente, n'ey'ebyokulya, noobu zaakuba enkaito; mutaramukyaramukya omu muhanda.

⁵Enju yoona ei muraataahamuga, mubanze mugambe muti: ‘Obusinge bube omunju enu!’

⁶Obu haraaba harumu omuntu arukugonza obusinge, obusinge bwanyu buraikaraga nawe; baitu obu ataasangwemu, buraabagarukiraga.

⁷Enju egi niyo mwikalemu nimunywa ebi baraabahaga, habwokuba omukozi asemerra kuheebwa empeera ye; kandi mutalijeerajeera.

⁸Obu muraataahaga omu rubuga mukajwahukirirwa, mulye ebi baraabasemberezaaga,

⁹mukize abarwaire baamwo, kandi mubagambire muti: ‘Obukama bwa Ruhanga bubairiire haihi.’

¹⁰Baitu obu muraataahaga omu rubuga nambere baayanga kubajwahukirra, mugende omu makuute gaarwo, muganbe muti:

¹¹‘Nangwa n'ecuucu ey'orubuga rwanyu enyakuli ha bigere byaitu twagibateerateerra; baitu mumanye obukama bwa Ruhanga nkooku bubairiire haihi.’

¹²Nimbagambira nti: Ha kiro ky'okucwerwa omusango, Sodomu eriganyirwa kukira orubuga oru!”

¹³“Olikibona iwe Korazini! Olikibona iwe Betisaida! Habwokuba ebyamahano ebyakoliirwe omuli inywe kakuba byakoliirwe omu Tiiro na Sidooni, baakubaire beegarukiremu ira bajwaire ebiguniya kandi baikaliire omu iju.

¹⁴Baitu ha kiro ky'okucwerwa omusango Tiiro na Sidooni ziriganyirwa okukira inywe.

¹⁵Kandi iwe Kafaranaumu olinyumizibwa ohike haiguru? Nangwa, oligarurwa hansi okuzimu!

¹⁶“Weena anyakubahurra buli ahuliire nyowe; kandi weena arukunyanga buli ayangire Ogu ayantumiire.”

¹⁷Nsanju na babiri bakagaruka basemeriirwe muno, nibagamba bati: “Waitu, emyoyo emibi nayo ekatuhurra habwawe!”

¹⁸Yesu yabagarukamu ati: “Nkarora Sitaani naagwa nk'omurabyo ogurukuruga omwiguru.

¹⁹Hati mbahaire obusobozi bw'okurubatirra enjoka n'enge, n'okurubatirra amaani goona ag'omunyanzigwa; kandi busaho kintu ekiribakora kubi.

²⁰Kyonka muleke kusemererwa habw'emyoyo emibi kubahurra; baitu musemererwe habwokuba amabara ganyu gahandiikirwe omwiguru.”

²¹Kandi omu kasumi ako Mwoyo Ahikiriire akaijuza Yesu okusemererwa, nukwo uwe kugamba ati: “Ninkusiima Taata, iwe MUKAMA w'iguru n'ensi, habwokuba ebintu ebi, okabisereka ab'amagezi n'abarukwetegereza, wabisuukurra abaana bato. Ego Taata, habwokuba eki nikyo wasiimire.

²²Isenyowe akankwasa ebintu byona; kandi busaho n'omu amanyire Mwana okwihaho Ise, kandi busaho amanyire Ise okwihaho Mwana, na weena Mwana ou agonza kumusuukurra.”

²³Nubwo Yesu yahindukiire abeegesebwa be, yabagambira omu bihwa ati: “G'omugisa amaiso agarukurora inywe ebi murukurora!

²⁴Nyowe nimbagambira nti: Abarangi baingi n'abakama bakeegomba kurora ebi murukurora, baitu batabirole, n'okuhurra ebi murukuhurra, baitu batabihurre.”

²⁵Nubwo haimukire omwegesa w'ebiragiro kumulenga naakaguza ati: “Mwegesa, nkole ki okugwetwa omu bwomeezi obutahwaho?”

²⁶Yesu yamugarukamu ati: “Omu Biragiro kikahandiikwa kita? Osomamu ota?”

²⁷Nandiki uwe ati: “Ogonzeege MUKAMA Ruhanga waawe n'omutima gwawe gwona, n'omwoyo gwawe gwona, n'amaani gaawe goona, n'amagezi gaawe goona; kandi ogonzeege mutaahi waawe nkooku oyegonza wenka.”

²⁸Yesu yamugambira ati: “Ogarukiremu kurungi; kora oti, kandi olyomeera.”

²⁹Baitu omwegesa w'ebiragiro, habw'okugonza kwerunga, yakaguza Yesu ati: “Kandi mutaahi wange nooha?”

³⁰Yesu yamugarukamu ati: “Kiro kimu omusaija akaba naaruga Yerusaalemu naagenda Yeriko, yagwa omu banyagi abaamujwiremu engoye ze, baamuteera, baagenda baamusiga nahoijahoija.

³¹Omu kasumi ako haabaho nyakatagara ow'akaba naaraba omu muhanda ogu. Obu yarozire omusaija ogu yamurabaho, yagenda.

³²Omuleevi nawe obu yahikireho yamurora, yamurabaho nka nyakatagara oli.

³³Baitu Omusamaliya ow'akaba naagenda omu muhanda ogu, yahika nambere ali. Obu yamurozire, yakwatwa embabazi,

³⁴yamwirra haihi, yaseesa amagita n'eviini omu bihuta bye, yabisemba. Hanyuma yamuta ha nsoro ye, yamuleeta omunju y'abagoonyi, nambere yamurwaliize.

³⁵Obwire obu bwakiire yakwata siringi ina, yaziha omulinzi w'enju y'abagoonyi, naagamba ati: ‘Omurwaze, obu ndigaruka kyona eki oliba oyongiireho, ndikikusasura.’

³⁶Hali abo abasatu, nooha ou orukurora ow'akaba ali mutaahi w'omusaija ogu ayagwire omu banyagi?”

³⁷Omwegesa w'ebiragiro yamugarukamu ati: “Ogu ayamugiriire embabazi.” Nandiki Yesu ati: “Na iwe genda okole oti.”

³⁸Obu bakaba nibagenda, Yesu yahika omu kyaro ekimu; omukazi arukwetwa Malita yamujwahukirra, yamutaahya omunju ye.

³⁹Malita akaba aina owanyina, ibara lye Mariya. Mariya ogu yaikarra haihi n'ebigere bya MUKAMA Yesu naahuliriza ebi akaba naayegesa.

⁴⁰Baitu Malita akaba naatalibanizibwa emirimo nyingi; nukwo kugenda hali Yesu naagamba ati: “MUKAMA wange, torukurora owanyina nyowe nkooku andekiire kuheereza nyenka? Mugambe, aije ankonyere!”

⁴¹Baitu MUKAMA yamugarukamu ati: “Malita, Malita nootunturra kandi nootalibanizibwa ebintu bingi.

⁴²Ekirukwetaagwa kiri kimu kyonka. Mariya ayegomboize omugabo murungi ogutalimwihwaho.”