Read Runyoro - rutooro Luk 18 Bible Online

Luk 18 - Runyoro - rutooro bible

Luk 18

¹Nubwo Yesu yabaganikiize oruganikyo runu okubeegesa nkooku basemeriire kusaba batarukuhwa masiko.

²Yagamba ati: “Omu rubuga orumu hakaba harumu omucwi w'emisango ow'akaba atatiinire Ruhanga noobu kwakuba okufaaho abantu.

³Kandi omu rubuga oru hakaba harumu omufaakati ayaikaraga naija hali uwe naamusaba ati: ‘Ndamura n'omunyanzigwa wange.’

⁴Omucwi w'emisango akamara omwanya akyayangire kumuramura; baitu hanyuma yayeteekerereza wenka ati: ‘Noobu ndaaba ntarukutiina Ruhanga rundi kufaaho abantu,

⁵baitu habw'omufaakati onu kuntalibaniza muno, kammuramule n'omunyanzigwa we. Hatali eki naija kunjwahya habw'okwikara nagaruka!’”

⁶MUKAMA Yesu nukwo kubagambira ati: “Mwetegereze omucwi w'emisango atali mwinganiza eki agambire.

⁷Lero si, Ruhanga taliramura kurungi abantu be aba yakomeremu abamutaagira nyamusana n'ekiro? Alibaikazaho kubakoonyera?

⁸Nimbagambira nti: Alibaramura bwango. Baitu Omwana w'omuntu obu aliija, alisanga okwikiriza kukyali omunsi?”

⁹Yesu yagaruka kuganikiza abantu abaayemanyaga kuba bahikiriire, kandi nibagaya abandi, yagamba ati:

¹⁰“Abasaija babiri bakagenda omunju ya Ruhanga kusaba; omu akaba ali Mufalisaayo, ondi musorooza w'omusoro.

¹¹Omufalisaayo yayemerra yasaba omu mutima gwe ati: ‘Ai Ruhanga, ninkusiima, habwokuba tindi nk'abantu abandi: abahoogozi, abateesigwa, abasiihani, noobwakubaire nk'omusorooza w'omusoro onu.

¹²Buli wiiki nsiiba emirundi ebiri, kandi mpa kimu kya ikumi ha bintu byona ebi ntunga.’

¹³Baitu omusorooza w'omusoro akeemerra haraho, atarukugonza n'okuraramira haiguru, yayeteerateera ha kifuba naagamba ati: ‘Ai Ruhanga, onganyire nyowe omusiisi!’

¹⁴Nimbagambira nti: Omusaija onu akagaruka owe aganyirwe okukira oli; habwokuba weena anyakwenyumiza, alibundaazibwa; kandi anyakwebundaaza, alinyumizibwa.”

¹⁵Abantu bakaleetera Yesu abaana enkerembe abakwateho; baitu abeegesebwa obu baarozire eki baabacoomera.

¹⁶Nubwo Yesu yabeeta naagamba ati: “Muleke abaana baije nambere ndi, mutabatanga; habwokuba abali nk'abo, obukama bwa Ruhanga bwabu.

¹⁷Mananukwo nimbagambira nti: Weena atarukwikiriza obukama bwa Ruhanga nk'omwana muto, talibutaahamu.”

¹⁸Omulemi omu akamukaguza ati: “Mwegesa omurungi, nkole ki okugweterwa obwomeezi obutahwaho?”

¹⁹Yesu yamugarukamu ati: “Noonyetera ki omurungi? Tiharoho murungi n'omu kwihaho Ruhanga wenka.

²⁰Ebiragiro obimanyire: ‘Otalisiihana, otaliita, otaliiba, otalihangirra, otiinege sso na nyoko.’”

²¹Omusaija yaragukamu ati: “Ebi byona nkabikwata okuruga omu buto bwange.”

²²Yesu obu yahuliire eki, yamugambira ati: “Nookyaburwaho kimu kyonka. Tunda byona ebi oinabyo ogabire abaseege, oije ompondere; nubwo olitunga itungo omwiguru.”

²³Baitu omusaija obu yahuliire eki yagwerwa, habwokuba akaba ali muguuda muno.

²⁴Yesu obu yarozire nkooku agweriirwe, yagamba ati: “Ka nikiremeera abaguuda kutaaha omu bukama bwa Ruhanga!

²⁵Nikirahuka engamiya kuraba omu nyindo y'enkinzo kukira omuguuda kutaaha omu bukama bwa Ruhanga.”

²⁶Abantu abaakihuliire nukwo kumukaguza bati: “Mara nooha asobora kujunwa?”

²⁷Yesu yagarukamu ati: “Abantu eki batasobora, Ruhanga akisobora.”

²⁸Nubwo Petero yagambire ati: “Dora itwe, tukasiga byona twakuhondera.”

²⁹Nandiki Yesu ati: “Mali mali nimbagambira nti: Busaho muntu n'omu ayasigire enju ye, rundi mukazi we, rundi bagenzi be habw'obukama bwa Ruhanga,

³⁰ow'ataliheebwa bingi okukiraho omu kasumi kanu, kandi omu biro ebirukwija alitunga obwomeezi obutahwaho.”

³¹Yesu akatwara ikumi na babiri ha rubaju yabagambira ati: “Hati nu, nitugenda Yerusaalemu, kandi byona ebyahandiikirwe abarangi ha Mwana w'omuntu nibiija kuhikira.

³²Aliheebwayo hali Abanyamahanga, balimusekeereza, balimukora kubi, kandi balimucwera ebicwanta.

³³Balimuteera enkoba, kandi balimwita; baitu obu halihinguraho ebiro bisatu alihumbuuka.”

³⁴Abeegesebwa bateetegereze na kimu ha bigambo binu, habwokuba amakuru gaabyo gakaba gabawsrekerwe, kandi batakenge Yesu eki yabalizeeho.

³⁵Obu akaba nairirra orubuga Yeriko, Yesu yasanga omufu w'amaiso aikaliire ha muhanda rubaju naasabiiriza.

³⁶Obu yahuliire ekitebe kingi ky'abantu nikihingura, yakaguza ekinyakuroho.

³⁷Baamugambira bati: “Yesu owa Nazareeti nuwe arukuhingura.”

³⁸Omufu w'amaiso nukwo kwamirra ati: “Yesu, mwijukuru wa Daudi, ongirre embabazi!”

³⁹Abantu abakaba beebembiire baamucoomera aculeere. Baitu uwe yatokera kimu ati: “Mwijukuru wa Daudi, ongirre embabazi!”

⁴⁰Yesu yayemerra, yaragira bamumuleetere. Obu yahikire haihi, Yesu yamukaguza ati:

⁴¹“Noogonza nkukorre ki?” Yamagarukamu ati: “Mukama wange, ningonza ndole!”

⁴²Yesu yamugambira ati: “Rora! Okwikiriza kwawe nukwo kwakukiza.”

⁴³Ahonaaho amaiso ge gaiguka, yahondera Yesu naahaisaniza Ruhanga. Abantu boona obu baarozire eki baakugiza Ruhanga.