Read Runyoro - rutooro Bir 11 Bible Online

Bir 11 - Runyoro - rutooro bible

Bir 11

¹“Habweki nu, ogonzeege MUKAMA Ruhanga wawe obutoosa, okwatege ebiragiro bye, n'ebigambo bye.

²Kandi kiro kinu, mwetegereze, (hati tindukubaliza abaana banyu abataramanyire, kandi abataraboine eki ndukugamba). Mwijuke enyegesa ya MUKAMA Ruhanga wanyu mwijuke ekitiinisa kye, obusobozi bwe n'amaani ge,

³ebyamahano bye n'ebikorwa bye ebiyakoliire omunsi Misiri hali Faraaho omukama wa Misiri n'ensi ye yoona;

⁴ebiyakoliire ihe erya Misiri, embaraasi n'ebigaali byabo, nkooku yaragiire amaizi ag'Enyanja Ey'ebitoogo, gaamira Abaamisiri abakaba nibabahondera, nkooku yabahwerekeriize; baaherra kimu okuhika na hati

⁵kandi mwijuke ebiyabakoliire omwirungu, okuhika obu mwahikire omukiikaro kinu;

⁶ebiyakoliire Dasani na Abiraamu batabani ba Eriabbu, mutabani wa Rubbeni; ensi nkooku yayesamire, yabamira boona hamu na bakazi baabo, na'baana baabo, eheema zaabo, na buli kintu kyona ekyomeezi ekikaba kibakuraatire; kiri hagati y'Abaisirairi boona

⁷habwokuba, mukeerorra n'amaiso ganyu, ebikuru byona, MUKAMA ebiyakozire.”

⁸“Habweki, mukwate ebiragiro ebi ndukubagambira kiro kinu, nukwo mube b'amaani, mugende mutaahe ensi egi, ei murukwambukirra kulya,

⁹nukwo muhangaale omunsi egi, MUKAMA ei yarahiire baisenkuru inywe nkooku aligibaha, kandi nkooku aligiha baijukuru baabo, ensi ijwire amata n'obwoki.

¹⁰Habwokuba ensi murukwija kutaaha kulya, terukusisana ensi Misiri ei mwarugiremu nambere mwasigaga embibo yanyu, mukataho n'okugiitirra amaizi nk'abarukwitirra omusiri gw'emikubi;

¹¹baitu ensi ei murukwija kulya, nsi y'ensozi n'ebihanga, enyakunywa amaizi g'enjura enyakuruga omwiguru;

¹²ensi MUKAMA Ruhanga wanyu ei ataho omutima; okuruga omwaka nigutandika okuhika ha mpero yagwo agiikazaaho eriiso.”

¹³“Obu mulikwata ebiragiro byange ebindukubaragira kiro kinu, nukwo kugonza MUKAMA Ruhanga wanyu n'omutima gwanyu gwona, n'omwoyo gwanyu gwona,

¹⁴araanagaga enjura omunsi yanyu, ey'irumbi n'ey'obutoigo, omukasumi ak'erukwetaagirwamu, nukwo mweze, muhunike, mujunge amaarwa, mutunge n'amagita.

¹⁵Omu maliisizo ganyu, araamezamuga obunyansi obw'okuliisa ente zanyu, muraalyaga kandi muraigutaga.

¹⁶Mwegendereze, mutaliikara kubiihwabiihwa, mukarugaho MUKAMA, mukaheereza embandwa kandi mukairamya.

¹⁷Obumulikikora, ekiniga kye kiribaakiraho nk'omurro, iguru alikinge, enjura nukwo erekere kimu kugwa, ensi ereke kwana ebijuma muhwerekerre bwango, muruge omunsi egi enungi MUKAMA ei arukwija kubaha.”

¹⁸“Ebigambo byange binu, mubite omu mitima yanyu noomu myoyo yanyu, mubyebohe hamikono bibe nk'akarorwaho, kandi bibaikalege habuso hagati y'amaiso nk'ekihuuta.

¹⁹Mubyegese abaana banyu, mubibazeehoga mwikaliire omumaju ganyu, muli omumuhanda, mubyamire kandi nimwimuka.

²⁰Mubihandiike ha mikumiiro ey'amaju ganyu na ha malembo ganyu,

²¹nukwo muhangaale hamu n'abaana banyu omunsi MUKAMA ei yarahiire baisenkuru inywe kugibaha, ebe yabo ebiro byona ensi n'iguru obu bikyaroho;

²²obumulitaho omutima okuhikiriza ebiragiro binu byona ebi ndukubaragira, nukwo kugonza MUKAMA Ruhanga wanyu okukora byona ebyagonza, n'okumugumiraho.

²³Obu nubwo MUKAMA alibinga amahanga ago goona, inywe mutakahikireyo, nubwo mutunge amahanga agarukubakira amaani n'obusobozi.

²⁴Ensi yoona ei mulirubataho, eriba yanyu; okurugirra hairungu lya Lebbanooni, na ha kisaaru Efuraate, okugarukira ha nyanja eya Bugwaizooba.

²⁵Busaho muntu alisobora kubahakaniza; MUKAMA Ruhanga wanyu nkooku yabanihiize, hoona ha mulirubata, alireetera abantu kubatiina n'okubeekanga.”

²⁶“Kiro kya hati, nimbooleka ebintu bibiri: omugisa n'omukyeno, mwekomereho

²⁷obumulikwata ebiragiro bya MUKAMA Ruhanga wanyu ebi nabaragira kiro kya hati, nubwo mulitunga omugisa, baitu obumutalibikwata,

²⁸mukaruga omu muhanda ogu nabaragira kiro kinu kweta ha baaruhanga abandi aba mutakamanyaga, omukyeno nugwo ogwanyu.

²⁹MUKAMA Ruhanga wanyu, obu alibahikya omunsi ei murukwija kutaaha kugirya, omugisa muliguta harusozi Gerizimu, kandi omukyeno mugute harusozi Ebali.

³⁰Ensozi ezi ibiri ziri obuseeri bwa Yorudaani, Bugwaizooba bw'oruguudo, ha bukiizi bwa Bugwaizooba, omunsi ey'Abakanaani abanyakwikara omunsi Araba, oroleriire Girigali haihi n'omuti omweramaino ogwa Moleya.

³¹Muli b'okwambuka Yorudaani, nukwo mutaahe ensi MUKAMA Ruhanga wanyu ei ali haihi kubaha obumulimara kugirya, mukagiikaramu,

³²muteho omutima okukiriza ebiragiro n'ebigambo byona ebinabagambira kiro kya hati.”