Read Runyoro - rutooro Luk 11 Bible Online

Luk 11 - Runyoro - rutooro bible

Luk 11

¹Yesu akaba ali mu kiikaro kimu naasaba; obu yamazire, omu ha beegesebwa be yamugambira ati: “MUKAMA waitu, twegese okusaba nka Yohaana oku yayegeseze abeegesebwa be.”

²Nukwo Yesu kubagambira ati: “Obu muraabaga nimusaba, mugambege muti: ‘Isiitwe, ibara lyawe litiinwe, obukama bwawe bwije;

³otuhe hati ebyokulya byaitu ebya buli kiro;

⁴otuganyire ebibi byaitu, habwokuba na itwe tuganyira boona abatukora kubi; otatuleka tukoohebwa.’ ”

⁵Kandi Yesu akabagambira ati: “Omuli inywe anyakwina munywani we, kakuba agenda owe omu itumbi akamusaba ati: ‘Munywani wange, nyohozaayo emigaati esatu;

⁶habwokuba naizirwa omugenyi arugire hara, kandi tinyina kyokulya ky'okumuha!’

⁷Baitu nyineeka akamugarukamu ati: ‘Leka kuntalibaniza; nkingire ira, nyowe n'abaana bange tubyamire. Tinsobora kwimuka kukuha eki orukwenda.’

⁸Nyowe nimbagambira nti: Noobu araaba atarukugonza kwimuka kumuha eki arukusaba habw'obuganjani, baitu habw'okwongera kumujwahya naamwesengereza, naija kwimuka amuhe kyona eki arukwetaaga.

⁹“Nikyo na nyowe ndukubagambirra nti: Musabe, muraaheebwa; muserre, muraazoora; mwerange, muraakingulirwa.

¹⁰Habwokuba weena anyakusaba, aheebwa; anyakuserra, azoora; kandi anyakweranga, akingulirwa.

¹¹Muzaire ki omuli inywe anyakuha omwana we enjoka, kunu amusabire encu?

¹²Rundi anyakuha omwana we enge, kunu amusabire ihuli?

¹³Nukwo inywe ababi, obu muraaba nimusobora kuha abaana banyu ebirungi, Isiinywe ow'omwiguru talikiraho okuha Mwoyo Ahikiriire abo abarukumusaba?”

¹⁴Yesu akaba naabinga ha muntu omwoyo omubi ogwamufoire kateta; omwoyo omubi obu gwamazire kumurugaho, omusaija yabaza. Nukwo abantu kuhunirra;

¹⁵baitu abamu omuli bo baagamba bati: “Ogu abinga emyoyo emibi habwa Beelizebuli[3] mukuru wayo.”

¹⁶Aho abandi baamutega nibamusaba akarorwaho akarukuruga omu iguru.

¹⁷Baitu Yesu habw'okumanya ebiteekerezo byabo yabagambira ati: “Obukama bwona obwebaganizaamu okurwanisangana, buhwerekerra. Kandi eka enyakwebaganizaamu nayo ehwerekerra.

¹⁸Sitaani obu araaba ayebaganiizeemu kwerwanisa wenka, obukama bwe buliikaraho buta? Inywe mugamba ngu, obusobozi bwa Beelizebuli nubwo bunbingisa emyoyo emibi.

¹⁹Obu kiraaba kiri kiti, kandi abaana banyu baagibingisa obusobozi bw'oha? Nahabweki nubo abalibacwera omusango.

²⁰Baitu obusobozi bwa Ruhanga obu buraaba buli nubwo obunbingisa emyoyo emibi, mumanye obukama bwa Ruhanga nkooku bubahikireho.

²¹“Omuntu w'amaani obu aba aina ebyokurwanisa ebirukumara, alinda eka ye, nukwo ebintu bye biikara omu businge.

²²Baitu arukumukira amaani obu amuseesira, akamusingura, amunyagaho ebyokurwanisa bye byona ebi abaire naayesiga, kandi agaba ebi amunyagireho.

²³Atali habwange buli nampakaniza; kandi atasorooza na nyowe, ararangya.”

²⁴“Omwoyo omubi obu guba gumazire kuruga omu muntu, gugendagenda omu biikaro ebitarumu maizi niguserra h'okuhuumura. Obu gutazooraho, gugamba guti: ‘Kangarukeyo owange nambere naarugire.’

²⁵Obu gugaruka gusanga enju esingoliirwe kandi eteekaniziibwe kurungi.

²⁶Nubwo gugenda, guleeta endi musanju erukugukira obubi, ija ikara omu. Kandi omuntu ogu obwomeezi bwe bwa hanyuma buba bubi okukira obw'okubanza.”

²⁷Yesu obu akaba nakyagamba ebi, omukazi ow'akaba ali omu kitebe yaimukya iraka lye naagamba ati: “Y'omugisa enda eyakuzaire n'amabeere aga wayonkere!”

²⁸Baitu Yesu yamugarukamu ati: “Abarukukira kuba b'omugisa nubo abahurra ekigambo kya Ruhanga bakakikwata!”

²⁹Ebitebe by'abantu obu byayeyongiire kukanya, Yesu yabagambira ati: “Abantu ab'ebiro binu, bantu babi! Nibasaba akarorwaho, baitu tibaliheebwa karorwaho okwihaho aka Yona.

³⁰Yona nkooku yabaire karorwaho ha bantu ba Nineve, n'Omwana w'omuntu nukwo aliba ha bantu ab'obusinge bunu.

³¹Ha kiro ky'okucwerwa omusango, Omukamakati ow'Obukiizi bw'obulyo alyemerra n'abantu ab'ebiro binu abasingise omusango, habwokuba akaruga ha mpero y'ensi yaija okuhurra amagezi ya Solomooni; kandi hati arukukira Solomooni ali hanu.

³²Ha kiro ky'okucwerwa omusango, abantu ba Nineve balyemerra basingise ab'obusinge bunu omusango; habwokuba bakeegarukamu obu baahuliire Yona ebi yabarangiriire; kandi hati arukukira Yona ali hanu!”

³³“Busaho muntu anyakumara kuhemba etaara akagisereka omu kisiika rundi akagijuumikira ekigega; baitu agihanika ha kikondo kyayo, nukwo abarukutaaha omu nju bahweze.

³⁴Eriiso lyawe niyo taara ey'omubiri; eriiso lyawe obu liba nirihweza, omubiri gwona guhwereza kimu; baitu eriiso obu liba litarukuhweza, omubiri gwawe nagwo guswekwa omwirima.

³⁵Habweki werinde, ekyererezi eki oinakyo kitaikara kufooka mwirima.

³⁶Omubiri gwona obu guraaba niguhwereza kimu, gutarumu ekyetwa omwirima, gwangasanira kimu, gubamulikira nkooku mwakumuliikirwe etaara.”

³⁷Yesu obu yamazire kubaza, Omufalisaayo akamweta kulya owe; yagenda yataaha omunju, yaikarra kulya.

³⁸Omufalisaayo yahunirra okurora Yesu naalya atabandize kunaaba.

³⁹Nukwo MUKAMA Yesu kumugambira ati: “Inywe Abafalisaayo, mwogya ebikopo n'esahaani haruguru, baitu omu nda mwijwire obunyagi n'obubi.

⁴⁰Ha, badoma inywe! Ayahangire ebya haruguru tinuwe ayahangire n'eby'omu nda?

⁴¹Haakire ebintu ebi mwinabyo mubigabirege abanaku, nukwo ebindi byona birisemerezebwa habwanyu.

⁴²“Baitu mulikibona inywe Abafalisaayo! Habwokuba muha Ruhanga ekicweka kya ikumi eky'omubwiga n'eyobyo n'emikubi endi, baitu obwinganiza n'okugonza Ruhanga timubifaaho. Ebi nibyo mwakufiireho, kandi ebindi nabyo muleke kubinagaija.

⁴³“Mulikibona inywe Abafalisaayo! Habwokuba mugonza ebiikaro eby'ekitiinisa omu masorrokaniro, n'okuramukibwa omu butale.

⁴⁴Mulikibona inywe! Habwokuba muli nk'ebituuro ebitarukurorwa, abantu ebi barubataho batamanyire.”

⁴⁵Nubwo omu ha beegesa b'ebiragiro yamugambiire ati: “Mwegesa, obu orukugamba oti, buli na itwe otujumire!”

⁴⁶Yesu yamugarukamu ati: “Mulikibona na inywe abeegesa b'ebiragiro! Mutweka abantu ebintu ebiremiire muno, kandi kunu inywe mutarukutaho n'orukumo kubakoonyera kubyetweka.

⁴⁷Mulikibona inywe abombekera abarangi ebituuro, kandi kunu nubo abaisirwe abaisenkuru inywe.

⁴⁸Nukwo na inywe muli bakaiso kandi nimugumya baisenkuru inywe ebi baakozire. Bbo bakabaita, kandi inywe nimwombeka ebituuro byabo.

⁴⁹“Nikyo Ruhanga yagambiire omu Magezi ge ati: ‘Ndibatumira abarangi n'abakwenda; abamu omuli bo balibaita kandi abandi balibahiiganiza.’

⁵⁰Nukwo ab'ebiro binu bajunaanwe esagama y'abarangi boona eyaseesekere kuruga hakuhangwa kw'ensi.

⁵¹Okuruga ha sagama y'Abberi okuhika ha ya Zakaliya ou baitiire hagati y'itambiro n'ekiikaro ekirukwera. Mazima nimbagambira nti: Abantu ab'ebiro binu balijunaanwa esagama yabo.

⁵²Mulikibona inywe abeegesa b'ebiragiro! Habwokuba mukaihaho ekisumuruzo eky'orwigi orw'okumanya. Inywe inywenka timwataahamu, kandi n'abandi abakaba nibenda kutaahamu mwabatanga.”

⁵³Yesu obu akaba naaruga omunju egi, abeegesa b'ebiragiro n'Abafalisaayo baatandika kumuteeza muno empaka, baamukaguliriza ha bintu bingi,

⁵⁴bakaba nibamutega emitego nukwo bamukwasize ha bigambo ebi araabagarukamu.