Read Runyoro - rutooro Luk 7 Bible Online

Luk 7 - Runyoro - rutooro bible

Luk 7

¹Yesu obu yamazire kugambira abantu ebi byona, yagenda Kafaranaumu.

²Hakaba haroho omukuru w'ab'amahe ow'akaba aina omuheereza we omwesigwa muno. Ogu akaba arwaire, ali haihi n'okufa.

³Omukuru w'ab'amahe obu yahuliire nibabazaaho Yesu, yamutumira abakuru b'Abayudaaya, naamusaba aije akize omuheereza we.

⁴Obu baahikire hali Yesu baamwesengereza muno bati: “Omuntu ogu osemeriire kumukoonyera,

⁵habwokuba agonza ihanga lyaitu, kandi akatwombekera isorrokaniro.”

⁶Nukwo Yesu kugenda nabo. Obu akaba alihaihi kuhika ha nju, mukuru w'ab'amahe yatuma banywani be bamugambe bati: “MUKAMA wange, leka kwejwahiza busa, habwokuba tinsemeriire kukutaahya omwange;

⁷kandi nyerozire nkooku ntasemeriire kwija nambere oli. Gamba ekigambo kyonka, omuheereza wange araakira.

⁸Habwokuba na nyowe ndi muntu arukulemwa, kandi nyina abaserikale aba ndukulema. Obu ngambira omu nti: ‘Genda’, agenda; n'ondi nti: ‘Ija’ aija; n'omuheereza wange nti: ‘Kora kinu’, akikora.”

⁹Yesu obu yahuliire ebigambo ebi yahunirra, yahinduka yagambira ekitebe ky'abantu abamuhondiire ati: “Nimbagambira nti: Tinkabonaga okwikiriza nka kunu, noobu haakubaire omu Isirairi”.

¹⁰Abakaba batumirwe, obu bagarukire omu ka, bakasanga omuheereza akizire.

¹¹Obu haahingwireho akasumi kake, Yesu yagenda omu rubuga Naini aina abeegesebwa be n'ekitebe ky'abantu baingi.

¹²Obu akaba nairirra irembo ly'orubuga, yatangaana abahimbire omutumbi gw'omutabani w'omufaakati, kandi nuwe mwana we omu wenka. Abantu baingi ab'omu rubuga bakaba nibagenda nawe.

¹³MUKAMA Yesu obu yamurozire, yamukwatirwa embabazi, yamugambira ati: “Leka kurra.”

¹⁴Yairra haihi, yakwata ha ruhinyo, abakaba bahimbire omutumbi baayemerra. Yagamba ati: Musigazi iwe, ninkugamba nti: “Imuka.”

¹⁵Ow'akaba afiire yaikarra, yatandika kubaza. Yesu yamugarurra nyina.

¹⁶Aho boona baakwatwa obutiini, kandi baakugiza Ruhanga nibagamba bati: “Omuli itwe haimukiremu omurangi mukuru!” Kandi bati: “Ruhanga aizire kujuna abantu be!”

¹⁷Amakuru ganu hali Yesu gaararanga omu Buyudaaya yoona n'ensi eziherraineho.

¹⁸Abeegesebwa ba Yohaana bakamusubirra ebi byona. Nawe nukwo kweta babiri hali bo, yabatuma hali MUKAMA Yesu

¹⁹bamukaguze bati: “Niiwe arukugenda kwija, rundi tutegereze ondi?”

²⁰Obu baahikire hali Yesu baamugambira bati: “Yohaana Omubatiza atutumire okukukaguza ngu: ‘Niiwe ogu arukugenda kwija, rundi tutegereze ondi?’”

²¹Omu kasumi ako Yesu akakiza endwara za buli mulingo nk'ebidanda, emyoyo emibi, kandi abafu b'amaiso yabaigura amaiso.

²²Nukwo kugarukamu abeegesebwa ba Yohaana ati: “Mugarukeyo, mugambire Yohaana ebi murozire n'ebi muhuliire ngu, abafu b'amaiso nibarora, abalema nibarubata, abagenge bakiziibwe, abafu b'amatu nibahurra, abaafiire nibahumbuurwa, n'abaseege nibarangirirwa Amakuru Amarungi.

²³W'omugisa ogu atarukunyesiitaraho.”

²⁴Abaatumirwe Yohaana obu baagarukireyo, Yesu yatandika kusoborra ebitebe by'abantu hali Yohaana ati: “Omu irungu mukagenda kurorayo ki? Orubingo orurukutengesebwa omuyaga?

²⁵Obu, mukagenda kurorayoki? Omuntu ajwaire engoye ezirukunekaneka? Ningira abo abajwara bati kandi abaikara nibasemererwa, basangwa omu bikaali by'abakama!

²⁶Obu, mukagenda kurorayoki? Omurangi? Ego, nimbagambira nti: Naakira n'omurangi.

²⁷Habwokuba Yohaana ogu nuwe ayahandiikirweho ngu: ‘Dora nintuma omukwenda wange akwebembere, nuwe akusemereze omuhanda.’

²⁸Nimbagambira nti: Omu bantu abaazairwe abakazi, busamu n'omu arukukira Yohaana ekitiinisa; baitu omuto omu bukama bwa Ruhanga naamukira.”

²⁹(Abantu boona, hamu n'abasorooza b'omusoro abakaba babatiziibwe Yohaana, obu baahuliire ebigambo ebi, baakugiza Ruhanga habw'entegeka ye.

³⁰Baitu Abafalisaayo n'abeegesa b'ebiragiro abataraikirize bukatizibwa Yohaana, bakanga entegeka Ruhanga ei yabategekiire.)

³¹“Hati nu, abantu ab'ebiro binu ndabalengesaniza na ki? Kandi nibasisana bata?

³²Nibasisana abaana abaikaliire omu katale nibeetangana bati: ‘Tukabaterra endere, timwazina! Twateera empamo, timwarra!’

³³Yohaana Omubatiza akaija atarukulya byokulya kandi atarukunywa marwa; inywe mwagamba ngu: ‘Aroho omwoyo omubi!’

³⁴Baitu Omwana w'omuntu, uwe akaija naalya kandi naanywa; mwagamba ngu: ‘Dora omukoizi kandi omutamiizi, nganjani y'abasorooza b'omusoro n'abasiisi!’

³⁵Baitu amagezi ga Ruhanga gamanyirwa ha bikorwa byago.”

³⁶Omu ha Bafalisaayo akeeta Yesu okulya nawe. Yesu yataaha omunju ye, yaikarra kulya.

³⁷Omu rubuga oru hakaba harumu omukazi omusiisi. Obu yamanyire Yesu nkooku arukulya omunju y'Omufalisaayo, yaleeta orusale rw'amagita agarukuboya kurungi.

³⁸Yamwemerra enyuma narra. Amaizi ag'omu maiso ge gaajubya ebigere bya Yesu, yabiragaza n'isoke rye, yabinywegera, yabisiiga amagita ago.

³⁹Omufalisaayo ow'akaba araaliize Yesu obu yakirozire, yateekereza omunda ye ati “Omuntu onu kakuba abaire ali murangi, yakumanyire omukazi onu arukumukwataho nkooku ali musiisi!”

⁴⁰Yesu nukwo kumugarukamu ati: “Simooni, nyina eki ndukugonza kukugambira.” Nawe yagarukamu ati: “Mwegesa, kingambire.”

⁴¹Nandiki Yesu ati: “Hakaba haroho abanyamabanja babiri abaatongwaga omuntu. Omu akaba naatongwa siringi rukumi, ondi siringi kikumi.

⁴²Obu baabuzirwe eky'okusasura, bombi yabaganyira. Hali abo bombi nooha alikira kumugonza?”

⁴³Simooni yamugarukamu ati: “Ninteekereza oli ou yaganyiire enyingi.” Yesu yagamba ati: “Ocwiremu kurungi.”

⁴⁴Nubwo yahindukira omukazi, yagambira Simooni ati: “Omukazi ogu omuboine? Obu ntaahire omunju yaawe, tompaire amaizi g'okunaba ebigere, baitu onu ajubize ebigere byange n'amaizi ag'omu maiso ge, yabiragaza n'isoke rye.

⁴⁵Kandi obu ontangiriire tonnywegiirege, baitu omwanya gwona ogu nakamara hanu, omukazi onu takalekiire kunywegera ebigere byange.

⁴⁶Iwe tonseesire amagita ha mutwe, baitu uwe asiigire ebigere byange amagita agarukuboya kurungi.

⁴⁷Nahabweki ninkugambira nti: Habw'okugonza kwe okwingi, ebibi bye ebingi bimuganyiirwe; baitu anyakuganyirwa ebike, agonza kake.”

⁴⁸Nubwo Yesu yagambira omukazi ati: “Oganyirwe ebibi byawe.”

⁴⁹Abo abakaba baikaliire nibalya nawe baatandika kukaguzangana bati: “Onu nuwe oha arukuganyira ebibi?”

⁵⁰Baitu Yesu yagambira omukazi ati: “Okwikiriza kwawe kukujunire; genda n'obusinge.”