Read Runyoro - rutooro Luk 16 Bible Online

Luk 16 - Runyoro - rutooro bible

Luk 16

¹Yesu akagambira abeegesebwa be ati: “Hakaba haroho omusaija muguuda ow'akaba aina omukeeto we. Baamumunyegerraho nkooku akaba naasiisasiisa ebintu bye.

²Nukwo kumweta yamukaguza ati: ‘Kiki kinu eki ndukuhurra hali iwe? Mbarra eby'obukeeto bwawe, habwokuba tokyagaruka kuba mukeeto wange.’

³Omukeeto nukwo kwekaguza ati: ‘Nyowe ndagira nta? Mukama wange naija kunyihaho obukeeto! Tinyina maani g'okulima, n'okusabiiriza nikunkwasa ensoni.

⁴Otyo, hati naacwamu eki ndaakora ekirintaahya omu maka gaabo obu ndiba mbingirwe omu bukeeto.’

⁵Nubwo yakeesire abanyamabanja ba mukama we omu-omu, yakaguza ow'okubanza ati: ‘MUKAMA wange naakutonga ki?’

⁶Yamugarukamu ati: ‘Naatonga encundiro z'amagita kikumi.’ Omukeeto yamugambira ati: ‘Kwata orupapura oruroho ibanja lyawe, ikarra bwango, ohandiike makumi ataano.’

⁷Yakaguza ondi ati: ‘Kandi iwe naakutonga ki?’ Yamugarukamu ati: ‘Naatonga ebigega by'engano kikumi.’ Omukeeto yamugambira ati: ‘Kwata orupapura oruroho ibanja, ohandiike ebigega kinaana.’

⁸Mukama w'omukeeto onu enkurungutaniza akamusiima habw'amagezi ge; habwokuba abantu b'ensi enu baina amagezi ag'okukorrana n'abagenzi baabu okukira abantu b'omusana.

⁹“Nikyo ndukubagambira nti: Itungo ly'obugobya libakonyere kwetungira enganjani. Hanyuma obu lirihwaho nubwo balibatangirra babataahye omu bwikaro obutalihwaho.”

¹⁰“Weena anyakwesigwa omu bintu bike, ayesigwa n'omu bingi; kandi ataba mwesigwa omu bintu bike, n'omu bingi tayesigwa.

¹¹Obu muraaba mutarabaire beesigwa omu itungo ly'ensi, nooha alibakwasa itungo ery'amazima?

¹²Obu muraaba mutarabaire beesigwa omu kurolerra eby'abandi, nooha alibaha ekyanyu kukirolerra?

¹³“Tiharoho muheereza anyakusobora kuheereza abakama babiri. Alinobaho omu, agonze ondi; rundi aligumira hali omu, agaye ondi. Timusobora kuheereza Ruhanga n'okwemarra ha itungo ly'ensi.”

¹⁴Abafalisaayo abagonzaaga itungo ly'ensi obu baahuliire ebi byona, baamusekeereza.

¹⁵Nukwo Yesu kubagambira ati: “Inywe mweyoleka nk'abarungi omu maiso g'abantu, baitu Ruhanga amanyire emitima yanyu. Habwokuba abantu eki banyumiza, Ruhanga akinuga.

¹⁶“Ebiragiro n'eby'Abarangi bikaba nibikora okuhika omu biro bya Yohaana Omubatiza; okurugirra obu, Amakuru Amarungi ag'obukama bwa Ruhanga gaikara nigarangirirwa, kandi buli omu ataho omutima okubutaahamu.

¹⁷Nikirahuka iguru n'ensi kuhwaho, okukira akacweka kamu ak'enyuguta kudiba omu Biragiro.”

¹⁸“Omuntu weena anyakubinga mukazi we akaswera ondi aba asiihaine; kandi n'omusaija anyakuswera omukazi abingirwe, nawe aba asiihaine.”

¹⁹“Hakaba haroho omusaija omuguuda ayajwaraga engoye eza kahukya n'ezindi ezirukunekaneka. Buli kiro yalyaga kandi yanywaga kurungi, ataina ekimuburaho.

²⁰Kandi ha irembo lye habyamahoga omusaija omunaku, ibara lye Lazaaro, ow'akaba acwekacwekere ebihooya.

²¹Yayegombaga kulya oburagalika obwarugaga ha meeza y'omuguuda; kandi embwa zaijaga nizikomba ebihooya bye.

²²“Hanyuma omunaku ogu yafa, abamalaika baamutwara baamuhikya Abburahamu nambere aikara. Omuguuda nawe yafa, yaziikwa.

²³Obu akaba ali okuzimu omu busaalizi bwingi, yaimukya amaiso yarora Abburahamu ali hara, na Lazaaro amuheriire.

²⁴Yayamirra naagamba ati: ‘Taata Abburahamu, ngirra embabazi! Otume Lazaaro aibike ensonga y'orukumo rwe omu maizi, aije anfukirize orulimi, habwokuba nimbabirirwa muno omu murro gunu!’

²⁵Baitu Abburahamu yamugarukamu ati: ‘Mwana wange, ijuka nkooku watungire ebirungi bingi obu okaba okyali omu nsi; Lazaaro we akabona enaku; baitu hati ahuumizibwe hanu, kandi iwe oli omu busaalizi bwingi.

²⁶Tikiri eki kyonka; hagati yaitu na inywe haroho omwanya mukooto ogurukutanga boona abagonza kuruga hanu kwija oku, rundi okuruga oku kwija kunu.’

²⁷“Omuguuda yagamba ati: ‘Hati nu Taata, ninkwesengereza otume Lazaaro omu ka ya Isenyowe,

²⁸habwokuba nyinayo bagenzi bange bataano. Abahabule bataliikara kwija omu kiikaro kinu eky'amabone.’

²⁹Abburahamu yamugarukamu ati: ‘Bagenzi baawe baina ebyahandiikirwe Musa n'abarangi, leka bahondere ebi.’

³⁰Omuguuda yagarukamu ati: ‘Nangwa, Taata Abburahamu! Kakuba habaho omuntu ayahumbuukire omu bafu, akabahikaho, baakwegarukiremu.’

³¹Nandiki Abburahamu ati: ‘Obu baraaba batarukuhurra Musa n'abarangi, tibarukwija kunanuka, noobu haraabaho anyakuhumbuukire omu bafu.’”