Read Runyoro - rutooro Luk 24 Bible Online

Luk 24 - Runyoro - rutooro bible

Luk 24

¹Ha Sande, ekiro ekibanza wiiki, emamba neetandika kusara, abakazi bakazindukira ha kituuro, baatwarayo amagita agarukuboyo aga bakaba bateekaniize.

²Bakasanga ibaale likumbiibwe liihirwe ha munwa gw'ekituuro;

³baitu obu bataahiremu, batasangemu mutumbi gwa Yesu.

⁴Obu bakaba nibakyahunirra bati, abasaija babiri abajwaire engoye ezirukwengengeta baabemerra ha rubaju.

⁵Abakazi abakaba bakyakwasirwe obutiini, bainama hansi, nubwo abasaija babakagwize bati: “Nimuserurra ki omwomeezi omu bafu? Hanu taroho, ahumbuukire.

⁶Mwijuke eki yabagambiire akyali omu Galiraaya ati:

⁷‘Omwana w'omuntu ali w'okuheebwayo omu mikono y'abasiisi, abambwe ha musaraba, baitu ha kiro kya kasatu ahumbuuke.’ ”

⁸Nubwo abakazi baijukire ebigambo bye;

⁹baaruga ha kituuro, baagaruka omu rubuga. Ebi byona baabigambira bali ikumi n'omu n'abandi boona.

¹⁰Abakazi abo nubo Mariya Magadaleena, Yohanani, hamu na Mariya nyina Yakobbo. Bbo, hamu n'abakazi abandi abakaba bali nabo, ebi byona baabigambira abakwenda.

¹¹Baitu abakwenda batabiikirize, bikabazookera nk'orugambo orutarukugasa.

¹²Nubwo Petero yaimukire, yagenda yahika ha kituuro nairuka. Obu yainamire alingwizemu, atarole kindi kwihaho engoye zonka. Yagaruka owaabu ahuniriire habw'ebi ebyabaireho.

¹³Ha kiro eki kyonyini, babiri omulibo bakaba nibagenda omu kyaro ekirukwetwa Emmausi, kikaba kiri nka kilomita ikumi n'emu okuruga Yerusaalemu.

¹⁴Bakaba nibabazaaho ebi byona ebyabaireho.

¹⁵Obu bakaba nibakyabibazaaho nibakaguzangana, Yesu wenka yabahikaho, yatandika kugenda nabo;

¹⁶baitu amaiso gaabo gaaswekererwa, tibaamumanyirra.

¹⁷Yesu yabakaguza ati: “Bigambo ki ebi murukugenda nimubazaaho?” Baayemerra baina amaiso g'obujune.

¹⁸Omu halibo, ibara lye Kileyopa, yamugarukamu ati: “Niiwe mugenyi wenka hali abo abaizire Yerusaalemu, atarukumanya bigambo byona ebibaireho biro binu?”

¹⁹Nandiki Yesu ati: “Bigambo ki ebi?” Baamugarukamu bati: “Ebyabaireho Yesu owa Nazareeti, ow'akaba ali murangi w'amaani omu bikorwa n'omu bigambo omumaiso ga Ruhanga n'omumaiso g'abantu.

²⁰Baanyakatagara baitu abakuru n'abalemi nkooku baamuhaireyo kucwerwa omusango gw'okufa, baamubamba ha musaraba.

²¹Baitu itwe tukaba nitunihira ngu, nuwe akaba ali w'okucungura ihanga lya Isirairi. Okwongera hali ebi, kiro kinu nkyo kya kasatu kuruga obu byabaireho.

²²Kandi hati abakazi abamu ab'omu kitebe kyaitu batuhunirizireege. Bazindukiire ha kituuro omu rukyakya,

²³omutumbi gwe tibagusangireyo; baitu bagarukire nibagamba ngu, babonekiirwe bamalaika ababagambiire nkooku ayomiire.

²⁴Bagenzi baitu abamu bagenzirege ha kituuro, kandi baasanga biri nkooku abakazi bagambire, baitu uwe tibamurozire.”

²⁵Nubwo Yesu yabagambiire ati: “Ha! Badoma inywe, abatarukurahuka kwikiriza byona abarangi ebi baagambire!

²⁶Kikaba kitarukwetaagwa Kristo okubonabonesibwa omuli ebi byona, nukwo ataahe omu kitiinisa kye?”

²⁷Yesu yabandiza ha bya Musa n'abarangi naabasoborra ebyamugambirweho omu Byahandiikirwe.

²⁸Obu baahikire haihi n'ekyaro nambere bakaba nibagenda, Yesu yasisana nk'arukuhinguraho;

²⁹baitu baamwesengereza bati: “Ikara na itwe, obwire buhoireyo kandi izooba liri haihi kugwa.” Nubwo yataaha omunju kwikara nabo.

³⁰Obu akaba aikaliire nabo ha byokulya, yakwata omugaati, yasiima Ruhanga, yagucwamu, yagubaha.

³¹Aho amaiso gaabo gaiguka, baamumanyirra; baitu uwe yababuraho.

³²Baagambirangana bati: “Obu abaire naabaza na itwe omu muhanda naatusoborra Ebyahandiikirwe, emitima yaitu teyakirege omurro?”

³³Omu kasumi ako konyini baimuka, baagaruka Yerusaalemu; baasangayo ikumi n'omu beesoroize hamu n'ab'oruganda.

³⁴Baabahurra nibagamba bati: “Mazimakwo MUKAMA ahumbuukire, kandi abonekiire Simooni!”

³⁵Nubwo n'ababiri baabasoboroire ebyabaireho omu muhanda, kandi nkooku baamumanyiriire obu yacwire omugaati.

³⁶Obu bakaba nibakyabaza ebi, Yesu wonyini yabeemerra hagati, yabaramukya ati: “Obusinge bube hali inywe.”

³⁷Baayekanga, baatiina nibateekereza ngu barozire omuzimu.

³⁸Baitu uwe yabagambira ati: “Nimutuntuzibwa ki? Nimwekaguliza ki omu mitima yanyu?

³⁹Murole engaro zange n'ebigere byange; ninyowe kwo. Munkwateho murole, habwokuba omuzimu tigugira amagufa n'enyama, nk'ebi murukurora nyinabyo.”

⁴⁰Obu yamazire kugamba ebi, yabooleka engaro ze n'ebigere bye.

⁴¹Obu bakaba bakyalemerwe kwikiriza habw'okuhinirra na habw'omuhimbo, nubwo yabakagwize ati: “Hanu mwinaho ekyokulya?”

⁴²Baamuha ekicweka ky'encu etalikire,

⁴³yagikwata, yagirya bamuroleriire.

⁴⁴Nubwo yabagambiire ati: “Binu nibyo bigambo ebi nabagambiire nkyali na inywe ngu, byona ebyampandiikirweho omu Biragiro bya Musa, n'omu Bihandiiko by'abarangi, n'omu Zabbuli biri by'okuhikirizibwa.”

⁴⁵Nubwo yasuukwire amagezi gaabo beetegereze Ebyahandiikirwe.

⁴⁶Yabagambira ati: “Kinu nikyo ekyahandiikirwe ngu, Kristo naasemerra kubonabonesibwa, nukwo ha kiro kya kasatu ahumbuuke omu bafu;

⁴⁷kandi ngu, omu ibara lye okwegarukamu n'okuganyirwa ebibi birangirirwe omu mahanga goona, okubandiza Yerusaalemu.

⁴⁸Niinywe muli bakaiso b'ebigambo ebi.

⁴⁹Kandi ninyija kubatwekera Taata eki yaraganiize. Baitu mwikale omu rubuga okuhika obu muliheebwa amaani agarukuruga omwiguru.”

⁵⁰Nubwo Yesu yabeebembiire, yabahikya haihi na Betaniya. Yaimukya emikono ye, yabaha omugisa.

⁵¹Obu akaba naakyagubaha, yabarugaho, yatwarwa omwiguru.

⁵²Baamuramya, hanyuma baagaruka Yerusaalemu baijwire okusemererwa kwingi;

⁵³kandi baikara nibaija omunju ya Ruhanga nibamukugiza.