Read Runyoro - rutooro Luk 20 Bible Online

Luk 20 - Runyoro - rutooro bible

Luk 20

¹Kiro kimu, Yesu obu akaba naayegesa abantu omunju ya Ruhanga kandi naabarangirra Amakuru Amarungi, banyakatagara abakuru n'abeegesa b'ebiragiro hamu n'abakuru b'abantu baija,

²baamukaguza bati: “Tugambire, busobozi ki oburukukukozesa ebintu binu, rundi ayabukuhaire nooha?”

³Yesu yabagarukamu ati: “Na nyowe ka mbakaguze, mungambire.

⁴Okubatiza kwa Yohaana kukaruga hali Ruhanga rundi omu bantu?”

⁵Baitu bbo baatandika kuteezangana empaka bati: “Obu turagarukamu ngu: ‘Kukaruga hali Ruhanga’, naija kutukaguza ati: ‘Habwaki mutaramwikiriize?’

⁶Obu turagarukamu ngu: ‘Kukaruga omu bantu’, abantu boona nibaija kututeera amabaale, habwokuba bananukire Yohaana nkooku akaba ali murangi.”

⁷Nukwo kugarukamu ngu: Tibamanyire nambere kwarugire.

⁸Yesu nubwo yabagambiire ati: “Na nyowe tindukwija kubagambira obusobozi oburukunkoza binu.”

⁹Nubwo Yesu yayongera kuganikiza abantu oruganikyo runu ati: “Omusaija akabyara orugonjo rw'emizaabbibbu, yarusigira abapangisa okururolerra, yagenda omunsi endi, amaleyo omwanya.

¹⁰Obusumi obw'okunoga obu bwahikire, yatuma omuheereza hali abapangisa abo, bamutwekere ha bijuma by'emizaabbibbu. Baitu abapangisa baamuteera, baamubinga, yarugayo ngaro-nsa.

¹¹Yagaruka yatuma omuheereza ondi, nawe baamuteera, baamuswaza, baamubinga. Nawe yarugayo ngaro-nsa.

¹²Yayongera yatumayo omuheereza owa kasatu; onu nawe baamuhutaaza, baamubinga.

¹³Nubwo mukama w'orugonjo yayekagwize ati: ‘Nyowe ndakora ki? Ka mbatumire omwana wange omugonzibwa; rundi uwe baraamugayuka!’

¹⁴Baitu abapangisa obu baamurozire naija, baagambirangana bati: ‘Onu nuwe mugwetwa. Muleke tumwite, obugwetwa bube bwaitu’.

¹⁵Baamuturukya omu rugonjo, baamwita. “Boojo, mukama w'orugonjo, abapangisa abo alibakora ki?

¹⁶Aliija abahwerekereze, n'orugonjo arukwase abandi.” Abantu obu baahuliire eki baagamba bati: “Nikikafuuhe!”

¹⁷Baitu Yesu yabarolerra nabakaguza ati: “Ekyahandiikirwe kinu ekirukugamba kiti: ‘Ibaale lyonyini abombeki eri baayangire, niryo lyafookere bugumizo bw'enju’, nikimanyisa ki?

¹⁸Omuntu weena anyakugwa ha ibaale eri alicwacwanuka; kandi weena ou lirigwera lirimusasangura.”

¹⁹Omu kasumi ako abeegesa b'ebiragiro n'abanyakatagara abakuru bakaba nibagonza kukwata Yesu, habwokuba bakamanya oruganikyo oru nkooku yaruganikize nirukwata hali bo, baitu bakatiina abantu.

²⁰Nahabweki balinda akasumi aka baraamukwatiraho. Baatuma n'entasi ezayesisanize kuba b'amananu, basobole kumukwasa omu bigambo ebi arukugamba, nukwo bamuheyo omu mikono n'omu busobozi bw'omulemi mukuru.

²¹Baakaguza Yesu bati: “Mwegesa, tumanyire nkooku agamba kandi oyegesa ebihikire, kandi tosoroora omu bantu, baitu oyegesaakwo omuhanda gwa Ruhanga.

²²Kihikire kuha Kaisaali omusoro rundi nangwa?”

²³Baitu uwe yamanya obugobya bwabu, nukwo kubagambira ati:

²⁴“Munyoleke siringi. Ekisisani kinu n'ebihandiikirweho by'oha?” Baagarukamu bati: “Bya Kaisaali”.

²⁵Yesu yabagambira ati: “Ebya Kaisaali mubihe Kaisaali n'ebya Ruhanga mubihe Ruhanga.”

²⁶Batasobole kumukwasa omu kigambo kyona omu maiso g'abantu. Eki yabagarukiremu kyabahuniriza, baahuna kwonka.

²⁷Abasadukaayo abamu, abo abagamba ngu, abafu tibahumbuuka, bakaija hali Yesu

²⁸baamukaguza bati: “Mwegesa, Musa akatusigira ekihandiiko ekirukugamba kiti: ‘Omusaija obu araafaaga akasiga omukazi atazaire baana, mugenzi w'omusaija ogu aswere omufaakati nukwo bazarre kifa abaana.’

²⁹Hakaba haroho banyineemu musanju; mukuru wabu yaswera omukazi, baitu yafa atasigire baana,

³⁰n'owa kabiri yaswera omukazi ogu,

³¹n'owa kasatu nukwo ati, okuhika boona musanju obu baafiire batasigire baana.

³²Abo boona obu bahoireho, omukazi nawe yafa.

³³Obu, ha kiro ky'okuhumbuuka aliba muk'oha? Habwokuba boona musanju bakamuswera.”

³⁴Yesu yabagarukamu ati: “Abantu ab'ebiro binu baswera kandi baswerwa,

³⁵baitu abantu abalisangwa basemeriire kuhika oku hanyuma y'okuhumbuuka kw'abafu, tibaliswera.

³⁶Bbo tibaligaruka kufa, habwokuba balisisana nk'abamalaika, kandi baana ba Ruhanga, ningira babagaine ha kuhumbuuka.

³⁷Baitu abafu nkooku bahumbuurwa, na Musa wenka akakimanyisa omu byahandiikire okwoleka ebyabaireho ha rusaka ruli, nambere yagumize MUKAMA nkooku ali Ruhanga wa Abburahamu, Ruhanga wa Isaaka, kandi Ruhanga wa Yakobbo.

³⁸Tali Ruhanga w'abafiire, baitu w'aboomeezi, habwokuba hali Uwe boona baba boomeezi.”

³⁹Abamu ha beegesa b'ebiragiro nukwo kugarukamu bati: “Mwegesa ogambire kurungi!”

⁴⁰Kandi batongere kumukaguza ebindi.

⁴¹Yesu yabakaguza ati: “Abantu nibasobora bata kugamba ngu: Kristo aba mwijukuru wa Daudi?

⁴²Kandi kunu Daudi wenka omu kitabu kya Zabbuli akagamba ati: ‘Atahwaho akagambira MUKAMA wange ati: Ikarra ha mukono gwange ogw'obulyo,

⁴³okuhika abanyanzigwa baawe obu ndibafoora akatebe k'ebigere byawe.’

⁴⁴Daudi obu arraba yayesire Kristo MUKAMA we, obu aba ata mwijukuru we?”

⁴⁵Abantu boona obu bakaba nibamuhuliriza, Yesu akagambira abeegesebwa be ati:

⁴⁶“Mwerinde abeegesa b'ebiragiro abagonza kugendagenda bajwaire ekanzu ezirukukwekweya, okuramukibwa n'ekitiinisa omu butale, n'okwikarra ha ntebe ez'ekitiinisa omu masorrokaniro, n'ebiikaro ebirukukira oburungi omu magenyi.

⁴⁷Bbo banyaga amaju g'abafaakati, hanyuma beezookesa nibarandagatana omu kusaba! Abo balicwerwa omusango ogurukukira ogw'abandi!”