Read Runyoro - rutooro Bir 10 Bible Online

Bir 10 - Runyoro - rutooro bible

Bir 10

¹“Omu kasumi ako, MUKAMA akagambira Musa ati: ‘Baija ebyasi bibiri eby'amabaale ebirukusisana nka biri eby'okubanza oije harusozi nambere ndi, kandi okole esanduuko ey'omuti.

²Ndaahandika ha bibbali, ebigambo ebi ebikaba biri ha bibbali eby'okubanza ebi wayasire; obite omusanduuko.’

³Nukwo kukora esanduuko omu mbaaho ez'omuti omusisa, kandi nabaija ebibbali bibiri eby'amabaale ebirukusisana eby'okubanza, natemba harusozi mbikwasire.

⁴MUKAMA yabihandiikaho nkooku akaba ahandiikire okubanza, nibyo ebiragiro ikumi ebiyabagambiriire ha rusozi, naayema hagati y'omurro, ha kiro eki mwayesoroliizeeho, yabimpa.

⁵Nubwo nakubuutukire nasirimuka naruga harusozi, nata ebyasi omusanduuko ei nkaba nkozire, na hati nuho biri, MUKAMA nkooku yandagiire.

⁶“Abantu ba Isirairi baaruga Beerosi-Bene-jakani, baahika Mosera, oku Arooni nuho yagwire kandi nuho yaziikirwe, omutabani Eryeza yaheereza ali nyakatagara omukiikaro kye.

⁷Obu baarugire oku, baagenda Gudigoda, baaruga Gudigoda baagenda Yotibosa, ensi ey'obusaaru bw'amaizi.

⁸Omu kasumi ako, MUKAMA nubwo yasoroire oruganda rwa Leevi, nurwo ruhimbege esanduuko y'endagaano ya MUKAMA, kandi nurwo rwemerrege omumaiso ga MUKAMA kumuheereza n'okusabiraga abantu omugisa omwibara lye, nukwo kiri okuhika na hati.

⁹Habweki, Leevi taina mugabo rundi bugwetwa hamu na bagenzi be; MUKAMA nuwe bugwetwa bwe, MUKAMA Ruhanga wanyu nkooku yamunihiize.

¹⁰“Nkaikara harusozi nkooku naikaireyo okubanza, emisana makumi ana n'ebiro makumi ana, nabwo MUKAMA akaba atarukugonza kubahwerekereza.

¹¹MUKAMA nubwo yangambiire ati: ‘Imuka ogende oyebembere abantu, nukwo bagende batunge ensi ei narahiire kuha baisenkuru inywe.’

¹²“Hati, iwe Isirairi, MUKAMA Ruhanga wawe naakusaba ki? Nakusaba kumutiina, kukora byona ebyagonza, kumugonza n'okumuhereza n'omutima gwawe gwona, n'omwoyo gwawe gwona,

¹³kukwata ebiragiro n'ebigambo bya MUKAMA, ebyarukukuragira hati, nukwo otunge omugisa.

¹⁴Omanye, iguru erinyakuli haiguru muno, ensi na byona ebinyakugirimu, bya MUKAMA Ruhanga wawe.

¹⁵Baitu MUKAMA Ruhanga wawe, akagonza muno baisenkuru inywe, omumahanga goona, nukwo kukoma inywe abaijukuru baabo, bbo batakyaroho, ninywe abo, nkooku kiri na hati.

¹⁶Habweki mube bahulizi, mulekere aho kugumangana.

¹⁷Habwokuba MUKAMA Ruhanga wanyu, kandi nuwe MUKAMA w'abakama, ow'ekitinisa, ow'obusobozi, kandi anyakutiinisa, atagira rubaju oru agwera, kandi atalya nguzi.

¹⁸Enfuuzi n'omufaakati, abacwera omubwinganiza, kandi agonza omunyaihanga, amuha ebyokulya n'ebyokujwara

¹⁹habweki mugonze omunyaihanga, habwokuba omunsi Misiri, na inywe mukaba muli banyamahanga.

²⁰Otiinege MUKAMA Ruhanga wawe, omuheereze, omugumireho, kandi orahirege ibara lye.

²¹Ogu nuwe okugizeege, nuwe Ruhanga wawe ayakukoliire ebintu binu ebikuru kandi ebitiinisa ebiwayeroliire n'amaiso gawe.

²²Baisenkuru inywe bakagenda Misiri bali bantu nsanju, baitu hati MUKAMA Ruhanga wanyu abakanyisize mwaingana enyunyuuzi eza haiguru.”