Read Runyoro - rutooro Luk 14 Bible Online

Luk 14 - Runyoro - rutooro bible

Luk 14

¹Ha kiro kya Sabbato, Yesu obu yagenzire kulya omunju y'omu ha bakuru b'Abafalisaayo, abantu boona baamuhanga amaiso.

²Omu kitebe hagati hakaba haroho omusaija ow'akaba azimbire emikono n'amaguru.

³Nukwo Yesu kukaguza abeegesa b'ebiragiro n'Abafalisaayo ati: “Ebiragiro nibitwikiriza kukiza ha Sabbato rundi nangwa?”

⁴Bbo baahuna kwonka. Nukwo Yesu kukwataho omusaija yamukiza, yamwohereza agende.

⁵Hanyuma yabagambira ati: “Nooha omuli inywe anyakwina endogoyi rundi ente, kakuba egwa omu iziba ha Sabbato, ataakugiihiremu ahonaaho ha kiro eki?”

⁶Eki nakyo batasobole kukigarukamu.

⁷Yesu obu yarozire abagenyi abamu nkooku beekomiire ebiikaro eby'ekitiinisa, nubwo yabacweriire orufumo runu ati:

⁸“Obu baraakuraaliza ha bugenyi bw'obugole, leka kwikarra omu kiikaro ky'ekitiinisa, tihaikara kubaho omuntu arukukukiza ekitiinisa ayaraaliziibwe;

⁹kandi ayabaraaliize inywembi akaija akakugamba ati: ‘Rugiza omuntu onu.’ Nukwo okagenda n'ensoni kwikarra omu kiikaro eky'enyuma.

¹⁰Kakuba oraalizibwa, genda oikarre omu kiikaro ekitali ky'ekitiinisa, kikuraaliza obu aija hali iwe akugambire ati: ‘Munywani wange, ija oikarre omumaiso.’ Kinu kirikuhaisa ekitiinisa omu maiso g'abagenyi abandi boona.

¹¹Habwokuba weena anyakwenyumiza, alibundaaziba; kandi anyakwebundaaza, alinyumizibwa.”

¹²Kandi Yesu yagambira ayamuraaliize ati: “Obu oraabaga ocumbiire abantu ebyokulya ebya nyamusana rundi otaralizaaga bagenzi baawe, rundi beene banyu, rundi abaguuda bataahi baawe, tibaikara kukuraaliza nkooku wabaraaliize, kandi buli osaswirwe.

¹³Baitu obu oraateekaga obugenyi, oraalizeege abanaku, ebizingo, abalema n'abafu b'amaiso.

¹⁴Nubwo oliheebwa omugisa, habwokuba bbo, tibaina eki basobora kukugarurra, kandi iwe olisasurwa ha kuhumbuuka kw'abahikiriire.”

¹⁵Omu ha bantu abakaba baikaliire nibalya nawe, obu yahuliire eki, yagambira Yesu ati: “Aina omugisa ogu ow'alirya ebyokulya omu bugenyi bw'omu bukama bwa Ruhunga!”

¹⁶Baitu Yesu yamugarukamu ati: “Hakaba haroho omusaija ayateekere obugenyi bwingi, yaraaliza abantu baingi.

¹⁷Akasumi k'obugenyi obu kaahikire, yatuma omuheereza we kugambira abaaraaliziibwe ati: ‘Mwije, byona biteekaniziibwe.’

¹⁸Baitu boona baatandika kwekasa omu-omu. Ow'okubanza yagambira omuheereza ati: ‘Nguzire ekibanja, kimpikiriire kugenda kukirora. Nkesengeriize onganyire.’

¹⁹Ondi yagamba ati: ‘Nguzire ente ikumi, hati ningenda kwirengesa. Nkwesengeriize, onganyire.’

²⁰Ondi yagamba ati: ‘Nubwo ndugire kugabura, nikyo kintangire kwija.’

²¹“Omuheereza yagarukayo, ebi byona yabigambira mukama we. Nubwo nyineeka yakwasirwe ekiniga, yaragira omuheereza we ati: ‘Rahuka, ogende omu nguudo z'omu rubuga n'omu mihanda yarwo, oleete abanaku, ebizingo, abafu b'amaiso, n'abalema.’

²²Omu kasumi kake omuheereza yagaruka kumugambira ati: ‘Waitu, eki oragiire, kikozirwe; baitu nabwo hakyaroho omwanya.’

²³Nubwo mukama we yamuragiire ati: ‘Irooko ogende omu nguudo enkooto n'omu mihanda y'omu byaro, ohambirize abantu baije, nukwo enju yange ijule.

²⁴Baitu nimbagambira nti: Busaho n'omu ha bantu abo abaaraaliziibwe alirya ha bugenyi bwange.’ ”

²⁵Ebitebe by'abantu baingi bikaba nibihondera Yesu mbere arukugenda. Uwe yahinduka yabagambira ati:

²⁶“Weena anyakwija nambere ndi, ateerekeseze ise na nyina, mukazi we n'abaana, bagenzi be n'abanyaanya, nangwa n'obwomeezi bwe, ogu tasobora kuba mwegesebwa wange.

²⁷Weena ateetweka musaraba gwe akampondera, tasobora kuba mwegesebwa wange.

²⁸“Nooha omuli inywe anyakugonza kwombeka omunaara, atabanza kwikarra akabalirra ebiragwombeka; akamanya ngu, aina sente ezirukumara omulimo?

²⁹Kakuba atabalirra, obu aliba amazire kulima omusingi, kandi akasangwa atarukusobora kumara omulimo gwona, nubwo boona abaligurora balitandika kumusekeereza,

³⁰nibagamba bati: ‘Omuntu onu akatandika kwombeka, baitu tiyasobora kumaliriza!’

³¹“Rundi mukama ki anyakugonza kuramagira omukama ondi, atabanza kwikarra akahanuura nkooku araasobora n'abaserikale be omutwaro gumu kurwanisa omukama ondi anyakwina abaserikale emitwaro ebiri?

³²Kakuba arora nkooku atarukusobora, atuma abakwenda okutangatangana omukama ogu akyali hara, naasaba obusinge.

³³Na inywe nukwo kiba kiti, tiharoho n'omu anyakusobora kuba mwegesebwa wange, ateerekeseze byona ebi ainabyo.”

³⁴“Ekisura kirungi, baitu obu kihoibwamu orusa ruligarurwamu ruta?

³⁵Tikiina mugaso ha itaka noobu haakuba ha rubungo. Kisigarra kunagwa abantu. Anyakwina amatu, ahurre!”