Read Runyoro - rutooro Bir 1 Bible Online

Bir 1 - Runyoro - rutooro bible

Bir 1

¹Binu nibyo ebigambo Musa ebi yagambiire Abaisirairi omwirungu Araba obuseeri bwa Yorudaani erinyakuroleriire Sufu, hagati ya Parani na Toferi, Labani, Hazeroosi na Dizahabu.

²Okuruga Holebbu okuhika Kadesi-Baraneya, otwairwe omuhanda ogwa harusozi Seyira orugendo rwebiro ikumi na kimu.

³Omu mwaka ogw'amakumi ana, ha kiro eky'okubanza eky'okwezi okwa ikumi na kumu, Musa akagambira Abaisirairi byona MUKAMA ebi yamuragiire kubagambira.

⁴MUKAMA obu yamazire kusingura Sihoni omukama w'Abamooli ayalemaga Hesiboni, na Ogi omukama wa Basani ayalemaga Asitaroosi, n'Edireeyi omunsi Mowabbu

⁵obuseeri bwa Yorudaani, Musa yatandika kusoborra ekiragiro kinu naagamba ati:

⁶“Obu tukaba tuli Holebbu, MUKAMA Ruhanga waitu akatugambira ati: Ha rusozi runu, mumazireho omwanya mukooto muno;

⁷hati murugeho, mweyongere omumaiso, mugende omunsi ey'ensozi ey'Abamooli noomu bicweka by'ensi ebindi ebinyakuheriireho, mugende Negebbu, mugende nimuhondera omusa gw'enyanja, muhike omunsi ey'Abakanaani na Lebbanoni, mugende muhikire kimu ha kisaaru ekikooto Efuraate.

⁸Ensi egi yoona, nyowe MUKAMA niyo narahiire kuha baisenkuru inywe: Abburahamu, Isaaka na Yakobbo n'abaijukuru baabo. Mugende mugirye.”

⁹Omu kasumi ako, Musa akagambira Abaisirairi ati: “Obu tukaba tukyali harusozi Sinai, nkabagambira nti,” omulimo ogw'okwebembera, abantu, gumpinguraine, tindukusobora kugukora nyenka;

¹⁰MUKAMA Ruhanga wanyu abakanyisize, hati nimwingana enyunyuuzi eza haiguru.

¹¹MUKAMA Ruhanga owa baisenkuru inywe abakanyise emirundi rukumi okukira nkooku muli hati, kandi abahe omugisa nkooku yaraganiize!

¹²Nyowe nyenka, nsobora nta kwetweka obulemezi bwanyu n'okubamarra empaka zanyu?

¹³Mukome abasaija abeetegereza, ab'amagezi kandi abarukusobora omulimo, mubaihe omu buli ruganda, nukwo mbahe omulimo ogw'okurolerra abantu.

¹⁴Mukangarukamu muti: “Eki otugambiire kirungi, nikyo tusemeriire kukora.”

¹⁵Na nyowe, nukwo kukoma abakuru omu nganda zanyu, abasaija abarukwetegereza kandi abamanyiire omulimo, nabaha ogw'okurolerra abantu enkumi, abandi okurolerra ebikumi, abandi okurolerra ataano ataano, abandi ikumi ikumi, abandi balemi b'enganda zanyu zoona.

¹⁶Omu kasumi ako, abacwi b'emisango banyu nkabaragira nti: “Muhurrege emisango ya bagenzi banyu, mugicwege omu bwinganiza, omuntu omu, mumuramule na mugenzi we, rundi n'omunyaihanga anyakwikara na uwe.

¹⁷Muleke kucwa emisango ey'okuhenderra; abato n'ab'ekitiinisa mubahurrege omu mulingo gumu; mutaligendera hamaiso g'omuntu, habwokuba Ruhanga nuwe acwa emisango; omusango mutarukusobora, ogu nugwo mundereterege ngucwe”.

¹⁸Omu kasumi ako, nkabagambira byona ebi musemeriire kukora.

¹⁹Nubwo twaimukize twaruga Holebbu, twaraba omwirungu eri ryona erikooto kandi erirukutiinisa eri mwaboine, twagenda omunsi ey'ensozi ey'Abamooli, MUKAMA Ruhanga waitu nkooku yaturagiire; twahika Kadesi-Baraneya.

²⁰Nkabagambira nti: “Hati muhikire omunsi eyensozi ey'Abamooli, MUKAMA Ruhanga waitu ei ali haihi kutuha.

²¹Murole, ensi ngigyo, MUKAMA Ruhanga waitu agiboolekere; mugende mugirye, MUKAMA Ruhanga owa baisenkuru inywe nkooku yabagambiire; otatiina kandi oteekanga.”

²²Inywena nubwo mwanyiriire haihi mwagamba muti: “Ka twebembezeeyo abasaija, batutatire ensi egi, nukwo batumanyise omuhanda ogu turaakwata, n'embuga ezitulihikamu.”

²³Ekimwagambire nkakisiima, nukwo kukoma omuli inywe abasaija ikumi na babiri, omu buli ruganda ninyihamu omuntu omu.

²⁴Baimukya baagenda omunsi ey'ensozi, baahika ha kihanga Esikooli, batata ensi, obubamazire kwetegereza ensi,

²⁵baanoga ebimu ha bijuma eby'omunsi egi baabituleetera, kandi baatumanyisa ensi MUKAMA Ruhanga waitu ei arukutuha nkooku eri nungi.

²⁶Baitu mutaikirize kugendayo mukanga MUKAMA Ruhanga ekiyabaragiire;

²⁷mukaikara nimutontorroma omu Heema zanyu nimugamba muti: “MUKAMA habw'okutunoba, nikyo yatwihiire omunsi ya Misiri, atunagire Abamooli batuhwerekereze.

²⁸Hati oku tugendeyo tuta? Bagenzi baitu batutiinisize nibagamba bati: ‘Abantu ba kuli nibatukira amaani n'okuraiha; embuga zaayo, nkooto, kandi zizitiirwe ebisiika ebinyakuraihire okuhika haiguru kandi ekindi, oku tuboineyo batabani ba Anaki.’ ”

²⁹Nubwo nabagambiire nti: “Muleke kucwekwa enkizi n'okutiina abantu abo.

³⁰MUKAMA Ruhanga wanyu anyakubeebembera, nuwe wenka arabarwanirra nkooku yabarwaniriire omunsi ya Misiri, nimurora n'amaiso ganyu,

³¹kandi nomwirungu nambere mwaroliire MUKAMA Ruhanga wanyu nkooku yabaheekere, omuntu nkooku aheeka omwana we, omu muhanda gwona ogu mwarabiremu okuhika obu yabataahize omu kiikaro kinu.

³²Baitu noobu muraaba mwakoliirwe ebi byona, nabwo mutaikirize MUKAMA Ruhanga wanyu,

³³yabeebemberaga kubaserurra ekiikaro eky'okuteeramu eheema zanyu, ekiro ali omunyomyo ey'omurro kandi nyamusana ali omunyomyo ey'ekicu kubooleka omuhanda, nabwo mutamwikirize.”

³⁴MUKAMA akahurra ebi mwagambire, nukwo kukwatwa ekiniga yarahira naagamba ati:

³⁵“Busaho muntu noomu ha bantu ab'ebiro binu ebibi ow'alirora ensi enungi ei narahiire kuha baisenkuru inywe.

³⁶Kalebbu mutabani wa Yefune wenka, nuwe aligirora, kandi ensi egi ei yarubasireho, ndigimuha hamu n'abaana be, habwokuba akahikiriza byona MUKAMA ebiyaragiire.”

³⁷Kandi na nyowe habwanyu, MUKAMA akambihirirwa nukwo kugamba ati: “Na iwe Musa, ensi egi toligihikamu;

³⁸Yoswa mutabani wa Nuuni anyakukwemeriire omumaiso, nuwe aligitaahamu; omwekambise, habwokuba nuwe alisoboza Abaisirairi okugweterwa ensi egi.

³⁹Kandi abaana banyu abato muno, aba mwagambire ngu balinyagwa, abatasobora kwahurana ekirungi n'ekibi, nubo baligitaaha, nubo ndigiha bagirye.

⁴⁰Baitu inywe, mukubuutuke mugende omwirungu ha bukiizi obw'Enyanja Ey'ebitoogo.”

⁴¹Nubwo mwangarukiremu muti: “Tukasiisa hali MUKAMA, ka tugende turwane, MUKAMA Ruhanga waitu nkooku yaturagiire.” Buli omu omuli inywe akahagatira ebyokurwanisa bye naateekereza ati, nikirahuka kugenda omunsi ey'ensozi.

⁴²MUKAMA yandagira ati: “Bagambire oti: ‘Mutagyayo kandi mutarwana, habwokuba tindi na inywe, abanyanzigwa banyu nibaija kubasingura.’ ”

⁴³Nukwo nabagambiire, baitu mwayanga kuhurra; mwayanga MUKAMA eki yaragiire, mwayekuliiriza, mwagenda omunsi ey'ensozi.

⁴⁴Abamooli abaikaraga omunsi egi ey'ensozi, nubwo baabaseesiire, baabairukya nk'enjoki okuzikora, baabairukya okuruga Seyira okubahikya Horuma.

⁴⁵Baitu obu mwagarukire mwalirirra MUKAMA, atabahurre, kandi atabateho mutima.

⁴⁶Eki nikyo kyabaikaize Kadesi, ebiro bingi ebi byona, ebi mwamazireyo.