Read Runyoro - rutooro Luk 21 Bible Online

Luk 21 - Runyoro - rutooro bible

Luk 21

¹Yesu akaimukya amaiso yarora abaguuda nibata ebisembo byabo omu lyahurro lya sente omunju ya Ruhanga;

²kandi yarora n'omufaakati omunaku naanagamu sente ibiri ez'itaano.

³Yesu yagamba ati: “Mazima nimbagambira nti: Omufaakati omunaku onu anagiremu nyingi okukira abandi boona.

⁴Habwokuba abo boona banagiremu ebi basaagiriire; baitu uwe omu bunaku bwe ahaireyo byona ebi ainabyo.”

⁵Abantu abamu bakaba nibabazaaho Enju ya Ruhanga nkooku ekaba etonerwe kurungi n'amabaale ag'omuhendo kandi n'ebisembo abantu ebi baahayoga. Nukwo Yesu kubagambira ati:

⁶“Ebi byona ebi murukurora, akasumi kalihika obu hatalisigara ibaale na limu eriri ha lindi, eritalinagwa hansi.”

⁷Nubwo abantu baamukagwize bati: “Mwegesa, binu biribaho di? Kandi karorwaho ki akalyoleka nkooku biri haihi kubaho?”

⁸Yesu yabagarukamu ati: “Mwerinde nukwo muleke kuhabisibwa; habwokuba baingi baliija omu ibara lyange nibagamba bati: ‘Ninyowe ogu!’ Kandi bati: ‘Akasumi kahikire!’ Baitu mutalibahondera.

⁹Obu mulihurra obulemu n'epumpu, mutalitiina; ebi by'okubanza kubaho, baitu empero terihika ahonaaho.”

¹⁰Yayongera kubagambira ati: “Ihanga liriimukirra erindi, n'obukama bulirwanisa obundi.

¹¹Halibaho emisisa y'amaani, haligwa kiihe omu biikaro ebitali bimu, kandi kagingo eriita baingi; halizooka ebintu ebirukutiinisa n'ebihuniriza eby'amaani ebirukuruga omu iguru.

¹²“Baitu binu byona bitakabaireho balibakwata, balibahayo kucwerwa emisango omu masorrokaniro, balibata omu nkomo, balibahikya omu maiso g'abakama n'abalemi bakuru nibabatura nyowe.

¹³Obu nubwo mulitunga omwanya ogw'okumpeera obwakaiso.

¹⁴Kinu mwikale nimukiijuka: mutalyetegeka eki mulyetonganirra akasumi katakahikire;

¹⁵habwokuba ndibaha ebi muligamba hamu n'amagezi abanyanzigwa banyu aga batalisobora kwemera rundi kuhakaniza.

¹⁶Muliheebwayo noobu baakubaire abazaire banyu, n'abagenzi banyu, n'ab'oruganda, n'abanywani banyu; abamu omuli inywe balibaita.

¹⁷Mulinobwa boona habwange.

¹⁸Baitu busaho kasoke na kamu aka ha mitwe yanyu akalibaburaho.

¹⁹Omu kugumiisiriza nuho mulijunira obwomeezi bwanyu.”

²⁰“Obu mulirora Yerusaalemu rugosirwe amahe, mumanye okuhwerekerra kwarwo nkooku kuli haihi.

²¹Abaliba bali omu Buyudaaya basingirwe ha nsozi, n'abaliba bali omu rubuga barurugemu, kandi n'abaliba bali omu byaro batalirutaahamu.

²²Habwokuba ebi nibyo ebiro by'okuhoora enzigu, nukwo byona Ebyahandiikirwe bihikirizebwe.

²³Bambi! Balikibona abakazi abaliba baina enda n'abarukwonkya omu biro ebi! Habwokuba omunsi halibamu emihito nyingi, kandi Ruhanga alikayukira muno abantu abo.

²⁴Abamu baliitwa obwogi bw'empirima, abandi balinyagirwa omu mahanga goona, kandi Yerusaalemu ruliikara nirurubatirirwa Abanyamahanga okuhikya engoma yabo obu erihwaho.”

²⁵“Halibaho oburorwaho omu izooba, omu kwezi, n'omu nyunyuuzi; kandi omu nsi amahanga goona galiba omu bujune, nigatuntura habw'okuhirra kw'enyanja n'ebigonzi byayo.

²⁶Abantu balikabibwa obutiini habw'okuteekereza akabi akarukugwera ensi; nangwa n'eby'amaani eby'omwiguru biritengesebwa.

²⁷Nubwo balirora Omwana w'omuntu naizira omu kicu aina obusobozi n'ekitiinisa kingi.

²⁸Ebintu ebi obu biritandika kubaho, mwimukye emitwe yanyu, murole haiguru habwokuba okucungurwa kwanyu kuliba kuli haihi.”

²⁹Yesu yabacwera orufumo runu ati: “Mwegere ha muti omutini na ha miti endi yoona.

³⁰Obu murora etandikire kurokera, mumanya ekyanda nkooku kiri haihi.

³¹Nukwo na inywe obu mulirora binu nibibaho, mumanye obukama bwa Ruhanga nkooku buli haihi.

³²Mananukwo nimbagambira nti: Akasumi kanu tikalihwaho ebi byona bitakabaireho.

³³Iguru n'ensi birihwaho, baitu ebigambo byange tibirihwaho.”

³⁴“Mwerinde! Emitima yanyu etaikara kutwarwa omukoijo n'obutamiizi n'emyetunturo ey'obwomeezi bunu, nukwo ekiro eki kitalibagwera bwango nk'ekiriba.

³⁵Habwokuba ekiro eki kiriizira abantu boona abaikara omunsi.

³⁶Mwikale nimurora obwire bwona, nimusaba obutoosa nukwo mutunge amaani ag'okubatabura ebintu ebi byona ebiribaho n'ag'okubasoboza kwemerra omu maiso g'Omwana w'omuntu.”

³⁷Nyamusana Yesu yayegesaaga omunju ya Ruhanga, baitu obwire obu bwairaga yagendaga kugonya ha rusozi rw'emiti Oliva.

³⁸Kandi nyenkya kara abantu boona baazindukaga kuhurra ebi arukwegesa omu Nju ya Ruhanga.