Read Runyoro - rutooro Luk 15 Bible Online

Luk 15 - Runyoro - rutooro bible

Luk 15

¹Kiro kimu abasorooza b'omusoro n'abantu abateekerezebwaga kuba babi, boona bakeesorooleza hali Yesu kumuhuliriiza.

²Abafalisaayo n'abeegesa b'ebiragiro obu baarozire eki, baatontoroma nibagamba bati: “Ntamanya omuntu onu ajwahukirra abantu babi, n'okulya alya nabo!”

³Nubwo Yesu yabaganikiize oruganikyo runu ati:

⁴“Muntu ki omuli inywe anyakwina entaama kikumi, emu kakuba emuburaho, ataleka kyenda na mwenda omu kisaka akagenda kuserra enyakubuzire, okuhikya obu agizoora?

⁵Obu amara kugizoora, agita ha mabega aijwire omuhimbo.

⁶Obu ahika omuka ayeta banywani be n'abataahi, abagambira ati: ‘Bagenzi bange, katusemererwe hamu habwokuba entaama yange ey'abaire ebuzire ngizoire.’

⁷Nikyo ndukubagambira nti: Halibaho okusemererwa kwingi omwiguru habw'omusiisi omu anyakwegarukamu, kukira abantu ab'engeso nungi kyenda na mwenda abatarukwetaaga kwegarukamu.”

⁸“Rundi mukazi ki anyakwina siringi ikumi, emu kakuba emuburaho atahemba etaara, akasingorra enju, akaserra hoona hoona okuhikya obu agizoora?

⁹Obu amara kugizoora, ayeta banywani be n'abataahi nabagambira ati: ‘Bagenzi bange, katusemererwe hamu, habwokuba siringi yange ey'ebaire ebuzire ngizoire.’

¹⁰Nikyo ndukubagambira nti: Abamalaika ba Ruhanga nukwo basemererwa bati habw'omusiisi omu anyakwegarukamu.”

¹¹Aho Yesu yagamba ati: “Hakaba haroho omusaija ow'akaba aina abatabani babiri.

¹²Omuto akasaba ise ati: ‘Taata, mpa omugabo gw'obugwetwa bwange.’ Nubwo isebo yabaganizeemu itungo, yalibaha.

¹³Obu haahingwireho ebiro bike, omuto yasorooza ebintu bye byona, yagenda omunsi ya hara. Oku nuho yabisiisire omu ngeso mbi.

¹⁴“Obu yayemaliireho kimu buli kantu, nubwo haagwire kiihe omunsi egi. Omusigazi yatandika kutaaga habw'okutaa n'akantu.

¹⁵Aho yagenda kukorra omusi w'ensi egi. Omuntu ogu yamusindika kuliisa empunu omu iriisizo lye.

¹⁶Obu akaba naaliisa yayegomba kulya ebisusu empunu ebi zaalyaga, baitu busaho muntu ayamuhaire akookulya.

¹⁷Obu, yayetiire, yagamba ati: Abakozi baingaha aba isenyowe abarukulya nibaiguta, bikabalema n'okubalema; baitu nyowe hanu, enjara y'okunyita!

¹⁸Kanyimuke ngende hali isenyowe mmugambire nti: ‘Taata, nkasiisa hali Ruhanga na hali iwe.

¹⁹Tinkyasemerra n'okwetwa mwana waawe; haakire onfoole nk'omu ha bakozi baawe.’

²⁰Nubwo yaimukire yakwata ogw'okumugarra hali ise. “Obu akaba akyali haraho, ise yamumanyirra, yamukwatirwa embabazi. Nubwo yairukire, yamugwa omu kifuba.

²¹Baitu omwana yagamba ati: ‘Taata nkasiisa hali Ruhanga na hali iwe. Tinkyasemerra n'okwetwa mwana waawe.’

²²Ise yayeta abaheereza be nagamba ati: ‘Nyabura inywe mundahukize ekijwaro nyaburungi, mukimujweke. Mumute empeta omu rukumu n'enkaito omu bigere.

²³Muleete esajwa, mugiite, tucumbe obugenyi; tulye tusemererwe.

²⁴Omwana wange onu ow'akaba afiire, hati mwomeezi: akaba azaahire, hati azaahukire.’ Baatandika kusemererwa.

²⁵“Omu kasumi ako, omutabani omukuru akaba ali ha musiri. Obu akaba naagaruka, ali haihi kutaaha, yahurra engoma n'ebizina.

²⁶Yayeta omu ha baheereza, yamukaguza ekinyakuroho omu ka.

²⁷Nandiki omuheereza ati: ‘Muto waawe agarukire, kandi isiinywe amwitiire esajwa habwokuba agarukire n'obusinge kandi mwomeezi.’

²⁸Omukuru nukwo kukwatwa ekiniga yayanga okutaaha omunju. Ise yaturuka aheeru yamwesengereza ataahe.

²⁹Yagarukamu ise ati: ‘Nyowe mmazire emyaka enu yoona ninkuheereza. Tinkakweremeraga omurundi na gumu. Baitu tokampaga nangwa n'akabuzi nkasemererwaho n'abanywani bange.

³⁰Baitu mutabani waawe ogu ayasiisire itungo lye omu bamalaaya, obu agarukire, omwitiire esajwa!’

³¹Ise yamugarukamu ati: ‘Mwana wange, obutoosa otaaha na nyowe, kandi ebyange byona byawe.

³²Baitu kihikire okukora obugenyi bunu n'okusemererwa, habwokuba muto waawe ow'akaba afiire, hati mwomeezi; akaba azaahire, hati azaahukire.’ ”