Read Runyoro - rutooro Bir 15 Bible Online

Bir 15 - Runyoro - rutooro bible

Bir 15

¹“Buli myaka musanju obweraahwahoga, olekerege abo ab'orukutonga amabanja.

²Omulingo oraaganyiramuga nugwo gunu: buli muntu arukutonga, aganyirege mugenzi we eki yamwohoize, aleke kukigaruza omutaahi, owanyina habwokuba omwaka gwa MUKAMA ogw'okuganyira amabanja gumazire kurangirirwa.

³Ekintu eki noikirizibwa kukigaruza omunyaihanga, baitu ekintu kyawe owanyoko ekyainakyo, eki okireke.

⁴Kakuba muhurra MUKAMA Ruhanga wanyu, mukataho omutima kuhondera ebiragiro binu ebindukubaragira kiro kinu, omuli inywe tihalibamu munaku,

⁵habwokuba MUKAMA Ruhanga wanyu naija kubaha omugisa omunsi arukwija kubaha ebe yanyu bweremera.

⁶Alibaha omugisa nkooku yabaraganiize, muraahoraga amahanga maingi, baitu inywe timwayohozeege; kandi mulirema amahanga maingi, baitu go tigalibalema.”

⁷“Omurubuga orumu ha mbuga ez'omunsi yanyu, MUKAMA Ruhanga wanyu ei arukwija kubaha, omubiikaro byona ha murukwikara, kakuba habamu omuntu omunaku, omu ha baanyoko, oleke kumugumanganira, rundi kumunagisa emikono,

⁸baitu omwanjururre engaro, omuhole ekirukumara kurungi okwetaaga kwe, kyona ekyarakakusaba.

⁹Weegendereze toikara kusigara n'akahyeme omumutima gwawe, okagamba oti: ‘Omwaka ogwa musanju, nugwo omwaka ogw'okuganyira amabanja guli haihi.’ Nubwo owanyoko omunaku okamurora akaiso kabi, okanga kumuha akantu na kati, na uwe akalirirra MUKAMA habwawe, eki kikakufookera kibi.

¹⁰Muheere busa n'omutima gumu, kandi obworaaba noomuha, oleke kuba n'akakekere omunda; habw'ekikorwa eki, MUKAMA Ruhanga wawe alikuha omugisa omu byona ebi okora, kandi nkeebi orukutegeka kukora.

¹¹Habwokuba ebiro byona, omunaku talihwa omunsi; habweki ninkuragira, owanyoko omunaku n'omuseege anyakuli omunsi y'owanyu, omwanjurrege engaro.”

¹²“Kakuba bakuguza mugenzi wawe Omuheebburaayo omusaija rundi omukazi akuheerezeege okumara emyaka mukaaga, omu mwaka ogwa musanju, omuleke akurugeho agende.

¹³Kandi obworaabaga n'omuleka kukurugaho agende, otalimuleka akagenda ngaro nsa;

¹⁴omuhehoga ebimusemeriire, ha magana gawe ag'entaama n'emburabuzi, ha byokulya byawe ebiteerirwe ha rubuga na ha viini ey'endeeba yaawe, MUKAMA Ruhanga wawe nkooku akuhaire omugisa, naiwe nukwo omuhe.

¹⁵Oijukege, naiwe nkooku okaba oli mwiru omunsi Misiri; kandi MUKAMA Ruhanga wawe nkooku yakucungwiire, hati kiro kinu, nikyo ndukukuragirirra eki.

¹⁶Baitu omwiru wawe kakuba akugambira ati:

¹⁷‘Tindukwija kukurugaho,’ habwokuba n'akugonza neeka yawe, habwokuba nimwikarana kurungi, obu okwate empindu ogimudubuze okutu, etaahire omu rwigi, abe mwiru wawe ow'ebiro n'ebiro. N'omuzaana wawe nukwo omukole oti.

¹⁸Kireke kukusaaliza habw'okumulekera akakurugaho, habwokuba emyaka mukaaga eyakuheriize, niinganaingana kimu kyakabiri eky'omuhendo ogu waakubaire opangisize ow'okukuheereza. Habweki, MUKAMA Ruhanga wawe, naija kukuha omugisa, omu bintu byona ebyokora.”

¹⁹“Emizigaijo yoona ey'enimi, ez'igana ery'ente zawe, n'empaya ez'entaama rundi emburabuzi zawe, ozihongerege MUKAMA Ruhanga wawe. Enimi zoona ezizigaizirwe omu igana ly'ente, otaliizikoza omulimo na gumu, kandi n'empaya z'entaama ezizigaizirwe otaliisara ebyoya.

²⁰Buli mwaka iwe neeka yawe, mulyege ebizigaizirwe, mubiriirege omumaiso ga MUKAMA, omukiikaro eki araabaga akomere kumuramizaamu.

²¹Baitu kakuba kiba kinyina akamogo, kiri kirema rundi kihimbaara, rundi kinyina akamogo akandi koona ak'amaani, otalikihongera MUKAMA Ruhanga wawe.

²²Okiriirege omukiikaro kyawe ekyoikaramu; abantu abarukuzira n'abatarukuzira, boona bakirye, nkooku baakuliire empara rundi ensa.

²³Kimu kyonka, mutalirya esagama yakyo, mugiseesege ha itaka, nkooku museesa amaizi.”