Read Runyoro - rutooro Luk 22 Bible Online

Luk 22 - Runyoro - rutooro bible

Luk 22

¹Obugenyi bw'Emigaati Etatumbisiibwe, oburukwetwa Okuhingurwaho, bukaba buli haihi kuhika.

²Baanyakatagara abakuru n'abeegesa b'ebiragiro bakaba nibaserra amagezi ag'okwita Yesu, habwokuba bakaba nibatiina abantu.

³Nubwo Sitaani yataahiremu Yuda arukwetwa Isikalyota, omu ha ikumi na babiri.

⁴Yuda akagenda yahanuura n'abanyakatagara abakuru n'abakuru b'abalinzi b'enju ya Ruhanga nkooku araagobeza Yesu abamukwase.

⁵Baasemererwa, baamuraganiza kumuha sente.

⁶Nawe yaikiriza kandi yaserra akanya karungi aka araabamukwasizamu, abantu, batakimanyire.

⁷Aho ekiro kikuru ky'Emigaati Etatumbisiibwe kyahika, nikyo eki baatambirahoga omwana gw'entaama ogw'Okuhingurwaho.

⁸Yesu yatuma Petero na Yohaana ati: “Mugende mututeekanirize Obugenyi bw'Okuhingurwaho, twije tubulye.”

⁹Baamukaguza bati: “Noogonza tubuteekanirize nkaha?”

¹⁰Yabagarukamu ati: “Obu muraaba nimutaaha omu rubuga nimwija kutangaana omusaija ayetwekere ensoha y'amaizi. Mumuhondere okuhika omu nju ei araataahamu.

¹¹Nyineeka mumugambire muti: ‘Omwegesa akutumireho naakaguza ngu: Kiraha ekisiika ky'abagenyi nambere araaliira Obugenyi bw'Okuhingurwaho hamu n'abeegesebwa be?’

¹²Araabooleka ekisiika kikooto eky'omu kainaabiri ekirumu byona ebirukwetaagwa. Oku nuho murateekaniza ebintu byona.”

¹³Bbo baagenda, baasanga byona biri nkooku yabagambiire, baateekaniza Obugenyi bw'Okuhingurwaho.

¹⁴Esaaha obu yahikire, Yesu yaija ha meeza hamu n'abakwenda be.

¹⁵Yabagambira ati: “Nyegombere muno kulya na inywe Obugenyi bunu obw'okwijuka Okuhingurwaho ntakabonabonesiibwe!

¹⁶Nimbagambira nti: Tindigaruka kubulya okuhika obu bulihikirizibwa omu bukama bwa Ruhanga.”

¹⁷Nubwo yakwata ekikopo, yasiima naagamba ati: “Mukwate kinu munyweho inywena;

¹⁸habwokuba nimbagambira nti: Okuruga hati tindigaruka kunywa ha nsande y'ebijuma by'emizaabbibbu okuhikya obukama bwa Ruhanga obu buliija.”

¹⁹Yakwata omugaati, yasiima, yagucwamu, yagubaha naagamba ati: “Gunu nugwo mubiri gwange [oguraaheebwayo habwanyu. Kinu mukikolege okunyijukiraho.”

²⁰Omu mulingo nugwo gumu obu baamazire kulya, yakwata ekikopo naagamba ati: “Ekikopo kinu nikyo kiragaano ekihyaka eky'esagama yange eraaseeswa habwanyu.”]

²¹“Omukono gw'ogu arukungobeza ngunu, guli hanu n'ogwange ha meeza!

²²Habwokuba Omwana w'omuntu naagenda kuhikiriza ekyamuteekaniriziibwe, baitu alikibona bambi omuntu ogu arukumugobeza!”

²³Aho baatandika kukaguzangana bonka na bonka ngu, nooha omuli bo arukwija kukora eki.

²⁴Hakaimuka empaka omu bakwenda ngu, nooha omuli bo arukuteekerezibwa kuba mukuru.

²⁵Yesu yabagambira ati: “Abakama b'Abanyamahanga abantu baabo babalemesa itwale, kandi n'ab'obusobozi beetwa kabumba,

²⁶baitu tikiriba kiti omuli inywe; leka omukuru omuli inywe abe nk'arukukira obuto, kandi omwebembezi nk'omuheereza.

²⁷Arukukira obukuru nuwe oha: anyakwikarra ha meeza okulya, nandiki anyakuheereza? Tali ogu anyakwikarra ha meeza? Baitu nyowe ndi hagati yanyu nk'omuheereza.

²⁸“Inywe abatarandugiireho omu mihito yange,

²⁹Isenyowe nkooku yanteekaniriize obukama, na nyowe nukwo ndukububateekaniriza.

³⁰Muraaliira kandi munywere ha meeza omu bukama bwange, kandi mwikarre ha bitebe mucwere emisango enganda ikumi na ibiri eza Isirairi.”

³¹Yesu akagamba ati: “Simooni, Simooni, omanye Sitaani aikirizibwe kubasegesa inywena nk'engano.

³²Baitu iwe nkakusabira okwikiriza kwawe kuleke kugarukirra; kandi obu olimara kwegarukamu, ogumye bagenzi baawe.”

³³Petero yamugarukamu ati: “MUKAMA wange, nyeteekaniize kugenda omu nkomo n'okufa hamu na iwe!”

³⁴Yesu yamugarukamu ati: “Petero ninkugambira nti: Kiro kinu enkoko etakakookere, oraaba onyehoogere emirundi esatu ngu, tommanyire.”

³⁵Yesu yabakaguza ati: “Buli obu nabatumire mutaina nsahu za sente n'ez'ebyokulya, mutajwaire n'enkaito, hakabaho ekyababuzireho?” Baagarukamu bati: “Nangwa.”

³⁶Nandiki Yesu ati: “Leero hati, weena anyakwina ensahu ya sente rundi ey'ebyokulya agitwale; kandi ataina empirima, atunde omwegereko gwe, agigule.

³⁷Nyowe nimbagambira nti: Ekyahandiikirwe ekirukugamba kiti: ‘Akabalirwa omu basiisi’ nikisemerra kuhikirra hali nyowe; ningira ebyampandiikirweho biri haihi kuhikirra.”

³⁸Abakwenda baamugarukamu bati: “Waitu, hanu twina empirima ibiri!” Nandiki uwe ati: “Ezi nizimara!”

³⁹Yesu yaruga omu nju yagenda ha rusozi rw'emiti Oliva, nkooku yakakoraga bwona; abakwenda be baamukuraatira.

⁴⁰Obu baahikireyo yabagambira ati: “Musabe, mutaikara kutwarwa omu kwohebwa.”

⁴¹Uwe yabarugaho yagenda nk'omwanya oguhungurwamu ibaale, yateeza amaju yayesengereza ati:

⁴²“Taata, obu oraaba nookisiima onyiheho amabone ganu. Nabwo kitaba nyowe nkooku ndukugonza, baitu kibe Iwe nkooku orukugonza.” [

⁴³Nubwo malaika yaruga omwiguru yamubonekera, yamugumya.

⁴⁴Obu, obusaalizi bwamuhinguraine, yayesengereza muno okukiraho; empita yamurugamu yatonya hansi neesisana entonyezi enkooto ez'esagama.]

⁴⁵Obu yamazire kusaba, yaimuka, yagaruka hali abakwenda be yabasanga bagwijagiire habw'obujune.

⁴⁶Yabagambira ati: “Mugwijagiziibwe ki? Mwimuke musabe, mutaikara kutwarwa omu kwohebwa.”

⁴⁷Obu akaba nakyabaza, haija ekitebe, ky'abantu; omusaija arukwetwa Yuda, omu hali ikumi na babiri, abeebembiire. Yairra haihi Yesu kumugwa omu kifuba.

⁴⁸Baitu Yesu yamukaguza ati: “Yuda, noogobeza Omwana w'omuntu kunu noomugwa omu kifuba?”

⁴⁹Abo abakaba bali hamu na Yesu obu baarozire ekirukugenda kubaho, baamukaguza bati: “Waitu, tubateme n'empirima?”

⁵⁰Omu hali bo yatema omwiru w'omukuru w'abanyakatagara, yamucwaho okutu okw'obulyo.

⁵¹Baitu Yesu yabatanga ati: “Lekera aho!” Yakwata ha kutu kw'omusaija, yamukiza.

⁵²Nubwo Yesu yakagwize banyakatagara abakuru, n'abakuru n'abalinzi b'enju ya Ruhanga n'abakuru b'abantu abakaba baizire kumukwata ati: “Munyiziire n'empirima n'ebiduuma nk'abaiziire kukwata omunyagi?

⁵³Buli kiro naikaraga na inywe omunju ya Ruhanga, mutankwate. Baitu kanu nuko kasumi kanyu, hati omwirima nugwo gurukulema.”

⁵⁴Aho baakwata Yesu, baamutwara baamuhikya mba mukuru w'abanyakatagara; Petero yabahondera ali haraho.

⁵⁵Obu baahembere omurro omu kizigati hagati, baikarra kwota, Petero nawe yabaikarramu.

⁵⁶Omu ha bazaana n'omukuru w'abanyakatagara obu yamurozire aikaliire ha murro, yamugumyaho amaiso naagamba ati: “Omusaija onu nawe abairege hamu na Yesu!”

⁵⁷Baitu Petero yayehooga naagamba ati: “Mukazi iwe, ogu tindukumumanya!”

⁵⁸Obu haahingwireho akanya kake, omuntu ondi yamurora yagamba ati: “Na iwe oli omu hali bo!” Baitu Petero yamugarukamu ati: “Musaija iwe, tindi wabo!”

⁵⁹Obu haahingwireho omwanya gw'esaaha nk'emu, ondi yamwomereza muno naagamba ati: “Mazimakwo omusaija onu abaire ali hamu nawe; habwokuba nawe Mugaliraaya!”

⁶⁰Petero yagamba ati: “Musaija iwe, tindukumanya eki orukugamba!” Ahonaaho obu akaba naakyabaza, enkoko yakooka.

⁶¹MUKAMA Yesu yahinduka yarolerra Petero. Na Petero nubwo yaijukire ebigambo MUKAMA ebi yamugambiire ati: “Kiro kinu enkoko etakakookere, oraaba onyehoogere kasatu.”

⁶²Petero yaturuka aheeru, yarra muno.

⁶³Abasaija abakaba nibalinda Yesu bakamusekeereza kandi baamuteera enkoba.

⁶⁴Baamuswekerra ha maiso, nibamukaguza bati: “Toma, nooha akutiire!”

⁶⁵Kandi baamugambaho ebindi bingi nibamujuma.

⁶⁶Obwire obu bwakiire, abakuru b'abantu, banyakatagara abakuru, n'abeegesa b'ebiragiro bakasorrokana hamu, baaleeta Yesu omu Rukurato rwabo.

⁶⁷Baamukaguza bati: “Tugambire, niiwe Kristo?” Yabagarukamu ati: “Obu ndaabagambira, timurukwija kunyikiriza;

⁶⁸noobu ndaabakaguza, timurukwija kungarukamu.

⁶⁹Baitu okuruga hati, Omwana w'omuntu naija kwikarra ha mukono gw'obulyo ogwa Ruhanga Omusobozi wa byona.”

⁷⁰Boona nukwo kumukaguza bati: “Mara iwe, oli Mwana wa Ruhanga?” Yabagarukamu ati: “Niinywe mwakigamba.”

⁷¹Nandiki bbo bati: “Hati nitukyaserurra ki obwakaiso? Ningira twayehulirra itwenka ebi agambire!”