Read Runyoro - rutooro Luk 19 Bible Online

Luk 19 - Runyoro - rutooro bible

Luk 19

¹Yesu akataaha omu rubuga Yeriko, kandi akaba ali w'okururabamu.

²Hakaba haliyo omusaija omuguuda, omukuru w'abasorooza b'omusoro, ibara lye Zakayo.

³Akagonza muno kurora Yesu ogu nkooku arukusisana, baitu atasobole, habw'ekitebe kingi ky'abantu, habwokuba akaba ali mugufu.

⁴Nubwo yairukire yayebembera ekitebe kyona, yatemba omutoma[7], nukwo arole Yesu, habwokuba ogu nugwo muhanda ogu akaba naarabamu.

⁵Yesu obu yahikireho yararamira haiguru, yamugambira ati: “Zakayo, sirimuka bwango, habwokuba kiro kya hati ndi w'okusiiba owaawe.”

⁶Zakayo yasirimuka bwango, yamutangirra n'okusemererwa kwingi.

⁷Abantu obu baarozire eki baatandika kutontoroma nibagamba bati: “Yagenda kuba mugenyi w'omuntu omusiisi!”

⁸Aho Zakayo yayemerra yagambira MUKAMA Yesu ati: “Mukama wange, hati ninyija kugabira abanaku ekicweka kya kabiri ky'ebintu byange; kandi obu haraaba haroho ou nagobiize weena, ndamulehera emirundi ena.”

⁹Yesu yamugambira ati: “Kiro kya hati okujunwa kwizire omunju enu, habwokuba omusaija onu nawe mwijukuru wa Abburahamu;

¹⁰kandi Omwana w'omuntu akaija kuserra n'okujuna ekyabuzire.”

¹¹Obu bakaba nibakyahuliriza ebi, Yesu yayongera kubaganikiza oruganikyo, habwokuba akaba ali haihi na Yerusaalemu, kandi abantu bakateekereza ngu, obukama bwa Ruhanga bukaba buli haihi kwija.

¹²Nubwo yagambire ati: “Hakaba haroho omuntu ow'ekitiinisa ayagenzire omu nsi ya hara kwetungira obukama, nukwo hanyuma agaruke.

¹³Obu akaba atakagenzire, akeeta ikumi ha baheereza be, yabaha buli omu siringi nka bikumi bibiri, naabagambira ati: ‘Muzisuubuze okuhikya obu ndigaruka.’

¹⁴Baitu abantu b'owaabu bakaba bamunobere, nukwo kumuhondeza abakwenda nibagamba bati: ‘Omusaija ogu titurukwenda atuleme.’

¹⁵“Obu yagarukire, amazire kulya obukama, akaragira kumwetera abaheereza be aba yasigiire sente, nukwo amanye amagoba gaazo.

¹⁶Ow'okubanza yaija omu maiso ge yagamba ati: ‘Mukama wange, siringi zaawe makumi abiri ezi wampaire ikagoba bikumi bibiri.’

¹⁷Yamugarukamu ati: ‘Webale muheereza wange omurungi! Nkooku oyesigirwe omu bintu ebike, nkuhaire obusobozi bw'okulema embuga ikumi.’

¹⁸Omuheereza wa kabiri yaija yagamba ati: ‘Mukama wange, siringi zaawe makumi abiri ezi wampaire ikagoba kikumi kimu.’

¹⁹Yamugarukamu ati: ‘Na iwe noija kulema embuga itaano.’

²⁰Omuheereza ondi yaija yagamba ati: ‘Mukama wange, siringi zaawe nzinu, nkazaahura omu kitambaara.

²¹Nkakutiina, habwokuba oli muntu mubi; oihamu eki otaratairemu, ogesa ebi otarasigire.’

²²Yamagarukamu ati: ‘Muheereza iwe omubi! Kankusingise omusango ninsigikira ha bigambo ebi ogambire! Okamanya nkooku ndi muntu mubi, nyihamu eki ntaratairemu, kandi ngesa ebi ntarasigire!

²³Mara habwaki sente zange otarazitaire omu banka? Obu nakugarukire naakuziihireyo n'amagoba gaazo?’

²⁴Nubwo yagambiire abakaba beemeriireho ati: ‘Mumwiheho siringi zange abiri, muzihe ogu ayagobere bikumi bibiri.’

²⁵Nukwo bbo kumugambira bati: ‘Waitu, kandi uwe k'aina ebikumi bibiri!’

²⁶Nyowe nimbagambira nti: ‘Weena anyakwina, alyongerwaho; baitu ataina bingi, n'akatoito aka ainako kalimwihwaho.

²⁷Hati nu, abanyanzigwa bange mubaleete hanu, mubaitire omumaiso gange!’ ”

²⁸Yesu obu yamazire kugamba ebi, yabeebembera kugenda Yerusaalemu.

²⁹Obu yairiire haihi na Beetifage na Betaniya, ahikire ha rusozi orwayetwaga orw'emiti Oliva, yatuma babiri ha beegesebwa be,

³⁰ati: “Mugende omu kyaro kiri ekituroleriire, obu muraaba nimukyataahamu muti, murasanga omwana gw'endogoyi ogutakatembwahoga muntu, gusibirwe; mugusibule muguleete hanu.

³¹Obu haraabaho arukubakaguza ati: ‘Nimusibura gwaki?’ Mumugambire muti: ‘Mukama waitu nagwetaaga.’ ”

³²Abaatumirwe baagenda, baasanga biri nkooku yabagambiire.

³³Obu bakaba nibasibura omwana gw'endogoyi bakama baagwo baabakaguza bati: “Nimusibura gwaki?”

³⁴Baagarukamu bati: “Mukama waitu nagwetaaga.”

³⁵Nubwo baaguleetiire Yesu, baagutaho ebijwaro byabo, bagumutembya.

³⁶Obu akaba naagenda, baayarra ebijwaro byabo omu muhanda.

³⁷Obu yairiire haihi na Yerusaalemu, ahikire ha kasirimuko k'orusozi rw'emiti Oliva, ekitebe kyona eky'abeegesebwa be kyatandika kusemererwa n'okuhaisaniza Ruhanga n'iraka likooto habw'ebihuniriza ebi baarozire,

³⁸nibagamba bati: “W'omugisa MUKAMA ogu arukwija omu ibara lya Atahwaho. Obusinge bube omwiguru, n'ekitiinisa kibe hali Mukama w'iguru!”

³⁹Abafalisaayo abamu ab'omu kitebe eki, nukwo kumugambira bati: “Mwegesa, culeeza abeegesebwa baawe!”

⁴⁰Yesu yabagarukamu ati: “Nimbagambira nti: Banu noobu baraaculeera, amabaale nigaija kutoka.”

⁴¹Obu akaba nairra haihi n'orubuga, yarurora, yarulirirra ati:

⁴²“Nangwa n'ekiro kinu kakuba obaire omanyire ebirukuleeta obusinge! Baitu bambi, bikuserekerwe!

⁴³Akasumi kalikuhikira abanyanzigwa baawe obu balikugota, bakwehingulirize, bakufunze embaju zoona.

⁴⁴Balikukenya hansi hamu n'abantu abaliba bali omuliiwe, kandi tibalikusigira ibaale na limu eryemeriire ha lindi; habwokuba otamanye akasumi Ruhanga aka yaiziremu kukujuna!”

⁴⁵Yesu akataaha omunju ya Ruhanga, yatandika kubingamu abakaba nibatundiramu ebintu,

⁴⁶naabagambira ati: “Kikahandiikwa ngu: ‘Enju yange eraayetwaga Nju y'okusabiramu’; baitu inywe mugifoire bwingira bw'abanyagi!”

⁴⁷Kandi bukyabukya Yesu yayegesaaga omunju ya Ruhanga. Baanyakatagara abakuru, n'abeegesa b'ebiragiro, n'abeebembezi b'abantu bakaba nibaserra kumwita,

⁴⁸baaburwa eki baraamukora, habwokuba abantu boona bakaba nibamuhuliiriza n'omutima gumu.