Read Runyoro - rutooro Luk 9 Bible Online

Luk 9 - Runyoro - rutooro bible

Luk 9

¹Yesu akeeta Ikumi na babiri, yabaha amaani n'obusoboozi obw'okubinga emyoyo emibi yoona n'okukiza endwara.

²Yabatuma kurangirra obukama bwa Ruhanga n'okukiza abarwaire.

³Yabagambira ati: “Omu rugendo rwanyu mutatwara kintu kyona, noobu gwakuba omwigo, rundi ensahu, rundi ebyokulya, rundi sente; kandi mutatwara esaati ibiri.

⁴Enju ei muraataahamuga niyo mwikalemu okuhika obu mulikarugayo.

⁵Nambere bataabajwahukirre, obu muraaba nimuruga omurubuga oru, muteerateere ecuucu y'omu bigere byanyu, ebege bwakaiso hali bo.”

⁶Ikumi na babiri baagenda nibaraba omu byaro, nibarangirra Amakuru Amarungi, kandi nibakiza abarwaire hoona hoona.

⁷Omu biro ebi, Herode akahurra byona ebikaba nibibaho, kandi yatuntura, habwokuba abamu bakaba nibagamba ngu: Yohaana Omubatiza ahumbuukire!

⁸Abandi baagambaga ngu: Eriya nuwe agarukire kuboneka; kandi haroho n'abaagambaga ngu: Omu ha barangi aba ira ahumbuukire.

⁹Nukwo Herode kwekaguza ati: “Yohaana nkamutemaho omutwe; baitu ogu muntu ki ou ndukuhurraho ebigambo binu?” Yayenda kurora Yesu.

¹⁰Abakwenda obu baagarukire, baasoborra Yesu byona ebi baakozire. Nukwo kubatwara ha rubaju, baagenda omu kiikaro ekirukwetwa Betisaida.

¹¹Baitu ekitebe ky'abantu obu baakimanyire baamuhondera. Uwe yabatangirra, yabeegesa eby'obukama bwa Ruhanga, kandi yakiza n'abo abaka nibenda kukizibwa.

¹²Izooba obu lyagoroobere, ikumi na babiri baija hali uwe, baamugambira bati: “Ragira abantu bagende omu byaro n'omu maka agali haihi, beeserurre h'okugoonya n'ebyokulya; habwokuba hanu tuli omu irungu.”

¹³Baitu uwe yabagambira ati: “Inywe mubahe ebyokulya.” Baamugarukamu bati: “Hanu twinaho emigaati etaano yonka n'encu ibiri; rundi buli tugende tugurre abantu banu boona ebyokulya.”

¹⁴Habwokuba hakaba haroho abasaija nk'enkumi itaano. Yesu yagambira abeegesebwa be ati: “Mubaikalize omu bitebe by'abantu makumi ataano-ataano.”

¹⁵Nukwo baakozire bati, baabaikaliza boona.

¹⁶Aho Yesu yakwata emigaati etaano n'encu ibiri, yararamira haiguru, yasiima, yabicwamu, yabiha abeegesebwa be kubigabira abantu.

¹⁷Boona baalya baiguta. Obu baasoroize oburagalika obwasaagireho, bwaijuza ebigega ikumi na bibiri.

¹⁸Kiro kimu Yesu obu akaba ali wenka naasaba, abeegesebwa be baija nambere ali, nukwo kubakaguza ati: “Abantu bannyeta bata?”

¹⁹Baamugarukamu bati: “Baakweta Yohaana Omubatiza; abandi baagamba ngu: Niiwe Eriya; kandi abandi ngu: Niiwe omu ha barangi aba ira ahumbuukire.”

²⁰Yagaruka yabakaguza ati: “Baitu inywe nimunnyeta muta?” Petero yamugarukamu ati: “Niiwe Kristo owa Ruhanga!”

²¹Yesu yabateererra okutakigambiraho muntu n'omu,

²²naagamba ati: “Omwana w'omuntu naasemerra kubonabonesibwa muno, n'okwangwa abakuru b'orukurato, n'abanyakatagara abakuru, n'abeegesa b'ebiragiro, n'okwitwa; kandi ahumburwe haahingwireho ebiro bisatu.”

²³Yesu yagambira abeegesebwa be ati: “Weena anyakugonza kumpondera, ayehwemu wenka, ahimbe omusaraba gwe buli kiro, ampondere.

²⁴Habwokuba weena arukutaatira obwomeezi bwe alibufeerwa; baitu weena anyakuhayo obwomeezi bwe habwange alibujuna.

²⁵Omuntu kuraamugasira ki okulya ensi yoona, baitu akeehwerekereza wenka rundi akafeerwa obwomeezi bwe?

²⁶Weena anyakunkwatirwa ensoni kandi akazikwatirwa ebigambi byange, nawe Omwana w'omuntu alimukwatirwa ensoni abu aliizira omu kitiinisa kye n'omu kitiinisa kya Ise n'eky'abamalaika abahikiire.

²⁷Malimali nimbagambira nti: Haroho abeemeriire hanu abatalihikwaho rufu batakarozire obukama bwa Ruhanga.”

²⁸Obu haahingwireho ebiro nka munaana Yesu amazire kugamba ebigambo ebi, yatwara Petero, Yohaana, na Yakobbo, yabatembya ha rusozi kusaba.

²⁹Obu akaba naakyasaba, enzooka y'amaiso ge yahinduka, engoye ze zaayera tiitiiti.

³⁰Ahonaaho haazooka abantu babiri nibabaza nawe, nubo Musa na Eriya

³¹abaabonekere omu kitiinisa, baabaza nawe ha kufa oku akaba naija kuhikiriza Yerusaalemu

³²Petero n'abataahi be bakaba baina oturo twingi, baitu obu baahamantukire baarora ekitiinisa kye n'abasaija babiri abakaba beemeriire nawe.

³³Abasaija abo obu bakaba nibakyamurugaho, Petero yagambira Yesu ati: “Mwegesa, kibaire kirungi itwe kusangwa hanu. Katwombeke obusiisira busatu: akamu kaawe, akamu ka Musa, n'akandi k'Eriya.” Obu, akaba atarukumanya eki arukugamba.

³⁴Obu akaba naakyagamba ebi, ekicu kyaija kyabasiikiriza. Obu kyabasiikiriize baatiina.

³⁵Iraka lyaruga omu kicu nirigamba liti: “Onu nuwe Mwana wange ou nyekomiire, mumuhurre!”

³⁶Iraka obu lyaculiire, baasanga Yesu ali wenka. Binu byona abeegesebwa bakabiculerra, kandi omu biro ebi batagambireho muntu n'omu ekigambo kyona hali ebi baaboine.

³⁷Ekiro ekyakurasireho obu baasirimukire orusozi, abantu baingi bakaitirana Yesu.

³⁸Omusaija ow'akaba ali omu kitebe yatokera haiguru ati: “Mwegesa, ninkwesengereza ondorre mutabani wange, nuwe wenka ou nyina.

³⁹Omwoyo omubi gwikara nigumukwata, ahonaaho ayamuza, gumunaga ensimbo, aleeta ifuro, gumumara amaani, kandi tigumulekera.

⁴⁰Nkeesengereza abeegesebwa baawe kugubinga, baitu batasobole.”

⁴¹Yesu yamugarukamu ati: “Inywe abataina okwikiriza kandi ab'obusinge obuhabire, ndihikya nkaha okwikara na inywe n'okubagumiisiriza? Omwana waawe muleete hanu.”

⁴²Omwojo obu akaba nakyaija, omwoyo omubi gwamuteera hansi, gwamunaga ensimbo. Baitu Yesu yacoomera omwoyo mubi, yakiza omwojo, yamugarurra ise.

⁴³Abantu boona baahunirra habw'obusobozi obwa Ruhanga. Abantu obu bakaba nibakyahunirirra ebintu byona Yesu ebi yakozire, uwe yagambira abeegesebwa be ati:

⁴⁴“Ebigambo binu mubiteho omutima; habwokuba Omwana w'omuntu naija kuheebwayo omu mikono y'abantu.”

⁴⁵Baitu ebigambo ebi bateetegereze amakuru gaabyo. Bikaba bibaserekerwe, nukwo baleke kubyetegereza; kandi bakatiina kubimukaguzaaho.

⁴⁶Hakaimukaho empaka omu beegesebwa, nibeekaguza arukukira obukuru omuli bo.

⁴⁷Baitu Yesu obu yamanyire ebiteekerezo byabo, yakwata omwana muto, yamwemereza ha rubaju rwe,

⁴⁸yabagambira ati: “Weena anyakujwahukirra omwana muto nk'onu habwange, buli ajwahukiriire nyowe; kandi anyakujwahukirra nyowe, buli ajwahukiriire Ogu ayantumiire; habwokuba anyakukira obuto omuli inywe, nuwe mukuru.”

⁴⁹Nubwo Yohaana yamugambiire ati: “Mwegesa, turozire omuntu naabinga emyoyo emibi omu ibara lyawe, twamutanga habwokuba tali w'ekitebe kyaitu.”

⁵⁰Nukwo Yesu kumugambira ati: “Muleke kumutanga, habwokuba weena atarukubahakaniza, ali habwanyu.”

⁵¹Akasumi ka Yesu ak'okutwarwa omwiguru obu kairiire haihi, akamalirra kugenda Yerusaalemu.

⁵²Yatuma abakwenda kumwebembera. Bbo baagenda baataaha omu kyaro ky'Abasamaliya kumuteekaniriza.

⁵³Baitu abantu baayo baayanga kumutangirra, habwokuba akaba naahingura kugenda Yerusaalemu.

⁵⁴Abeegesebwa be Yakobbo na Yohaana obu baarozire kunu baamukaguza bati: “MUKAMA waitu, noogonza turagire omurro guruge omwiguru, gubahwerekereze?”

⁵⁵Baitu Yesu yabahindukira yabahana ati: [“Timurukumanya omwoyo ogu musemeriire kuba nagwo, habwokuba Omwana w'omuntu ataije kuhwerekereza obwomeezi bw'abantu, baitu okubujuna.”]

⁵⁶Nubwo bayeyongera kugenda omu kyaro ekindi.

⁵⁷Obu bakaba nibakyagenda, baitirana omuntu ayagambiire Yesu ati: “Ndaakuhonderaga hoona nambere oraakagendaga.”

⁵⁸Yesu yamugarukamu ati: “Eboha ziina ebiina byazo, n'enyonyi ziina ebiju byazo; baitu Omwana w'omuntu taina h'okuta omutwe.”

⁵⁹Yesu yagambira omuntu ondi ati: “Mpondera.” Baitu uwe yamugarukamu ati: “Mukama wange, kambanze ngende nziike taata.”

⁶⁰Nandiki Yesu ati: “Leka abakafiiri baziike abafu baabo, baitu iwe genda orangirre obukama bwa Ruhanga.”

⁶¹N'omuntu ondi yagamba ati: “Mukama wange, nyowe ninyija kukuhondera, baitu kambanze ngende ndage ab'owaitu.”

⁶²Yesu yamugarukamu ati: “Busaho n'omu arukulimisa ekyoma, akarora enyuma, asemeriire obukama bwa Ruhanga.”