Read Runyoro - rutooro Luk 6 Bible Online

Luk 6 - Runyoro - rutooro bible

Luk 6

¹Yesu akaba naaraba omu misiri y'engano ha Sabbato; abeegesebwa be baacwa entwe z'engano, baazijungirra, baalya.

²Nukwo Abafalisaayo abamu kubakaguza bati: “Kiki ekirukubakoza ekitaikirizibwa ha Sabbato?”

³Yesu yabagarukamu ati: “Timukasomaga Daudi eki yakozire obu yarumirwe enjara, hamu n'abo aba akaba ainabo?

⁴Nkooku yataahire omu Nju ya Ruhanga, yaihamu emigaati enyakuhongerwe, yagirya kandi yaha n'aba akaba ainabo?” Niyo emigaati etaraikirizibwaga kuliibwa muntu ondi, kwihaho abanyakatagara bonka.

⁵Nubwo yabagambiire ati: “Omwana w'omuntu nuwe MUKAMA wa Sabbato.”

⁶Ha Sabbato endi, Yesu obu yataahire omu isorrokaniro kwegesa, hakaba harumu omusaija akabire omukono ogw'obulyo.

⁷Abeegesa b'ebiragiro n'Abafalisaayo nukwo kuhanga Yesu amaiso, barole obu arakiza omuntu ha Sabbato, nukwo babone h'okumunyegererra.

⁸Baitu Yesu yamanya ebiteekerezo byabo, nukwo kugambira omusaija anyakukabire omukono ati: “Ija oyemerre hanu.” Omusaija yaimuka, yayemerraho.

⁹Nubwo Yesu yabagambiire ati: “Kambakaguze kinu: Ha kiro kya Sabbato, Ebiragiro byaitu bitwikiriza kukora ebirungi rundi kukora ebibi? Kujuna obwomeezi rundi kubuhwerekereza?”

¹⁰Boona yababungyamu amaiso, nubwo yagambiire omusaija ogu ati: “Gorra omukono gwawe.” Yagugorra, omukono gwe gwakira.

¹¹Baitu bbo baakwatwa ekiniga, baatandika kuhanuura bonka na bonka eki baraakora Yesu.

¹²Omu biro ebi Yesu akagenda ha nsozi kusaba, yakiisa obwire naasaba Ruhanga.

¹³Obwire obu bwakiire, yayeta abeegesebwa be, yakomamu ikumi na babiri, yabeeta abakwenda. Nubo banu:

¹⁴Simooni ou yarukire Petero, na mugenzi we Andereya, Yakobbo na Yohaana, Filipo na Batolomayo,

¹⁵Matayo na Tomasi, Yakobbo mutabani w'Alifaayo na Simooni ayayetwaga omurwanirizi w'ihanga lye,

¹⁶Yuda mutabani wa Yakobbo na Yuda Isikalyota ayamugobiize.

¹⁷Yesu yasirimuka nabo, yayemerra omu kyeya nambere yasangire ekitebe kingi ky'abeegesebwa be, n'abantu baingi abakaba barugire Buyudaaya yoona na Yerusaalemu, n'abaarugire omu mbuga Tiiro na Sidooni eziheriire enyanja. Bantu abaaizire kumuhuliriza n'okukizibwa endwara zaabo.

¹⁸Abaatalibanizibwaga emyoyo emibi nabo bakakizibwa.

¹⁹Abantu boona baaserraga kumukwataho, habwokuba amaani gaamurugamuga gabakiza boona.

²⁰Yesu akahindukira abeegesebwa be, yagamba ati: “Mwina omugisa inywe abanaku, habwokuba obukama bwa Ruhanga bwanyu,

²¹Mwina omugisa inywe abarukurumwa enjara hati, habwokuba muliiguta. Mwina omugisa inywe abarukurra hati, habwokuba muliseka.

²²Muliba b'omugisa inywe abantu obu baraabanoba, bakababinga mu masorrokaniro, bakabajuma, kandi bakabeeta babi nibabatura Omwana w'omuntu!

²³Musemererwe ha kiro eki, kandi muguruke habw'omuhimbo, habwokuba empeera yanyu nyingi omwiguru. Ningira baisenkurubo nukwo baakozire bati abarangi.

²⁴Baitu mulikibona inywe abaguuda, habwokuba okusemererwa kwanyu mumazire kukutunga.

²⁵Mulikibona inywe abarukwiguta hati, habwokuba mulirumwa enjara. Mulikibona inywe abarukuseka hati, habwokuba muliganya kandi mulirra.

²⁶Mulikibona inywe, abantu boona obu baraababazaho kurungi, habwokuba na baisenkurubo nukwo baakozire bati abarangi ab'ebisuba.”

²⁷Baitu nimbagambira inywe abarukumpuliriza nti: Mugonzeege abanyanzigwa banyu, mukole kurungi abanyakubanoba,

²⁸mugondeze omugisa abanyakubakyena, kandi musabire abanyakubajuma.

²⁹Omuntu obu araakuteera oruhi ha rusaya orumu, omuhindurre n'orundi. Omuntu obu araatwara ekooti yaawe, otamwima n'esaati.

³⁰Weena araakusaba omuhe, n'araatwara ekyawe otalikimugaruza.

³¹Eki mwenda abantu babakorre, na inywe nikyo mubakorrege.

³²“Obu muraaba nimugonza abanyakubagonza, muraasiimirwa kiraha? Nangwa n'abasiisi nabo baagonza abanyakubagonza.

³³Obu muraaba nimukora kurungi abanyakubakora kurungi, muraasiimirwa kiraha? Nangwa n'abasiisi nabo nukwo baakora.

³⁴Obu muraaba nimwohoza abo aba murukunihira kubasasura, muraasiimirwa kiraha? Abasiisi nabo boohoza bataahi baabo, nibagumya ngu, baraasasurwa omuhendo gwona.

³⁵Baitu inywe mugonzeege abanyanzigwa banyu, mubakorre ebirungi, kandi mwohoze mutarukunihira kusasurwa kantu; nubwo mulitunga empeera nkooto, kandi muliba baana b'Ogu Anyakuli haiguru muno; habwokuba agirra embabazi abantu entasiima n'enkozi z'ebibi.

³⁶Mubege b'embabazi nka Isiinywe oku ali w'embabazi.”

³⁷“Mutalicwa emisango, na inywe timuligicwerwa; mutalihenderra, na inywe timulihendererwa; muganyire, na inywe muliganyirwa.

³⁸Mugabe, na inywe muliheebwa. Endengo nungi, ehikire, erukumwaga niyo muliheebwa. Endengo ei mulengesa, na inywe niyo mulirengerwamu.”

³⁹Yesu akabacwera orufumo runu ati: “Omufu w'amaiso asobora kunanata omufu w'amaiso mutaahi we? Bombi tibaligwa omu kiina?

⁴⁰Omwegesebwa takira omwegesa we; baitu omwegesebwa weena obu amara kutendekwa kurungi, aba nk'omwegesa we.

⁴¹Habwaki noorora akahoiga akali omu liiso lya mugenzi waawe, otarukurora empinju enyakuli omu liiso lyawe?

⁴²Rundi noosobora ota kugambira mugenzi wawe oti: Mugenzi wange kankutokoole akahoiga akakuli omu liiso; kandi kunu torukurora empinju enyakuli omu lyawe? Ngobya iwe, banza oihe empinju omu liiso lyawe osobole kuhweza n'okutokoora mugenzi waawe akahoiga akamuli omu liiso.”

⁴³“Tiharoho muti omurungi ogwana ebijuma bibi, rundi omuti omubi ogwana ebijuma birungi.

⁴⁴Buli muti gumanyirwa ha bijuma byagwo; habwokuba ha mwera-maino tibanogaho bijuma by'omukunyu, kandi ha makerre tibanogaho mizaabbibbu.

⁴⁵Omuntu omurungi aiha ha birungi ebi agira omu mutima gwe; n'omuntu omubi aiha ha bibi ebi agira omu mutima gwe; habwokuba ebisaaga omu mutima nibyo akanwa kagamba.”

⁴⁶“Munyetera ki: ‘MUKAMA wange, MUKAMA wange’, kunu mutarukukora ebi mbagambira?

⁴⁷Omuntu weena anyakwija hali nyowe, akahuliriza ebi ndukugamba nabihikiriza, kambooleke nkooku arukusisana.

⁴⁸Naasisana nk'omuntu arukwombeka. Akalima omusingi, gwahama, enju ye yagyombeka ha mwandara. Ekisaaru obu kyaboogere, empaya y'amaizi yateera enju egi; baitu etasobole kugitengesa, habwokuba ekaba eyombekerwe kurungi.

⁴⁹Kandi weena obu ahurra ebi ndukugamba, atarukubihikiriza, naasisana nk'omuntu ayayombekere enju ye ha itaka kwonka, atalimire musingi. Enjura obu yagwire ekisaaru kyabooga, empaya y'amaizi yateera enju egi, ahonaaho yasingooka, n'okusingooka kwayo kwali kw'amaani.”