Read Runyoro - rutooro Luk 23 Bible Online

Luk 23 - Runyoro - rutooro bible

Luk 23

¹Nubwo ekitebe kyona eky'abantu kyaimukire, baatwara Yesu omumaiso ga Pilaato.

²Baatandika kumunyegerra nibagamba bati: “Omuntu onu tumusangire naajemesa ihanga lyaitu, naatanga abantu kuha Kaisaali omusoro, kandi naayeyeta Kristo Omukama.”

³Pilaato yamukaguza ati: “Niiwe Omukama w'Abayudaaya?” Yesu yagarukamu ati: “Nukwo ogambire.”

⁴Pilaato yagaruka yagambira banyakatagara abakuru n'ekitebe kyona ati: “Omuntu onu timmuzoireho musango naakake.”

⁵Baitu bbo baaterraho kimu amaani bati: “Naaleeta akajagarro omu bantu, akabandiza Galiraaya okuhika na hanu.”

⁶Pilaato obu yahuliire ebigambo ebi, yabakaguza omusaija ogu obu araaba ali Mugaliraaya.

⁷Obu yamanyire Yesu nkooku ali w'omu isaza lya Herode, yamumusindikira, habwokuba omu kasumi ako Herode nawe akaba ali omu Yerusaalemu.

⁸Herode obu yarozire Yesu, yasemererwa muno. Akaba amazire omwanya naayegomba kumurora, habwokuba akaba amuhuliireho kandi yanihiraga kumurora naakora ekyokuhuniriza.

⁹Nikyo Herode yamaliire omwanya naamukaguza bingi; baitu Yesu atagarukemu kantu.

¹⁰Baanyakatagara abakuru n'abeegesa b'ebiragiro baayemerra aho, nibamunyegerra ebintu bingi!

¹¹Herode n'abaserikale be baamwoleka emigayo nibamusekeereza. Herode yamujweka omwenagiro gw'ekitiinisa, yamugarra hali Pilaato.

¹²Ha kiro eki kyonyini Herode na Pilato nubwo baganjaine, habwokuba kara koona bakaba banobangaine.

¹³Ebi obu byahoire, Pilaato yasorooza hamu banyakatagara abakuru, abalemi b'Abayudaaya n'abantu abandi,

¹⁴yabagambira ati: “Mwandeetera omuntu onu nimugamba ngu, naajemesa abantu. Hati nyowe obu mmukagwize omu amaiso ganyu, timmuzoireho musango na gumu hali ebi byona ebi murukumujunaana.

¹⁵Nangwa noobwakuba Herode tamuzoireho musango, nikyo amugaruliire hali itwe. Taina kintu kyona eki yakozire ekirukusemerra kumwisa.

¹⁶Nahabweki ndaragira bamuteere enkoba, nukwo mmulekere agende.” [

¹⁷Eki akakigamba habwokuba akaba naaragirwa kubalekerra omunyankomo omu ha kiro kikuru eki.]

¹⁸Nubwo boona baatokiire hamu bati: “Ogu mwiheho, otulekerre Baraaba!”

¹⁹Baraaba ogu akaba akwasirwe omu nkomo habw'okwemesa abantu ab'omu rubuga na habw'obwisi.

²⁰Pilato, habw'okugonza kulekera Yesu, akongera yababaliza;

²¹baitu bbo baatoka bati: “Mubambe, mubambe ha musaraba!”

²²Pilaato yabakaguza omurundi gwa kasatu ati: “Habwaki? Kibi ki eki akozire? Timmuzoireho musango gwona ogusemeriire kumwisa! Nahabweki ndaragira bamuteere enkoba, nukwo mmulekere agende.”

²³Baitu baaterraho kimu amaani nibatokera haiguru, nibasaba ngu abambwe, kandi amaraka gaabo gaasingwire.

²⁴Pilaato nukwo kucwa omusango ngu, eki basabire nikyo kikorwe.

²⁵Yalekera omusaija ou bakomere, ogu ow'akaba akwasirwe omu nkomo habw'okwemesa abantu na habw'obwisi. Yahayo Yesu bamukole nkooku baagondeze.

²⁶Obu bakaba nibatwara Yesu, bakakwata omusaija arukwetwa Simooni owa Kireene, ow'akaba naaruga omu kyaro; baamutweka omusaraba aguhimbe, akuraatire Yesu.

²⁷Ekitebe kingi eky'abantu n'eky'abakazi abakaba nibarra, nibamuterra empamo, bakamuhondera.

²⁸Yesu yahinduka yabagambira ati: “Inywe bahara ba Yerusaalemu muleke kundirirra, baitu mweririrre inywenka kandi mulirirre abaana banyu.

²⁹Mumanye ebiro nibiija obu baligamba bati: ‘Baina omugisa abakazi engumba n'enda ezitakazaaraga, n'amabeere agatakonkyaga!’

³⁰Nubwo balitandika kutaagira ensozi bati: ‘Mutugwere!’ N'obusozi bati: ‘Mutuswekerre!’

³¹Kinu obu baraaba nibakikora omuti gukyali mubisi, obu gulyoma balisura ki?”

³²Abandi ababiri, enkozi z'ebibi, bakatwarwa kwitwa hamu na Yesu.

³³Obu baahikire omu kiikaro ekirukwetwa: Oruhanga, oku nuho baamubambiire ha musaraba, hamu na bali babiri enkozi z'ebibi, omu ha rubaju rwe orw'obulyo, ondi ha rw'emoso.

³⁴Nubwo Yesu yasabiire abaamubambire naagamba ati: “Taata, obaganyire habwokuba tibarukumanya eki barukukora.” Baabagana ebijwaro bye, nibabiterra itomo.

³⁵Abantu bakeemerra aho nibasunga; n'abalemi baabo bakasekereza bati: “Akajuna abandi; obu araaba ali Kristo ayakomerwe Ruhanga, leka ayejune wenka!”

³⁶Abaserikale nabo bakamusekereza, baija baamuha amarwa agasaaliire,

³⁷nibagamba bati: “Obu oraaba oli omukama w'Abayudaaya, wejune wenka!”

³⁸Eruguru ye ha musaraba hakaba haroho ekihandiiko ekirukugamba kiti: “Onu nuwe Omukama w'Abayudaaya.”

³⁹Omu ha nkozi z'ebibi abaabambirwe nawe akamuhera ati: “Tiniiwe Kristo? Wejune, na itwe otujune!”

⁴⁰Baitu mugenzi we yamuhana ati: “Torukutiina Ruhanga, kandi kunu ohairwe ekifubiro kimu nk'ekye?

⁴¹Itwe gutusingirekwo, kandi twaheebwa ekifubiro ekitusemeriire habw'ebibi ebi twakozire; baitu onu taina eki yasobeze.”

⁴²Nubwo yagamba ati: “Yesu, onyijuke obu olihika omu bukama bwawe!”

⁴³Yesu yamugarukamu ati: “Mali mali ninkugambira nti: Kiro kya hati oraaba na nyowe omu nsi ey'Okuhirwa.”

⁴⁴Obu zikaba ziri saaha nka mukaaga, izooba lyaraara, omwirima gwasweka ensi egi yoona okuhika ha saaha mwenda.

⁴⁵Enyigamo y'omunju ya Ruhanga yatemukamu habiri.

⁴⁶Yesu yabaliza haiguru ati: “Taata, omwoyo gwange ngutaire omu mikono yawe!” Obu yamazire kugamba eki, yacwekana!

⁴⁷Omukuru w'abaserikale, obu yarozire ebibaireho, yakugiza Ruhanga naagamba ati: “Mazimakwo omuntu onu abaire muntu ahikiriire!”

⁴⁸Abantu boona abakaba beesoroliize aho kusunga, obu baarozire ebyabaireho, baagarukayo owaabubo nibahungya emitwe.

⁴⁹Abamanyi ba Yesu n'abakazi abakaba bamuhondiire kuruga Galiraaya, bakeemerra haraho baarora ebi byona.

⁵⁰Hakaba haroho omusaija, ibara lye Yosefu, omukurasi omu Rukurato Orukuru, ayarugire omu rubuga Arimateya orwa Buyudaaya; akaba ali musaija murungi kandi ahikiriire,

⁵¹ataikirranize n'ab'orukurato abandi ebi baategekere n'ebi baakozire. Uwe yaikaraga ategeriize obukama bwa Ruhanga.

⁵²Omusaija ogu akagenda hali Pilaato, yamusaba omutumbi gwa Yesu.

⁵³Hanyuma yaguhanuura ha musaraba, yaguzinga omu ngoye za bafuta ezirukwera, yaguta omu kituuro ekikaba kibaizirwe omu mwandara, ekitakaziikwamuga muntu.

⁵⁴Ekiro eki kikaba kiri eky'Okweteekaniza kandi Sabbato ekaba eri haihi kutandika.

⁵⁵Abakazi abakaba barugire Galiraaya hamu na Yesu, bakahondera Yosefu, baarora n'omutumbi gwa Yesu nkooku gwatairwemu.

⁵⁶Baagarukayo omuka, baateekaniza ebirukuboya n'amagita agatabire, eby'okusiiga omutumbi. Ha kiro kya Sabbato bakahuumura ekiragiro nkooku kyaragiraga.