Read Runyoro - rutooro Luk 13 Bible Online

Luk 13 - Runyoro - rutooro bible

Luk 13

¹Omu kasumi ako hakabaho abantu abamu abamanyisize Yesu ha by'Abagaliraaya abaisirwe Pilato obu yabasangire nibatamba ebyonzira.

²Yesu yabagarukamu ati: “Nimuteekereza Abagaliraaya banu nubo bakaba bali basiisi okukira Abagaliraaya abandi, nikyo baabonaboniire bati?

³Nangwa, nimbagambira nti: Na inywe obu mutalyegarukamu, nukwo mulihwerekerra muti.

⁴Rundi nimuteekereza abantu ikumi na munaana bali, abaatiirwe omunaara gwa Silohamu gwabaita, nubo bakaba baina omusango ogurukukira ogw'abantu abandi abaikaraga Yerusaalemu?

⁵Nangwa, nimbagambira nti: Na inywe obu mutalyegarukamu, nukwo mulihwerekerra muti.”

⁶Aho Yesu akabaganikiza oruganikyo runu ati: “Omusaija akaba aina omuti gw'omutini ogwameezire omu rugonjo rwe orw'emizaabbibbu. Akaija kuguserraho ebijuma, tiyabisangaho.

⁷Yagambira omulimi w'emizaabbibbu ati: ‘Hati nakamara emyaka esatu ninyija kuserra ebijuma ha muti gunu omutini, ntarukusangaho kantu. Guteme! Nigusiisira ki itaka?’

⁸Baitu omulimi yamugarukamu ati: ‘Waitu, haakire guleke gumale omwaka gunu. Mbanze ngulimirre, nguteho n'ebyokuguleetera orwezo.

⁹Omwaka ogurukwija obu gulyana, kiriba kirungi, obu gutalyana nubwo tuligutema.’ ”

¹⁰Ha kiro kya Sabbato, Yesu akaba naayegesa omu isorrokaniro erimu.

¹¹Hakaba haroho omukazi ow'akaba aina omwoyo omubi ogwamucekeze kumara emyaka ikumi na munaana; akaba ayegemere, atarukusobora kwegorra.

¹²Yesu obu yamuboine, yamweta ati: “Mukazi iwe, okiziibwe endwara yaawe!”

¹³Yamutaho emikono, ahonaaho omukazi yagorroka, yakugiza Ruhanga.

¹⁴Omukuru w'isorrokaniro yabiihirwa habw'okurora Yesu akirize omuntu ha Sabbato. Nukwo kugambira abali aho ati: “Abantu baina ebiro mukaaga ebi basemeriire kukorramu emirimo. Nahabweki mwijege omu biro ebi, mukiziibwe; baitu hatali ha Sabbato!”

¹⁵Nubwo MUKAMA Yesu yamugarukiremu ati: “Bagobya inywe! Haroho omuli inywe atasibura ente ye rundi endogoyi ha Sabbato akagitwara kugyesera amaizi?

¹⁶Omukazi ogu, omwijukuru wa Abburahamu, Sitaani ou yazingazingire okumara emyaka ikumi na munaana; nawe tasemeriire okuzingururwa ha kiro kya Sabbato?”

¹⁷Obu yabalize ebigambo ebi, abanyanzigwa be boona baakwatwa ensoni; baitu ekitebe ky'abantu baasemererwa habw'ebyamahano byona ebi yakozire.

¹⁸Yesu yagamba ati: “Obukama bwa Ruhanga nibusisana buta? Ndabulengesaniza na ki?

¹⁹Nibusisana akasigo ka karadaali [5] omuntu aka yatwaire yabyara omu musiri gwe, kakakura, kaafooka kisaka kikooto, n'enyonyi zaayombeka ebiju byazo omu mataagi gaakyo.”

²⁰Yesu yayongera yagamba ati: “Obukama bwa Ruhanga ndabulengesaniza na ki?

²¹Nibusisana ekitumbisa omukazi eki yajwanganiize omu bihi bisatu eby'ensaano okuhika yoona obu yatumbire.”

²²Yesu akagenda naayegesa omu mbuga n'omu byaro, akwasire omuhanda oguraamuhikya Yerusaalemu.

²³Nubwo omuntu omu yamukagwize ati: “Mukama wange, abo abalijunwa baliba bake?” Yesu yamugarukamu ati:

²⁴“Mwekambe kutaaha nimuraba omu irembo erifunzire. Nimbagambira nti: Abantu baingi balirengaho okulirabamu, baitu tibalisobora.

²⁵“Nyineeka obu alikamara kukinga orwigi, mulyemerra aheeru nimweranga muti: ‘Waitu, tukingurre!’ Uwe alibagarukamu ati: ‘Tindukumanya nambere murukuruga.’

²⁶Nubwo mulitandika kwetonda muti: ‘Twalyaaga na iwe twanywaga na iwe, kandi wayegesaaga omu makuute g'owaitu.’

²⁷Nandiki uwe ati: ‘Mbagambiire: tindukumanya nambere murukuruga! Mundugeho inywe enkozi z'ebibi!’

²⁸Obu nubwo haliba okurra n'okunena ensaya, obu mulirora Abburahamu, Isaaka, Yakobbo n'abarangi boona bali omu bukama bwa Ruhanga, kandi kunu inywe mutangiirwe aheeru!

²⁹Abantu baliruga Burugaizooba na Bugwaizooba, ha Bukiizi obw'emoso na Bukiizi bw'obulyo baikarre ha bugenyi omu bukama bwa Ruhanga.

³⁰Mumanye nkooku abamu ab'enyuma baliba b'okubanza, kandi abamu ha b'okubanza baliba b'enyuma.”

³¹Omu kasumi ako konyini, Abafalisaayo abamu bakaija baagambira Yesu bati: “Ruga hanu ogende, habwokuba Herode nagonza kukwita.”

³²Yesu yabagarukamu ati: “Eboha egi, mugende mugigambire muti: ‘Hati na ijo nimbinga emyoyo emibi, ninkiza n'abarwaire, kandi ha kiro kya kasatu nubwo ndimalirra omulimo gwange.’

³³Baitu hati na ijo na ijweri ndi w'okweyongera omu maiso. Tikihikire omurangi okwitirwa aheeru y'orubuga Yerusaalemu.

³⁴“Yerusaalemu, Yerusaalemu iwe anyakwita abarangi kandi anyakuteeza amabaale abakwenda abakutumiirwe! Kaingaha obu nagondeze kusorooza abaana baawe nk'enkoko oku ebumbatira obwana bwayo omu mapapa gaayo, baitu mwayanga!

³⁵Hati murole: Enju yanyu neija kusigara eri kifurukwa. Kandi nyowe nimbagambira nti: Timulindora okuhikya obu muligamba muti: ‘W'omugisa ogu arukwija omu ibara lya MUKAMA.’ ”