Read Runyoro - rutooro Bir 12 Bible Online

Bir 12 - Runyoro - rutooro bible

Bir 12

¹“Obumuliba muli omunsi MUKAMA Ruhanga owa baisenkuru inywe ei arukwija kubaha mugirye, mugiikalemu ebiro byona ebi mulimara omunsi, binu nibyo biragiro n'ebigambo ebi mulitaho omutima kukwata.

²Ebiikaro byona, amahanga goona aga mulibinga ebi gaaramizaamuga embandwa zaago, ebinyakuli hansozi eziraihire na habusozi, na hansi eya buli muti omubisi, mubihwerekerereze kimu.

³Amatambiro gaabo mugaseese, enyomyo zaabo mwicwacwane, embandwa yabo Asera mugicumike omurro; ebisisani byabo ebinyakubaizirwe ebyembandwa zaabo mubitemateme, muragalize kimu ibara lyabo lireke kugaruka kwijukwa omu kiikaro eki.

⁴Baitu inywe, ebi mutalibikora MUKAMA Ruhanga wanyu.

⁵Baitu ekiikaro MUKAMA Ruhanga wanyu wenka eki alikoma omu nganda zanyu zoona kumanyisizaayo ibara lye n'okwikarayo, oku nuho mugendege,

⁶nuho muleetege ebihongwa byanyu eby'okwokya n'ebyonzira byanyu, nuho muleetege ebicweka byanyu ebya ikumi, ebihongwa byanyu ebi mwehongera inywenka, ebihongwa eby'okuragaana, eby'okwegondeza, emizigaijo ey'amagana ganyu ag'ente n'agembuzi.

⁷Oku, omumaiso ga MUKAMA Ruhanga wanyu, nuho muliirege, nuho musemerererwege hamu n'amaka ganyu, nimusiima buli kintu kyona eki muraakoraga, MUKAMA Ruhanga wanyu eki araabaga abaheeriiremu omugisa.

⁸Binu byona ebi turukukora hanu kiro kinu, buli muntu kwekorra eki arukurora ngu nikyo ekihikire mutalibikora;

⁹habwokuba ekihuumuro n'obugwetwa MUKAMA Ruhanga wanyu ebi ali haihi kubaha, timukabihikiremu.

¹⁰Baitu obu mulyambuka Yorudaani, mukaikara omunsi MUKAMA Ruhanga wanyu ei ali haihi kubaha ebe bugwetwa, kandi obu alibahuumuza akabajuna abanyanzigwa banyu boona abanyakubeehinguliriize, nukwo mwikale n'obusinge,

¹¹obu, ekiikaro eki alikikoma kuramizibwamuga, oku nuho mumutwarrege byona ebi mbaragiire: ebihongwa byanyu eby'okwokya n'ebyonzira byanyu, ebicweka ebya ikumi, ebihongwa ebi muhonga inywenka, n'ebihongwa byanyu byona eby'okuragaana na MUKAMA.

¹²Musemererwege omumaiso ga MUKAMA Ruhanga wanyu, inywe, batabani banyu, bahara banyu abairu n'abazaana banyu, n'Abaleevi abanyakuli omumbuga zanyu, habwokuba bo, tibagira mugabo rundi bugwetwa hamu na inywe.

¹³Oyerinde ebihongwa byawe eby'okwokya, oleke kubihongeraga hoona h'okasangire;

¹⁴baitu omukiikaro kimu kyonka MUKAMA eki aliba akomere omu rumu ha nganda zawe oku nuho ohongege ebihongwa byawe eby'okwokya, binu byona ebi ndukukuragira nuho obikorrege.

¹⁵“Baitu noikirizibwa kwita n'okulya enyama ey'ebisoro ebinyakuli omumbuga zawe, nkooku orukwenda, MUKAMA Ruhanga wawe nkooku yakuhaire omugisa, abarukuzira n'abatarukuzira nibaikirizibwa kulya enyama egi, nkooku bakubaire nibalya enyama ey'ensirabo rundi ey'empara.

¹⁶Kyonka otalikisura okalya esagama, ogiseesege nkooku oseesa amaizi.

¹⁷Omumbuga zawe torukwikirizibwa kuliiramu ekicweka ekya ikumi eky'engano yawe, n'eky'amagita gawe, kuliraamu emizigaijo ey'amagana gawe ag'ente n'ag'entaama, rundi eky'ebimu ha bihongwa byawe eby'okuragaana, rundi ebihongwa byawe okwegondeza, rundi ebi ohonga wenka n'emikono yawe baitu

¹⁸obiriirege, omumaiso ga MUKAMA Ruhanga wawe, omukiikaro ekyalikoma, nuho iwe, mutabani wawe, muhara wawe, omwiru wawe, omuzaana wawe, n'Omuleevi anyakwikara omumbuga zanyu; kandi kyona eki oraakoraga, okikolege noosemerererwa omumaiso ga MUKAMA Ruhanga wanyu.

¹⁹Akasumi koona akoolimara omunsi yawe, otalinagaija Omuleevi.

²⁰“MUKAMA Ruhanga wawe obu aligalihya ensi yawe nkooku yakunihiize, okagira oti: ‘Kandyeho enyama enu,’ ogirye nkooku orukwenda.

²¹Ekiikaro MUKAMA Ruhanga wawe eki alikoma kuramizibwamu, obu kiriba kikuli hara, noikirizibwa kwita ezimu ha nte rundi ha ntaama MUKAMA ezi yabahaire, nkooku nkugambiire; kandi noikirizibwa kuliira omumbuga zawe nkooku orukwenda.

²²Ogirye nkooku waakuliire ensirabo rundi empara. Abarukuzira n'abatarukuzira boona nibaikirizibwa kugirya.

²³Eki oraafuuhizaaga kimu nikyo kulya esagama, habwokuba esagama nubwo bwomeezi, habweki, nikyo orukutangirwa kuliirana esagama omu nyama yayo.

²⁴Eki otalikisura, esagama ogiseesege nkooku oseesa amaizi.

²⁵Otaligirya; obu olikora ebihikire MUKAMA ebi asiima, nubwo olitunga omugisa n'abaana bawe, iwe otakyaroho.

²⁶Baitu ebintu ebirukwera ebyoina, n'ebihongwa byawe eby'okuragaana, obitwalege omukiikaro MUKAMA ekyalikoma;

²⁷nuho ohonge ebihongwa byawe eby'okwokya, enyama n'esagama, haitambiro lya MUKAMA Ruhanga wawe; esagama ey'ebyonzira byawe ogiseesege haitambiro lye, kyonka enyama ogirye.

²⁸Ebigambo binu byona ebindukukuragira, obiteho omutima, obwolikora ekirungi kandi ekihikiriire, MUKAMA eki asiima, nubwo oliba muhiirwa, n'abaana bawe babe bahiirwa, iwe otakyaroho, ebiro byona.”

²⁹“MUKAMA Ruhanga wawe obu alihwerekereza amahanga ago ag'orukugenda kwetungira, obwolimara kugatunga okagaikaramu,

³⁰otalitwalirizibwa kukora nk'ebigaakozire, habwokuba eki, kirirugwamu kagingo, obugalimara kuhwerekerezibwa otalikaguliiriza hali embandwa zaago oti: ‘Amahanga ganu gaaheerezaaga gata embandwa zaago, na nyowe nukwo nkole?’

³¹MUKAMA Ruhanga wawe, otalimukora oti; habwokuba ekintu ekinugwa kyona MUKAMA ekyanoba, nikyo gaakoliire embandwa zaago habw'okuzitambira ebyonzira noobwakubaire batabani baabo na bahara baabo, bakabokya.

³²Kyona ekindukukuragira, otehoga omutima kukihikiriza; otalikyongeraho, kandi otalikikeehyaho.”