Read Runyoro - rutooro Luk 17 Bible Online

Luk 17 - Runyoro - rutooro bible

Luk 17

¹Yesu akagambira abeegesebwa be ati: “Ebyesiitazo tibiri by'okuburaho; baitu alikibona ogu anyakubireeta!

²Haakire abohwe orubengo omu bikya anagwe omu nyanja, okukira kwesiitaza omuha baana abato banu.”

³“Na inywe mwerinde! Mugenzi waawe obu araasiisaga, omuhanege. Obu araayegarukamuga, omuganyirege.

⁴Kakuba naakusobeza emirundi musanju omu kiro kimu, kandi naakwizira buli murundi naagamba ati: ‘Nzizire’, na iwe omuganyirege.”

⁵Abakwenda baasaba MUKAMA Yesu bati: “Twongereho okwikiriza!”

⁶Uwe yabagarukamu ati: “Kakuba mwina okwikiriza okurukwingana akasigo ka karadaali[6], mwakuragiire omutoma ogu muti: ‘Sinduka, oyebyale omu nyanja!’ Gwakubahuliire.”

⁷“Nooha omuli inywe anyakwina omuheereza arukumulimira rundi arukuliisa entaama ze, obu aba nakyaija naaruga ha musiri, mukama we aramugambiire ati: ‘Rahuka bwango, oikarre, olye ebyokulya byawe’?

⁸Taakumugambire ati: ‘Ihura ebyokulya byange, ojwale kurungi, ompeereze okuhika obu ndakamara kulya n'okunywa. Obu na iwe noija kulya n'okunywa’?

⁹Nimugira ngu, mukama we aramusiima habw'okukora ebi amuragiire?

¹⁰Na inywe nikyo kimu, obu muraabaga mumazire kukora byona ebi muragiirwe, mugambege muti: ‘Tuli baheereza abatarukugasa; tukozire ebi twaba nituragirwa kukora.’ ”

¹¹Yesu obu akaba naagenda Yerusaalemu, akaraba ha mutaano gwa Samaliya na Galiraaya.

¹²Obu yahikire omu kyaro kimu, yaitirana abagenge ikumi. Baayemerra haraho,

¹³baayamirra bati: “Yesu Omwegesa, otugirre embabazi!”

¹⁴Obu yabeetegeriize, yabagambira ati: “Mugende mweyoleke banyakatagara.” Obu bakaba nibakyagenda, baakira.

¹⁵Omu hali bo, obu yarozire nkooku akizire, yagaruka naahaisaniza Ruhanga n'iraka likooto.

¹⁶Yajuumara ha bigere bya Yesu, yamusiima. Omusaija onu akaba ali Musamaliya.

¹⁷Yesu nukwo kukaguza ati: “Abatambirwe tibabairege ikumi? Omwenda guraha?

¹⁸Busaho ondi anyakugarukire kuhaisaniza Ruhanga kwihaho omunyaihanga onu wenka?”

¹⁹Nukwo Yesu kumugambira ati: “Imuka oyegendere, okwikiriza kwawe kwakukiza.”

²⁰Abafalisaayo obu baakagwize Yesu ngu, obukama bwa Ruhanga nibwija di? Uwe yabagarukamu ati: “Obukama bwa Ruhanga tibwija niburorwa,

²¹kandi tiharoho muntu aligamba ati: ‘Ka mbunu hanu!’ Rundi: ‘Mbuli hali.’ Habwokuba obukama bwa Ruhanga buli omuli inywe.”

²²Nubwo Yesu yagambiire abeegesebwa be ati: “Akasumi kalihika obu mulyegomba okurora ekimu ha biro by'Omwana w'omuntu, baitu timulikirora.

²³Balibagambira bati: ‘Darawe ali hanu!’ Rundi: ‘Ngugwo ali hali!’ Baitu mutaligyayo, kandi mutalibahondera.

²⁴Omurabyo nkooku gumulikiza haiguru kuruga ha rubaju rumu okuhika ha rundi, Omwana w'omuntu nawe nukwo aliba ati ha kiro ky'okwija kwe.

²⁵Baitu alibanza kubonabonesibwa omu bintu bingi, n'okwangwa abantu ab'ebiro binu.

²⁶“Nkooku kyabaire omu biro bya Noha, nukwo kiriba kiti n'omu biro by'Omwana w'omuntu.

²⁷Abantu baalyaga, baanywaga, kandi baasweranganaga okuhika ha kiro Noha eki yataahiiremu omu lyato erikooto, okusandaara kw'amaizi kukaija kwahwerekereza abantu boona.

²⁸“Kandi nukwo kyabaire n'omu biro bya Loti. Abantu baalyaga, baanywaga, baaguraga, baatundaga, baabyaraga, kandi baayombekaga.

²⁹Baitu ha kiro Loti eki yarugiremu Sodomu, omurro n'obuganga bikaruga omwiguru byagwa, byahwerekereza abantu boona.

³⁰Nukwo kiriba kiti na ha kiro Omwana w'omuntu eki alibonekeramu.

³¹“Ha kiro eki alisangwa ha nju eruguru kandi ebintu bye biri omunju, atalisirimuka kubiihamu; kandi n'ow'alisangwa omu musiri, ataligaruka omu ka.

³²Mwijuke muka Loti!

³³“Weena anyakugonza kujuna obwomeezi bwe, alibufeerwa; kandi anyakufeerwa obwomeezi bwe, alibujuna.

³⁴Nimbagambira nti: Ha kiro eki ababiri abaliba babyamire omu kitabu kimu: omu alitwarwa, ondi alisigara.

³⁵Abakazi babiri abaliba nibasa hamu: omu alitwarwa, ondi alisigara.” [

³⁶N'abasaija ababiri abaliba bali omu musiri: omu alitwarwa, ondi alisigara.]

³⁷Abeegesebwa baamukaguza bati: “Waitu, ebi biriba nkaha?” Yesu yabagarukamu ati: “Nambere hali omutumbi, oku nuho esega zeesorooleza.”