Read Runyoro - rutooro Bir 16 Bible Online

Bir 16 - Runyoro - rutooro bible

Bir 16

¹“Okwezi okw'Abbibbu, mukutemuga ekitiinisa, mukorrege MUKAMA Ruhanga wanyu obugenyi; habwokuba omu kwezi okw'Abbibbu ekiro, MUKAMA Ruhanga wanyu, nubwo yabaihire omunsi Misiri.

²Mutambirege ekyonzira eky'okwijuka obugenyi obw'okuhingurwaho, ekyonzira eki, mukiihege omu nte zanyu, rundi omu ntaama zanyu, mukihongerege omukiikaro eki alyekomera kwikaramu.

³Ekyonzira eki, mutalikiriisa omugaati ogunyakutumbisiibwe; mukiriise omugaati ogutatumbisiibwe okumara ebiro musanju, ogu nugwo omugaati ogw'okubonabona, mwikalege nimulya omugaati ogu, gurayetwaga mugaati ogw'okubonabona, obwomeezi bwanyu bwona, nukwo mwijukege ekiro eki mwarugiireho omunsi Misiri.

⁴Hatalizooka ekitumbisa omumaju ganyu, okumara ebiro musanju, kandi enyama ey'ekyonzira eki mutambire orwebagyo ogw'ekiro ekirukwebembera, etaliraara omunju.

⁵Ekyonzira eky'okwijuka obugenyi obw'okuhingurwaho, mutalikihongera omumbuga zanyu, MUKAMA ezi arukwija kubaha;

⁶mukihongerege omukiikaro MUKAMA Ruhanga wanyu ekyalyekomera kwikaramu. Orwebagyo muno, izooba nirirenga kugwa, nuko akasumi aka mwarugiiremu omunsi ya Misiri.

⁷Mugicumbe, mugiriire omukiikaro MUKAMA Ruhanga wanyu ekyalyekomera; obwire obu bulikya, mukwate omuhanda, mutaahe omu Heema zanyu.

⁸Mumale ebiro mukaaga nimulya emigaati etatumbisiibwe, ha kiro ekya musanju musorrokane kuramya MUKAMA Ruhanga wanyu. Ha kiro eki, mutalikora mulimo gwona.”

⁹“Mubalege wiiki musanju; wiiki ezi mutandikege kwibara nimurugirra ha kasumi aka muraatandikirahoga kugesa engano.

¹⁰Hanyuma, nubwo musemeze ekiro kikuru eky'igesa, mutemu MUKAMA Ruhanga wanyu ekitiinisa, nimumuleetera ebihongwa eby'okwegondeza ebirukwingana omugisa ogu yabahaire.

¹¹Mukyanganukege omumaiso ga MUKAMA Ruhanga wanyu, inywe, batabani banyu na bahara banyu, abairu banyu n'abazaana banyu, Omuleevi anyakwikara omumbuga zanyu, omunyaihanga, enfuuzi n'abafaakati abamurukwikara nabo. Mukyanganukirege omukiikaro MUKAMA Ruhanga wanyu ekyalyekomera kwikaramu.

¹²Mwijukege nkooku mukaba muli bairu omunsi Misiri; habweki, mwekambege kukwata ebiragiro binu.

¹³“Obu muraamaraga kuhuura engano yanyu mukagihunika, mukamara n'okujunga eviini yanyu, mukolege obugenyi obw'ensisira okumara ebiro musanju.

¹⁴Mukyanganukege muno omu bugenyi bwanyu obu, inywe na batabani banyu, na bahara banyu, abairu banyu, Omuleevi, ensuuhuuki, enfuuzi n'enfaakati abanyakwikara omumbuga zanyu.

¹⁵Mumalege ebiro musanju nimukorra MUKAMA Ruhanga wanyu obugenyi omukiikaro ekyalyeekomera; habwokuba MUKAMA Ruhanga wanyu aliha omugisa ebyokulya byanyu na byona ebimulikora, nahabweki, mukyanganuke muno.

¹⁶“Buli mwaka, abasaija bawe boona, bazookege omumaiso ga MUKAMA Ruhanga wawe omukiikaro ekyalyeekomera: ha bugenyi obw'emigaati etatumbisiibwe, ha bugenyi obwa wiiki musanju, na ha bugenyi obw'ensiisira.

¹⁷Bataliija ngaro nsa omumaiso ga MUKAMA. Buli muntu aheyo ekyarukusobora, nimurorra ha mugisa MUKAMA Ruhanga wanyu ogu yabahaire.

¹⁸“Omumbuga zanyu zoona, otemu abacwi b'emisango n'abalemi, MUKAMA Ruhanga wawe ezi arukwija kukuha, abarukwingana enganda zanyu; bacwerege abantu emisango ey'obwinganiza.

¹⁹Batalisoroora omubantu; kandi batalirengaho okulya enguzi, habwokuba enguzi, ita abanyamagezi amaiso, kandi abainganiza, ebacwisa kubi emisango.

²⁰Obwinganiza bwonka nubwo okuraatirege, nukwo oyomeere kandi otunge ensi MUKAMA Ruhanga wawe ei arukwija kukuha.

²¹“Obwoliba nookorra MUKAMA Ruhanga wawe itambiro, haihi nalyo otalitaho ekisisani ky'omucwezi Asera;

²²kandi otalibyaraho enyomyo ey'ibaale, ebi byona MUKAMA abinoba.