Read Runyoro - rutooro Luk 12 Bible Online

Luk 12 - Runyoro - rutooro bible

Luk 12

¹Omu kasumi ako, abantu enkumi n'enkumi obu baayesoroize hamu, bakaba nibasindikangana, Yesu yabanza kugambira abeegesebwa be ati: “Mwerinde ekitumbisa ky'Abafalisaayo, nubwo obugobya bwabu.

²Busaho ekiswekeriirwe ekitalisuukurwa, rundi ekiserekerwe ekitalimanywa.

³Kyona kyona eki mwagambiire omu mwirima kirihulirwa omusana nigujwa; n'eki mwahwehweteriire omu bisiika ebya ha rubaju kirirangirirwa ha rusu rw'enju.”

⁴“Banywani bange kambagambire nti: Muleke kutiina abo abaita omubiri kunu bataina kindi eki basobora kukora ekirukukira aho.

⁵Kambagambire ow'okutiina. Mutiine Ogu anyakumara kwita, akagira n'obusobozi obw'okunaga omu murro ogutaraara. Mazimakwo Ogu nuwe mutiinege!

⁶“Ebisirya[4] bitaano tibigurwa sente abiri? Kandi kunu busaho na kimu halibyo ekyeba omu maiso ga Ruhanga.

⁷Isoke lya ha mitwe yanyu nalyo libazirwe lyona. Nahabweki muleke kutiina. Inywe muli b'omuhendo mwingi kukira ebisirya bingi!”

⁸“Nimbagambira nti: Omuntu weena alinnyatura omumaiso g'abantu, Omwana w'omuntu nawe alimwatura omumaiso ga bamalaika ba Ruhanga;

⁹kandi weena alinyehakana omumaiso g'abantu, Omwana w'omuntu alimwehakana omumaiso ga bamalaika ba Ruhanga.

¹⁰Weena anyakugamba kubi ha Mwana w'omuntu aliganyirwa; baitu anyakujuma Mwoyo Ahikiriire taliganyirwa.

¹¹Obu baraabaleeta omu masorrokaniro, rundi hali ab'obusobozi, rundi hali abalemi kubanyegerra, muleke kutuntura nkooku muraagarukamu nimwetonganirra, rundi eki muraagamba;

¹²habwokuba Mwoyo Ahikiriire alibeegesa omu kasumi ako eki musemeriire kugamba.”

¹³Omuntu omu hali abo abakaba bali omu kitebe akagambira Yesu ati: “Mwegesa, gambira mugenzi wange tubagane obugwetwa bwaitu.”

¹⁴Yesu yamugarukamu ati: “Musaija iwe, nooha yantaireho kubacwera omusango, rundi kubabaganirizaamu abintu byanyu?”

¹⁵Yayongera yabagambira ati: “Mwegendereze kandi mwerinde okwegomba kwona, habwokuba obwomeezi bw'omuntu tibubaho habw'itungo eringi eri ainalyo.”

¹⁶Nukwo kubacwera orufumo runu ati: “Hakaba haroho omuguuda anyakwina itaka lye eryayereze ebirimwa bingi.

¹⁷Kandi uwe yabanza kwekaguza ati: ‘Nkole ki? Tinyina h'okuhunika ebirimwa byange byona.’

¹⁸Yagamba ati: ‘Kinu nikyo ndaakora. Ndaaseesa enguli zange, nyombekemu enkooto nambere ndihunika oburo bwange hamu n'ebintu byange ebindi.

¹⁹Obu nubwo ndyehuuma nti Nyeyahuliire ebintu ebirimmazaaho emyaka nyingi erukwija. Kampuumule, ndye, nywe, nyegonze.’

²⁰Baitu Ruhanga yamugambira ati: ‘Mudoma iwe! Kiro kya hati oraihwaho obwomeezi bwawe. Ebintu byona ebi wayeyahuliire biriba by'oha?’

²¹Nukwo kiba kiti hali ogu ayeyahurra itungo lingi omu nsi, kunu munaku omu maiso ga Ruhanga.”

²²Nubwo Yesu yagambiire abeegesebwa be ati: “Nikyo ndukubagambirra nti: Mutalitunturra obwomeezi bwanyu eki muraalyaga rundi, omubiri gwanyu eki muraajwaraga.

²³Habwokuba obwomeezi bw'omuhendo kukira ebyokulya, n'omubiri gw'omuhendo kukira ebyokujwara.

²⁴Murole ebingoora: tibisiga, tibigesa, tibigira nguli noobu haakuba ahandi h'okuhunika; baitu nabwo Ruhanga abiriisa. Inywe ka nimukirra kimu enyonyi!

²⁵Nooha omuli inywe, noobu atuntura ata, akusobora kwongeraho akasumikake ha bwomeezi bwe?

²⁶Obu muraaba mutarukusobora kukora akantu kake nk'ako, ebindi nibibatuntuliza ki?

²⁷Murorre ha byakyo nkooku bikura: tibiruka kandi tibyongosa; baitu nimbagambira nti: Nangwa na Solomooni omu kitiinisa kye kyona atajwale kurungi okwingana ekimu hali byo.

²⁸Ruhanga obu araaba ajweka ati ebinyansi ebiroho hati, nyenkya bikanagwa ha kikoomi, talikiraho muno kujweka inywe abaina okwikiriza kuke?

²⁹Mulekege okumaliza omutima ha ki muraalyaga n'eki muraanywaga, noobu kwakuba kubitunturra.

³⁰Habwokuba ebi byona Abanyamahanga b'omunsi munu nibyo baitanira. Baitu Isiinywe amanyire nkooku murukubyetaaga.

³¹Ekirikukira, inywe mubanze muserre obukama bwe, n'ebi byona biribongerwaho.”

³²“Mutatiina inywe igana erike! Habwokuba Isiinywe akasiima kubaha obukama.

³³Mutunde ebi mwinabyo, mugabire abaseege; mwetungire ensahu za sente ezitarukukura, kandi mwahule itungo eritahwaho omwiguru, omusuma nambere atalisobora kulihikaho kandi enkugutu nambere italisobora kulisisa.

³⁴Habwokuba itungo lyanyu nambere liri, oku nuho n'emitima yanyu eraikaraga.”

³⁵“Mwikale mweteekaniize, mweteegere emyeko, n'etaara zanyu nizaaka.

³⁶Mube nk'abantu abarukulindirra mukama wabo arukugaruka naaruga ha bugenyi bw'obugole. Obu aija akateera ha rwigi, bamukingurra bwango.

³⁷B'omugisa abaheereza abo mukama wabu aba alisanga nibarora. Mazimakwo nimbagambira nti: Alyeteega omweko, abaikalize, abaheereze.

³⁸Kakuba agaruka omu kisisiimuko ekyakabiri rundi ha nkoko y'okubanza akabasanga nibarora, baina omugisa abaheereza abo!

³⁹“Kinu mukimanye, kakuba nyineeka yamanyire esaaha omusuma ei arukwiziramu, yakwikaire naarora, nukwo omusuma aleke kucwa enju ye.

⁴⁰Na inywe mwikale mweteekaniize, habwokuba Omwana w'omuntu aliija omu kasumi aka mutarukumunihirramu.”

⁴¹Nubwo Petero yamukagwize ati: “MUKAMA wange, orufumo runu orucweriire itwe, nandiki abantu boona?”

⁴²MUKAMA yamugarukamu ati: “Muheereza ki omwesigwa kandi ow'amagezi, mukama we ou akwasa ebintu bye, kurolerra eka ye n'okuha abantu be ebyokulya byabo omu kasumi kaabyo?

⁴³Omuheereza ogu ahiirirwe mukama we obu aliija akamusanga naakora ati.

⁴⁴Mazimakwo nimbagambira nti: Mukama we alimukwasa kurolerra ebintu bye byona.

⁴⁵Kyonka omuheereza ogu kakuba ateekereza omu mutima gwe ati: ‘Mukama wange aikaireyo, tarukwija bwango,’ akatandika kuteera abaheereza bataahi be abasaija n'abakazi, akeeta ha kulya, kunywa, n'okutamiira,

⁴⁶mukama we obu aligaruka ha kiro eki atarukumunihirramu na ha kasumi ak'atamanyire, alimufubira muno, kandi amubarre omuli abo abatarukwesigwa.

⁴⁷“Omuheereza ogu ayamanyire mukama we eki arukwenda, kandi tiyataho mutima kukikora, aliteerwa muno;

⁴⁸baitu omuheereza ataramanyire mukama we eki yayenzire, kandi yakora ekisemeriire kumufubiza, ogu aliteerwa kake. Anyakuheebwa bingi, alikaguzibwa bingi; n'anyakukwasibwa bingi muno, alisabwa bingi muno.”

⁴⁹“Nkaija kuhemba omurro omunsi; haa, kakuba gubaire gwakire!

⁵⁰Nkyaina omulingo ogw'okufa ogu ndukwija kufaamu; kandi nintuntura okuhika obu kulikahikirra!

⁵¹Nimuteekereza ngu, nkaija okuleeta obusinge, omu nsi? Nangwa, nimbagambira nti: Ntaije kuleeta obusinge baitu nkaija kuleeta okwebaganizaamu.

⁵²Okuruga hati enju enyakurumu abantu bataano eraayebaganizaamu: abasatu bahakanize ababiri, n'ababiri bahakanize abasatu.

⁵³Ise omwana alyebaganiza ha mutabani we, n'omutabani hali ise; omukazi alyebaganiza na muhara we na muhara we hali nyina; nyinazaara alyebaganiza ha mukamwana, na mukamwana hali nyinazaara.”

⁵⁴Yesu akongera kugambira ebitebe by'abantu ati: “Obu murora ekicu nikiimuka Bugwa-izooba, ahonaaho mugamba muti: ‘Enjura niija kugwa’, kandi egwakwo.

⁵⁵N'obu murora omuyaga niguteera nigwiha Bukiizi bw'obulyo, mugamba muti: ‘Nihaija kujwa omusana mwingi’, kandi gujwakwo.

⁵⁶Bagobya inywe! Obusumi bw'omusana n'enjura mubukengera ha kurora ensi n'iguru; habwaki mutakenga amakuru ag'obusumi bunu?”

⁵⁷“Kiki ekirukubalemesa kucwamu ekihikire?

⁵⁸Obu oraaba noogenda omukooti, lengaho kwikirraniza na kinyegerra mukyali omu muhanda; nukwo aleke kukutwara hali omucwi w'emisango, omucwi w'emisango akakukwasa omuserikale, n'omuserikale akakuta omu nkomo.

⁵⁹Ninkugambira nti: Toliruga omu nkomo okuhikya obu olikasasurra kimu akasente koona akasigaireyo.”